Ձեր վստահելի աղբյուրը

«Շինարարությունների թույլատրման առումով Հայաստանը դասակարգվում է 98-րդ տեղում»,- այս մասին այսօր լրագրողների հետ հանդիպմանն ասաց ՀՀ տնտեսական զարգացման և ներդրումների նախարարի պաշտոնակատար Տիգրան Խաչատրյանը՝ Համաշխարհային բանկի  «Գործարարություն 2019» (Doing Business) զեկույցի ներկայացման ժամանակ։

Նախարարի պաշտոնակատարի խոսքով՝ սա նշանակում է, որ կազմակերպություն գրանցելուց հետո, որի ցուցանիշով Հայաստանը 8-րդ տեղում է, հնարավոր չի լինում շարժվել առաջ։

«Կառավարության նպատակն ու առաջիկա անելիքը պետք է լինի բոլոր այն ուղղությունները, որտեղ ունենք ակնհայտորեն թերի կարգացորումներ, բարձրացնել գոնե միջինից բարձր»,- ասաց Տիգրան Խաչատրյանը։

Համաշխարհային բանկի Երևանի գրասենյակի տնօրեն Սիլվի Բոսութղոնը ևս նշեց, որ շինարարությունների թույլատրման առումով Հայաստանն այդքան էլ լավ վարկանիշ չունի, և  որ ընթացիկ աշխատանքներ են տարվում Երևանի քաղաքապետարանի հետ, որպեսզի բարելավվեն շինարարական թույլտվությունների տրամադրման ընթացակարգերը։

Նա նաև հավելեց, որ մի շարք այլ ցուցանիշներով ևս Հայաստանը բարելավման կարիք ունի։

«Ինչ վերաբերում է վարկերի ստացմանը, այստեղ ևս կարող ենք որոշակի առաջընթաց արձանագրել։ Օրինակ, վարկերի ստացման համար ձեռնարկատերերին հնարավորություն կտրվի իրենց շարժական գույքն օգտագործել որպես գրավի առարկա, ինչը լավ է», - ասաց Սիլվի Բոսութղոն։