Ձեր վստահելի աղբյուրը

ԱԺ պատգամավոր Հայկ Կոնջորյանը, ով խորհրդարանում հայտնվել է «Լուսավոր Հայաստան» կուսակցության ցուցակով, հայտարարել է, որ երեկվանից  դադարեցնում է իր անդամակցությունը  կուսակցությանը:

«Այս որոշումը պայմանավորված է կուսակցության ապագա գործունեության շուրջ իմ ունեցած մոտեցումների տարբերությամբ: Ես խորապես շնորհակալ եմ Լուսավոր Հայաստանի իմ ընկերներին անցած համատեղ ճանապարհի համար և հաջողություն եմ մաղթում նրանց՝ ապագա ձեռնարկումներում:

Ես հավատում եմ, որ Հայաստանում տեղի ունեցած հեղափոխությունը մեր պայծառ ապագայի գլխավոր շանսն է: Ես գիտեմ, որ անցյալի ուրվականը դեռ թափառում է Հայաստանում: Ես համոզված եմ, որ ապագայի և անցյալի կռվում պիտի կանգնել հեղափոխության կողքին ուղղակիորեն, անմիջականորեն, ուս-ուսի տված:

Ուստի, ես իմ ուղղակի և անվերապահ աջակցությունն եմ հայտնում Նիկոլ Փաշինյանին և հեղափոխությանը Հայաստանի համար այս բախտորոշ ժամանակներում և իմ քաղաքական գործունեությունը իրականացնելու եմ հեղափոխության թիմի հետ միասին, որովհետև մեր պետության նավը դուրս է եկել ծով, որը լի է փոթորիկներով և ծովահեններով, իսկ առագաստը պիտի պահել ամուր, որովհետև նավը պիտի հասնի մեր երազանքների ափին»,-մանրամասնել է նա։

Ֆեյսբուքում շատ օգտատերեր նկատել են, եթե «Լուսավոր Հայաստան»-ից դուրս գալու նրա քայլին պետք է հետևեր նաև պատգամավորի մանդատից հրաժարվելը։

Կոնջորյանի որոշումը ողջունել է «Ելք» խմբակցության մեկ այլ պատգամավոր։ «Քաղաքացիական պայմանագիր» կուսակցության անդամ Ալեն Սիմոնյանը գրել է. «Այսօր իմ ընկեր Հայկ Կոնջորյանը շատ կարևոր որոշում է կայացրել. Հայկ ջան, բարի գալուստ մեր թիմ, ուրախ եմ շատ նման ուժեղ գաղափարակից ունենալ, վստահ եմ, որ մեծ անելիքներ ունենք առաջիկայում»։