Ձեր վստահելի աղբյուրը

Համաներման արդյունքում հնարավոր է Հայաստանում բարձրանա հանցավորության մակարդակը։ Լրագրողների հետ զրույցում ասաց ՀՀ արդարադատության նախարարի պաշտոնակատար Արտակ Զեյնալյանը։

«Այդպիսի վերլուծություններ, վիճակագրություն, դիտարկումներ եղել են։ Փորձ կա, որ հանցավորության մակարդակը բարձրանում է։ Չի բացառվում նաև, որ Հայաստանում հանցավորության մակարդակը բարձրանա, բայց դա պարտադիր պայման չէ, կամ այն չափով, ինչ չափով, որ բարձրացել է նախկիններում, պարտադիր չէ, որ հենց այդ չափով բարձրացում լինի։ Այստեղ բոլորս անելիք ունենք, որպեսզի դա տեղի չունենա», -  ասաց նա։

Հիշեցնենք, որ նոյեմբերի 1-ին Ազգային ժողովը միաձայն ընդունել էր համաներում հայտարարելու մասին որոշման նախագիծը։

Հարցին, թե քրեակատարողական հիմնարկներից  մի քանիսում անմխիթար վիճակ է, վերանորոգման աշխատանքների համար գումար հատկացվելո՞ւ է, նախարարի պաշտոնակատարը պատասխանեց, որ այս պահի դրությամբ կառավարությունում գտնվում է  որոշման նախագիծ պահուստային  ֆոնդից գումար տրամադրելու վերաբերյալ, միջոցներ են հայթայթում վերանորոգումներ անելու նպատակով։

«Առնվազն երկու քրեակատարողական հիմնարկ ենթակա են փոխարինման՝ «Նուբարաշեն» և «Գորիս»։  Մենք նաև նախատեսել էինք գալիք տարվա ծախսերում նոր քրեակատարողական հիմնարկի մեկնարկի համար 1 միլիարդ դրամի չափով գումար, սակայն դեռևս այն ընդգրկված չէ պայմանավորված բյուջետային միջոցների սղությամբ»,- ասաց Ա.Զեյնալյանը։

Նա նշեց, որ չափից ավելի շատ անհրաժեշտ է, որպեսզի բրասլետային վերահսողության մեխանիզմը ներդնեն  պրոբացիայում, որ պակասեցնեն ՔԿՀ-ների շահառուների թիվը:

«Մեզ դրա համար անհրաժեշտ կլինի շուրջ 300 հազար դոլարի չափ գումար: Փորձում ենք հայթայթել այդ միջոցները, այդ թվում նաև դրամաշնորհների և բյուջետային աջակցության խողովակներով»,-հավելեց Ա. Զեյնալյանը: