Ձեր վստահելի աղբյուրը

Նախօրեին Ախալքալաքի Սակրեբուլոն քաղաքի Մալխասյան փողոցը վերանվանել է ֆրանսահայ շանսոնյե Շառլ Ազնավուրի անվամբ։ Աղմաշենեբելի խաչմերուկի հարևանությամբ գտնվող պուրակը ևս անվանակոչվել է աշխարհահռչակ երգչի անունով:

Jnews-ը գրում է, որ բնակիչները հանդես էին եկել նախաձեռնությամբ, որպեսզի Ախալքալաքի փողոցներից մեկը վերանվանվեր Շառլ Ազնավուրի անունով: Այդպիսով, ախալքալաքցիները իրենց մեծարանքն ու հարգանքն են արտահայտում ֆրանսահայ երգչին:

Շառլ Ազնավուրը ծնվել է 1924 թվականի մայիսի 22-ին Փարիզի Սեն Ժերմեն դե Պրե թաղամասում, հայ գաղթականներ Միշա և Քնար Ազնավուրյանների ընտանիքում։ Ծննդյան անունը՝ Շահնուր Վաղինակ Ազնավուրյան: Ազնավուրի հայրը ծնվել էր Ախալցխայում, արմատներով Էրզրումից էր, իսկ մայրը՝ Քնար Բաղդասարյանը, Իզմիրից էր, Հայոց ցեղասպանության ականատես փրկվածներից: Շառլի հայրը երիտասարդ տարիներին ապրել էր Թբիլիսիում, ուր աշխատանքի համար տեղափոխվել էր նրա ընտանիքը (Շառլի պապը Թբիլիսիի գլխավոր կառավարչի անձնական խոհարարն էր)։

Շառլ Ազնավուրը մահացել է հոկտեմբերի 1-ին։