Ձեր վստահելի աղբյուրը

Այս տարի Հայաստանը գործարարությամբ զբաղվելու դյուրինության վարկանիշով 41-րդն է՝ նախորդ տարվա 47-ի համեմատ՝ 190 երկրների շարքում։ Այս մասին այսօր լրագրողների հետ հանդիպմանը հայտնեց Համաշխարհային բանկի Երևանի գրասենյակի տնօրեն Սիլվի Բոսութղոն՝ ներկայացնելով «Գործարարություն 2019» (Doing Business) զեկույցը:

Նրա խոսքով՝ նախկինում հրապարակված վարկանիշում առաջընթացի հիմնական պատճառները տարբեր բարեփոխումներում արտացոլված՝ գործարարության կարգավորման միջավայրի բարելավումներն են:

«Նախկինում կարևորվում էր սահմանգծից հեռավորության ցուցանիշը, որն այս տարի վերաձևակերպվել է ու անվանվել գործարարությամբ զբաղվելու դյուրինության միավոր։Սահմանագծից հեռավորության ցուցանիշով, որը գնահատում է երկրի կանոնակարգման արդյունավետության բացարձակ մակարդակը 0-ից 100 սանդղակով, որտեղ 0-ն համապատասխանում է ամենացածր կատարողականին, իսկ 100-ը՝ սահմանագիծն է, Հայաստանի միավորը  «Գործարարություն 2019» զեկույցում բարձրացել է 75.37-ի՝ «Գործարարություն 2018 » 73.31-ից։ Սա նշանակում է, որ վերջին տարվա ընթացքում Հայաստանն իր գործարար կարգավորումները բարելավել է, ինչպես արտացոլված են բացարձակ արտահայտությամբ «Գործարարություն» զեկույցի ցուցանիշներում: Երկիրն իրապես շարունակում է փոքրացնել համաշխարհային կարգավորման սահմանագծից հեռավորությունը, ինչը դրական և խոստումնալից զարգացում է»,- մանրամասնեց Սիլվի Բոսութղոն։

Նա նշեց, որ  2017-18 թթ. Հայաստանն իրականացրեց գործարարության կարգավորման դաշտը բարելավող 5 բարեփոխումներ։

«Հայաստանը դյուրացրել է ընկերությունների հիմնումը դյուրացրել է՝ հնարավորություն տալով իրավաբանական անձի գրանցման ժամանակ որպես ավելացված արժեքի հարկ վճարող կամավոր հաշվառվելու հնարավորություն։ Գործնական առումով սա նշանակում է, որ հունվար ամսին ուժի մեջ մտած Հարկային օրենսգրքով ընկերությունների համար նախատեսվել է կամավոր որպես ԱԱՀ վճարող տարբերակ։ Այս ամենի հետևանքով հիմա մեկ օրով պակաս ժամանակ է պահանջվում Հայաստանում ընկերություն գրանցելու համար»,- ասաց Համաշխարհային բանկի Երևանի գրասենյակի տնօրենը։

Նա նաև նշեց, որ Հայաստանն էլեկտրականության ստացումն ավելի արագ է դարձրել՝ էլեկտրականության նոր միացում ապահովելու ընթացակարգերի համար սահմանելով նոր ժամկետներ:

«Մյուս ցուցանիշն այն է, որ Հայաստանն ուժեղացրել է փոքր ներդրողների պաշտպանությունը՝ ավելացնելով փոխկապակցված կողմերի միջև գործարքների հրապարակումը, հստակեցնելով սեփականության և վերահսկողության կառուցվածքները և պահանջելով կորպորատիվ ավելի մեծ թափանցիկություն։ Հաջորդ ցուցանիշով՝ Հայաստանը դյուրացրել է հարկերի վճարումը՝ սահմանելով շահութահարկի, ավելացված արժեքի հարկի և եկամտային հարկի կանոնների կատարումը դյուրացնող վարչարարական միջոցառումներ: Պայմանագրերի կիրարկումը ևս դարձել է ավելի դյուրին՝ փոքր պահանջների պարզեցված ընթացակարգերի և դատական հիմնական դեպքերի համար ժամկետային նորմերի սահմանմամբ»,- ներկայացրեց Բոսութղոն։

Հանդիմանը ներկա ՀՀ տնտեսական զարգացման և ներդրումների նախարարի պաշտոնակատար Տիգրան Խաչատրյանն էլ ասաց. «Այն որ ունենա դիրքի առաջընթաց՝ նշանակում է, որ կատարված աշխատանքի արդյունքը մեզ ավելի է մոտեցրել միջազգային փորձին, միևնույն ժամանակ հուշում է, թե ինչ ունենք անելու, որ Հայաստանը դառնա բարենպաստ, ներդրումների, հետագա տնտեսական աճ և այդ աճի արդյունքները հասարակության անդամների միջև ավելի հավասար բաշխելու ճանապարհին»։