Ձեր վստահելի աղբյուրը

Նախօրեին Ախալքալաքում տեղի ունեցած միջադեպի առթիվ հարուցված քրեական գործի շրջանակներում ոստիկանությունից հարցաքննության ծանուցագիր են ստացել Մարտուն Մկոյանը, Կարապետ Մկոյանը և Էդուարդ Մկոյանը: Jnews-ի հաղորդմամբ, Մկոյանները դեռ չեն ներկայացել ոստիկանություն, նրանք սպասում են իրենց իրավաբանին:

Հիշեցնենք, որ երեկ կեսօրին Ախալքալաքում «Ուժը միասնության մեջ է» քաղաքական դաշինքի շտաբի մոտակայքում տեղի էր ունեցել զանգվածային ծեծկռտուք, 4 հոգի տեղափոխվել էին հիվանդանոց։ Նրանք ստուգումներ են անցնում Թբիլիսիի Դիղոմի վնասվածքաբանության հիվանդանոցում: Ծեծի ենթարկվածները «Ուժը միասնության մեջ է» դաշինքի նախընտրական շտաբի աշխատակիցներ են, նշվում է, որ նրանց ծեծել էին Վրաստանի խորհրդարանի պատգամավոր Հենզել Մկոյանի կողմնակիցները և բարեկամները:

Զանգվածային ծեծկռտուքի դեպքի առթիվ Վրաստանի Քրեական օրենսգրքի 239-րդ հոդվածի 2-րդ և 3-րդ մասերով («հրազենով կամ այլ զենքի տեսքով օգտագործված առարկայով կատարված կանխամտածված խուլիգանություն») հարուցվել է քրեական գործ:

Դեպքից անմիջապես հետո  Ախալքալաք էր ժամանել միացյալ ընդդիմության  նախագահի թեկնածու Գրիգոլ Վաշաձեն։ 

1tv.ge-ն գրում է, որ միավորված ընդդիմության ներկայացուցիչները ասում են, որ նրանց ակտիվիստների վրա հարձակվել են նախագահի թեկնածու Սալոմե Զուրաբիշվիլու կողմնակիցները:

«Վրացական երազանքի» ներկայացուցիչները տեղի ունեցածն անվանում են միավորված ընդդիմության սադրանք:

Նինոծմինդայի և Ախալքալաքի մեծամասնական պատգամավոր Հենզել Մկոյանի եղբայրը, Մարտին Մկոյանը տարածել է է հսկիչ տեսախցիկներով նկարահանված տեսագրություն, որտեղ նրա խոսքով, երևում է, ինչպես են միավորված ընդդիմության ներկայացուցիչները Մկոյանի ընտանիքին պատկանող բենզալցակայանում պատռում և վնասում Սալոմե Զուրաբիշվիլու քարոզչական նյութերը, պաստառները:

Ախալքալաքի մունիցիպալիտետում զարգացած իրադարձությունների վերաբերյալ հայտարարություն է տարածել պատգամավոր Հենզել Մկոյանը, նշել, որ  միջադեպը «Ազգային շարժման» և Գրիգոլ Վաշաձեի շտաբի անդամների կողմից կազմակերպված և կառավարվող սադրանք էր:

Հ.Մկոյանը պատմել է, թե ինչ է նախորդել շտաբի դիմաց տեղի ունեցած միջադեպին:

Հիշեցնենք, որ հոկտեմբերի 28-ին Վրաստանում կայացել են նախագահական ընտրություններ, սակայն թեկնածուներից որևէ մեկը չի ստացել անհրաժեշտ քանակությամբ ձայն  ընտրություններում հաղթելու համար։ Կայանալու է ընտրությունների երկու փուլ, որին մասնակցելու է անկախ թեկնածու, արտաքին գործերի նախկին նախարար Սալոմե Զուրաբիշվիլին, ում աջակցում է իշխող «Վրացական երազանք» կուսակցությունը և արտաքին գործերի նախկին նախարար, միացյալ ընդդիմության  թեկնածու Գրիգոլ Վաշաձեն։