Ձեր վստահելի աղբյուրը

«Մենք այսօրվանից պիտի ջրային ռեսուրսների կառավարման գլոբալ խնդիր լուծենք»,- Ազգային ժողովի հատուկ նիստում վարչապետի ընտրության հարցի քննարկման ժամանակ մտահոգություն բարձրացրեց «Ելք» խմբակցության պատգամավոր Արամ Սարգսյանը:

«Շատ վատ է, որ կան ՀԷԿ-եր, որ ջրաչափեր չունեն, վատ է, որ ունենք ստվերային այգիներ, բայց անհամեմատ ավելի վատ է, երբ ամեն երեք տարին մեկ, մենք Սևանա լճի չափ ջուր ենք կորցնում, որը գնում է Կասպից ծով»,- նշեց պատգամավորը։

Մյուս առաջնային խնդիրն, ըստ Արամ Սարգսյանի, լեռնամետալուրգիայի  ոլորտում է. «Կցանկանայի՝ տեխնոլոգիաները այդտեղ օգտագործվեին, և վերջնական ապրանք ստանալու լուրջ խնդիր դրվեր: Այս պարագայում 400 հազար մարդը ոչ թե կպահի 800 հազար մարդու, այլ 600 հազարը կպահի  600 հազարի. ծանր արդյունաբերությունն է, որ իրական աշխատատեղ է ապահովում, և ՀՀ-ը պետք է իր առաջ դնի այդ խնդիրը: Ցանկացած տնտեսություն ոտքի է կանգնում, եթե ունենում է լոկոմոտիվ, կարծում եմ, որ մեր երկրում լոկոմոտիվը լեռնամետալուրգիան է»։

Խոսելով գյուղատնտեսությունից, պատգամավորը նշեց, որ առաջնահերթ պետք է կատարվի գյուղապրանքի ապահովագրում բնական աղետներից. «Պետք է հաշվառվում արվի և պլանավորվի, թե շուկան ինչ պահանջարկ է ունենալու, դա էկոնոմիկայի նախարարության թիվ մեկ խնդիրն է: Շատ եմ ուզում՝ ուշադրություն դարձնենք սերմերի գնմանը և դրանց որակի վրա, մենք այս տարի որակի խնդիր ունեցել ենք, քանի որ ամենաանորակ սերմերն ենք գնում, մեր լոլիկը կարտոֆիլից չի տարբերվում»,- ասաց նա և նշեց, որ  գյուղացիներին չեն տրամադրում էժան վարկեր:

Արամ Սարգսյանն ասաց, որ անկախության և արժանապատվության առումով կիսում է Փաշինյանի բոլոր տեսակետները և աջակից է դրանց:

«Քաղաքական առումով շատ լավ է, որ սա խորհրդարանի վերջի նիստն է և առաջացած դիսբալանսը խորհրդարան-կառավարություն-ժողովուրդ լուծվելու է ընտրությունների առումով: Իրավիճակը լիցքաթափելու համար ասեմ, որ խորհրդարանն իմ վրա չի գալիս, ես երկու անգամ ինքս չեմ եկել խորհրդարան, այս անգամ խորհրդարանը ինքն է լուծարվում»,- եզրափակեց նա։