Ձեր վստահելի աղբյուրը

Առաջիկա խորհրդարանական արտահերթ ընտրությունները կարող են ապաքաղաքական լինել, կարող են ապաքաղաքական չլինել: Ազգային ժողովում լրագրողների հետ զրույցում ասաց արդարադատության նախարարի պաշտոնակատար Արտակ Զեյնալյանը:

«Պայմանավորված է, թե քաղաքական ուժերն ինչպես կմասնակցեն, պետությունն ինչպես կկատարի իր պարտականությունները՝ երաշխավորելու և ապահովելու համար ընտրական իրավունքը։
Բայց մենք բոլորս ցանկանում ենք, որ այն լինի քաղաքական ընտրություն: Բնականաբար, կառավարությունն ու ոստիկանությունն ամեն ինչ անելու են, որ անօրինականություններ չլինեն, և զանգվածային լրատվամիջոցներն էլ ապահովելու են, որպեսզի դրանք հնարավորինս լինեն թափանցիկ և քաղաքական կամքը ձևավորվի ազատորեն»,-նշեց նախարարի պաշտոնակատարը։

Հարցին, թե խնդիր տեսնո՞ւմ եք, որ ռեյտինգային ընտրակարգը կարող է աղճատել հեղափոխությունը, Ա. Զեյնալյանը պատասխանեց. «Ոչ խնդիր չեմ տեսնում, մենք բոլորս պետք է ջանքերը միավորենք, որ լինի քաղաքական ընտրություն և ապագա Ազգային ժողովը լինի լեգիտիմ»:

Հարցին, թե «Լուսավոր Հայաստան» կուսակցության ցուցակո՞վ եք մասնակցելու առաջիկա ընտրություններին, Ա. Զեյնալյանը բացասական պատասխան տվեց, ապա շարունակեց. «Իսկ ինչպես կմասնակցենք՝ դետալները շուտով կհրապարակվեն»։

Իսկ ինչ վերաբերում է «Լույս» դաշինքով մասնակցությանը,  նա նշեց. «Կոնսուլտացիաները շարունակվում են ձևաչափի շուրջ, դեռևս վաղ է որևէ բան հայտարարել»։