Ձեր վստահելի աղբյուրը

«Հին Ընտրական օրենսգիրքը ուժի մեջ մնալու հանգամանքը, նաև ռեյտինգային ընտրակարգն իրենց ազդեցությունն ունեցել են մեր բոլորի որոշումների կայացման վրա»,-լրագրողների հետ հանդիպմանն ասաց «Լուսավոր Հայաստան» կուսակցության նախագահ Էդմոն Մարուքյանը։

Հիշեցնենք, որ նախօրեին «Լուսավոր Հայաստան» կուսակցությունը, որի հետ «Հանրապետություն» կուսակցությունը Երևանի ավագանու արտահերթ ընտրություններում «Լույս» դաշինք էր կազմել, մասնավորապես հայտարարել էր. ««Լուսավոր Հայաստան» կուսակցությունը, «Հանրապետություն» կուսակցության հետ երկար քննարկումների արդյունքում, որոշում է կայացրել Ազգային Ժողովի առաջիկա ընտրություններին մասնակցել «Լուսավոր Հայաստան» կուսակցության ցուցակով՝ սեփական տեսլականով և ծրագրերով», «Հանրապետություն» կուսակցության նախագահ Արամ Սարգսյանն այսօր հայտարարել է, որ «Հանրապետությունը» մասնակցելու է Աժ արտահերթ ընտրություններին` իր ծրագրերն ու գաղափարները իրականացնելու նպատակով։

«Մենք գտնում ենք, որ լավագույն տարբերակը սա է։ Մյուս կողմից մեր համագործակցության հնարավորությունները, թե «Քաղաքացիական պայմանագիր» կուսակցության, թե «Հանրապետություն» կուսակցության հետ սպառված չեն, ապագայում նման հնարավորությունների դեպքերում ի շահ Հայաստանի և ի բարօրություն  քաղաքացիների նման համագործակցություններ հնարավոր են»,- ասաց Է.Մարուքյանը։

Հարցին, թե խորհրդարան անցնելու հնարավորություններն ավելի մեծ է առանձին-առանձին մասնակցելո՞ւ դեպքում, թե՞ «Լույս» դաշինքով, «Լուսավոր Հայաստան» կուսակցության նախագահը պատասխանեց. «Մենք այդ հարցին չենք նայել զուտ անցողիկության, չանցողիության ֆորմատով, նայել ենք ընտրական իմաստով ավելի  մոբիլ լինելու առումով։ Ես կարծում եմ, որ երկու ուժերն էլ հայտնվելու հնարավորություն ունեն նաև այս ֆորմատով։ Մտահոգություն չունեմ, որ  ուժերը չեն հայտնվի։ Եթե մենք չհայտնվենք, բա՞ էլ ով պետք է հայտնվի»։

Հարցին, որքանո՞վ է հստակ տեղեկատվությունը, որ դուք առաջարկել եք Արամ Սարգսյանին հանդես գալ «Լուսավոր Հայաստանի» ցուցակով, ինչին նա չի համաձայնվել, Մարուքյանն ասաց. «Քննարկումներ եղել են կուսակցությունների ցուցակներով մասնակցելու շուրջ, բայց դրա հետ մեկտեղ այլ քննարկումներ են եղել։ Որևէ վեճ չի եղել։ Մեր խորհուրդը մի հարցի վերաբերյալ մի մոտեցում է ունեցել, մյուս խորհուրդը՝ այլ մոտեցում, դրանք մանրամասն քննարկել ենք»։

Պատասխանելով մեկ այլ հարցի, թե խորհրդարան անցնելու դեպքում «Լուսավոր Հայաստանը» ընդդիմությո՞ւն է լինելու, նա ասաց. «Ժողովուրդը կորոշի, ընտրությունները պետք է ավարտվեն,  որ մենք հասկանանք՝ ուր ենք, կախված է ուժերի ստացած չափաբաժիններից և համամասնություններից»։

Է. Մարուքյանն ասաց, որ իրենց ցուցակում ընդգրկված կլինեն տարբեր քաղաքացիական խմբերից, տարբեր կուսակցություններից ներկայացուցիչներ, ովքեր ռեյտինգային ընտրակարգով կառաջադրվեն։

«Մենք որոշում ունենք՝ աշխատելու ենք ցուցակում չներգրավել նախկին գործիչների, որքան ձայն էլ ուզում են նրանք կարողանան հավաքել որևէ տեղից, որոնք անցած ճանապարհ կունենան, որը, ըստ էության, կարող են ստվերել  «Լուսավոր Հայաստանի» լույսից թեկուզ 0,1 տոկոս։ Մենք հիմա ամեն օր առաջարկներ ենք ստանում»,- ասաց Է. Մարուքյանը։