Ձեր վստահելի աղբյուրը

«Միտքը և այն քայլը, որ արեցի, երեկ չէ առաջացել, ոչ էլ երեկ չէ անցած օրը։ Դա եղել է մշտապես և դա առավել ակտիվ եղել է հենց հեղափոխությունից հետո։ Ես ամեն բան արել եմ, որ բանակցությունները հաջող ընթանան, և մենք միանանք, սակայն դա չի ստացվել, և ես այս պահին հասկացել եմ, որ ես պետք է անեմ այն, ինչին հավատում եմ»,- ԱԺ-ում լրագրողների հետ զրույցում ասաց ԱԺ «Ելք» խմբակցության պատագամավոր Հայկ Կոնջորյանը՝ անդրադառնալով «Լուսավոր Հայաստան» կուսակցությունը լքելու մասին իր որոշմանը։

«Իմ քաղաքական գործունեության վիթխարի մասը և իմ պատգամավորության ամբողջ մասը ես անցկացրել եմ «Ելք» դաշինքի և «Ելք» խմբակցության ֆորմատում։ Դեռևս «Ելք» դաշինքի ստեղծման պահից հուշագրում մենք ունեինք կետ, որ պետք է դառնաք մեկ ուժ, այսինքն՝ գաղափարը, որ մենք մի օր պետք է դառնանք մի թիմ, եղել է այն ժամանակ։ Ես այդ գաղափարին շատ հոգեհարազատ եմ եղել։ Ես մտածել եմ, որ մենք բնական դաշնակիցներ ենք, և քաղաքական գործընթացները պետք է շարունակենք միասին։ Ամիսներ շարունակ «Լուսավոր Հայաստանում» ես եղել եմ այն անձանցից մեկը, ով վստահ է եղել, որ մենք բոլորս պետք է միանանք, քանի որ հավատում ենք նույն  գաղափարներին ու արժեքներին։ Ցավոք, ես իմ այդ գաղափարում մնացել եմ միայնակ»,- ասաց պատգամավորը։

Հայկ Կոնջորյանը շեշտեց՝ ինքը հեղափոխության օրերին սրտով եղել է փողոցում, սակայն հարգելով կուսակցական կարգապահությունը՝ «Քաղաքացիական պայմանագրի» իր գործընկերներին չի միացել։ 

Panorama.am-ի թղթակցի հարցին՝ ինչպես  է պատկերացնում իր քաղաքական ապագան՝ Հայկ Կոնջորյանը պատասխանեց, որ ՔՊ-ին անդամակցելու վերաբերյալ քննարկում չի եղել, եղել է քննարկում, որ իրենք միասին գնան առաջիկա գործընթացներին։

«Իմ քայլը պայմանավորված է բացառապես իմ գաղափարներով և հավատամքով։ Ես հավատում եմ և հավատացել եմ Նիկոլ Փաշինյանին և այն գործին, որը նա սկսել է։ Ես չեմ կարող ընդդիմանալ մի բանի, ինչին հավատում եմ։ Ես ինչպե՞ս կարող եմ ընդդիմադիր լինել սեփական պատկերացումներին։ Ես ամբողջությամբ կիսում եմ այն գործընթացները, որոնք իրականացվում են, ես չեմ կարող ինքս ինձ ընդդիմադիր լինել։ Սա ֆունդամենտալ ազնիվ մոտեցում է, և ես համարում եմ, որ քաղաքականության և բարոյականության տեսանկյունից ես կատարել եմ ճշտագույն քայլ, ոչ մի միլիմետր չեմ շեղվել»,- նշեց պատգամավորը՝ չհամաձայնելով այն տեսակետի հետ, որ ինքը ամենևին ճամբարափոխ չի եղել։

Հայկ Կոնջորյանը շեշտեց՝ ինքն ինքնաբավ մարդ է և թքած ունի ցանկացած պաշտոնի վրա, եթե այն ինքնանպատակ է, իր համար մանդատն իմաստավորվում է նրանով, թե որքանով ամբիոնից հնչած իր ձայնը կնպաստի ժողովրդի խնդիրների բարելավմանը։

Ինչ վերաբերում է «Լուսավոր Հայաստան» կուսակցության ղեկավար Էդմոն Մարուքյանի հետ քավոր-սանիկական հարաբերություններին, Հայկ Կոնջորյանը շեշտեց, որ բարեկամական կապերը չեն կաշկանդել իրեն՝ լքելու նշված քաղաքական ուժը, անձնական կապերի պատճառով այդ որոշումն իրեն դժվար չի տրվել։