Ձեր վստահելի աղբյուրը

«Նախկին իշխանություններն ի՞նչ են կառուցել։ Եթե Վիգեն Սարգսյանը սովոր է, որ Հայաստանի իշխանությունները պետք է ծուռ վզով և կիսածնկած վիճակում արտաքին քաղաքականություն վարեն, ես ուզում եմ հիասթափեցնել նրան և նրա բոլոր գործընկերենրին։  ՀՀ իշխանությունները վարում են շատ հստակ, ինքնավստահ և արժանապատիվ երկրին վայել արժանապատիվ քաղաքականություն»,-այսօր լրագրողների հետ զրույցում ասաց ՀՀ վարաչապետի պաշտոնակատար Նիկոլ Փաշինյանը՝ անդրադառնալով պաշտպանության նախկին նախարար Վիգեն Սարգսյանի այն հայտարարությանը, որ իշխանությունն արտաքին քաղաքականության մեջ առանցքային սխալներ է թույլ տվել՝ մի ակնթարթում քանդելով այն, ինչ իրենք տարիներով կառուցել են։

Նա չցանկացավ պատասխանել այն հարցին, թե ովքեր են եղել մարտի 1-ի ն կրակողները՝ մատնանշելով անմեղության կանխավարկածը։

«Կա անմեղության կանխավարկած»,- ասաց վարչապետի պաշտոնակատարը։

Անդրադառնալով ԱՄՆ նախագահի խրհրդական Ջոն Բոլթոնի հայաստանյան այցին և վեջինիս այն ակնարկին, զենք գնել նաև ԱՄՆ-ից, Նիկոլ Փաշինյանը նշեց.
«Կառավարությունը որևէ բանով սահմանափակված չէ։ Եթե ԱՄՆ-ից կլինի մեզ համար շահավետ առաջարկ, մենք կքննարկենք»։

Անդրադառնալով Արցախյան հարցին կարգավորման շուրջ Բոլթոնի գնահատականներին՝ վարչապետի պաշտոնակատարը նկատեց, որ յուրաքանչյուրը պետք  է իր անունից խոսի։
«Ջոն Բոլթոնը խոսում է իր անունից, և նա և որևէ մեկը չի կարող խոսել իմ անունից։ Ես ասել եմ, որ չի կարող լինել որևէ լուծում, որն ընդունելի չի լինի հայ ժողովրդի համար, Հայաստանի ժողովրդի համար, Արցախի ժողովրդի համար և Արցախի իշխանությունների համար։ Հարցի գլոբալ կարգավորման առումով որևէ ընդունելի լուծում պետք է ընդունելի լինի նաև Ադրբեջանի ժողովրդի համար։ Եվ մենք որևէ լուծման պարագայում պետք է լինենք հրապարակային»,- ասաց նա։

Փաշինյանը շեշտեց՝ ինքը չի համարում, որ Արցախյան հարցի լուծողը որևէ կառավարություն կամ ինքն անձամբ է։ Նրա համոզմամբ, հարցի լուծողը Հայաստանի, Արցախի և Սփյուռքի ժողովուրդն է, քանի որ սա համահայկական հարց է։

«Ես Ղարաբաղի հարցի լուծող չեմ, լուծողը հայ ժողովուրդն է, որևէ վարչապետ, կառավարություն այսօր կա, վաղը չկա։ Ինչ վերաբերում է Վիեննայի և Սանկտ Պետերբուրգի պայմանավորվածություններին, ապա դրանց մասին խոսում եմ։ Բայց ի տարբերություն նախորդ իշխանությունների՝ մեզ շատ արագ հաջողվել է կոնկրետ քայլեր անել և կոնկրետ պայմանավորվածություններ ձեռք բերել, այդ թվում՝ զինադադարի շատ թե քիչ պահպանման ուղղությամբ։ Հիմա դրանից գո՞հ ենք, թե դժգոհ»,- ասաց նա։

Դիտարկմանը, որ որոշ գնահատականներով՝ ստվերային պայմանավորվածություններ կան, Փաշինյանը հերքեց նման վարկածը։

«Ցույց տվեք մի դեպք, երբ ՀՀ որևէ ղեկավար հանդիպել է Ադրբեջանի որևէ ղեկավարի հետ, եկել-նստել ուղիղ եթերում պատմել, թե ինչ են պայմանավորվել։ Ի՞նչ ստվերային պայմանավորվածության մասին է խոսքը։ Եթե իրենց իշխանության որևէ ներկայացուցիչ ցույց կտա դեպք, երբ իրենք Ադրբեջանի ղեկավարության հետ շփվել են, եկել-նստել են ուղիղ եթերում պատմել են, թե ինչ են խոսել... Կարո՞ղ եք բացատրել՝ ինչ մոտիվացիա կա Ղարաբաղի հարցում որևէ բան թաքցնելու։ Եթե կոռուպցիոն գործարք չկա, դավադրություն չկա, դավաճանություն չկա, ի՞նչ մոտիվացիա կա՝ բան թաքցնելու։ Եթե իրենք անընդհատ թաքցրել են, ինչի՞ համար են թաքցրել։ Դավադրությո՞ւն է եղել, կոռուպցիա, թե դավաճանություն, թող ասեն։

Ինչու ՀՀ որևէ ղեկավար չի եկել ամեն հանդիպումից հետո ուղիղ եթեր մտել և ասել՝ մենք Ալիևի հետ խոսել ենք այս-այս, իրականացրել ենք սա-սա։  Ես ասել եմ, որ որ մենք պայմանավորվածություններ ենք ձեռք բերել, որ ուղիղ կոմունիկացիա պետք է լինի։ Հետո, երբ ուղիղ կոմունիկացիան հաստատվել է, տեղեկացրել եմ ժողովրդին, որ այդ կոմունիկացիան հաստատված է, էլ ի՞նչ ստվերի մասին է խոսքը»,- ասաց վարչապետի պաշտոնակատարը։