Իրանի հանդեպ պատժամիջոցների հարցը բավականին զգայուն մի թեմա է մեզ համար. Կարեն Նազարյան
ԱԺ Եվրոպական ինտեգրման հարցերի, ֆինանսավարկային և բյուջետային հարցերի մշտական հանձնաժողովների համատեղ նիստում «Ծառուկյան» խմբակցության պատգամավոր Նաիրա Զոհրաբյանը ՀՀ արտաքին գործերի փոխնախարարի պաշտոնակատար Կարեն Նազարյանից հետաքրքրվեց ԱՄՆ նախագահի Ազգային անվտանգության հարցերով խորհրդական Ջոն Բոլթոնի՝ Իրանի հանդեպ պատժամիջոցների մասին հայտարարությունից և տարածաշրջանի երկրներից ակնկալվող համարժեք արձագանքից։
«Կա մտահոգություն քաղաքական վերլուծական շրջանակներում, որ եթե արձագանքը չլինի ճշգրիտ, դա կարող է բերել Հայաստանի կղզիացմանը»,- նշեց պատգամավորը։
Կարեն Նազարյանը պատասխանեց. «Իրանի հանդեպ միջազգային պատժամիջոցների հարցը բավականին զգայուն մի թեմա է մեզ համար, և Հայաստանը մշտապես լիակատար աջակցություն է ցուցաբերել համատեղ, համապարփակ գործողությունների ծրագրի իրականացմանը, որը որ կնքվել էր Իրանի և համապատասխան գործընկեր պետությունների միջև։ Մեզ համար շատ էական է, որպեսզի շարունակվեն ավանդական, փոխշահավետ և բարիդրացիական հարաբերությունները մեր հարևան երկրի հետ»։
Նրա խոսքով, արտգործանախարարության կարևորագույն առաքելությունն այն է, գործընկեր պետությունների հետ իրականացնի թափանցիկ և անկաշկանդ քննարկումներ՝ կարևորելով Հայաստան-Իրան փոխհարաբերությունները. «Սա մի կողմից, մյուս կողմից էլ նշանակություն տալով նաև մեր ավանդական գործընկերային հարաբերություններին մյուս գործընկեր պետությունների հետ»։
Ինչ վերաբերում է Բոլթոնի այցին՝ նա նշեց. «Այն առիթ էր մեզ համար ամենաբարձր մակարդակով վերհանել տարածաշրջանային զարգացմանը միտված խնդիրներ, նաև լսելի դարձնել մեր մոտեցումները՝ մեր երկրի հանդեպ գոյություն ունեցող մարտահրավերների առնչությամբ»։
Նաիրա Զոհրաբյանը նաև հետաքրքրվեց, թե արդյոք ՀԱՊԿ գլխավոր քարտուղարի թեկնածությունը քննարկվելու է:
«Ի վերջո, այս պահին քվոտան պատկանում է ՀՀ-ին, և վերլուծական շրջանակներից տպավորություն կա, որ կամ ՀՀ-ի կողմից ներկայացուցիչ չի ներկայացվելու, կամ այդ հնարավոր թեկնածությունը չի հաստատվելու»,- նշեց պատգամավորը։
Կարեն Նազարյանը պատասխանեց, որ ՀԱՊԿ քարտուղարությունը տարածել է հայտարարություն արդեն նախկին գլխավոր քարտուղար Յուրի Խաչատուրովի ժամանակավոր փոխարինման մասին, և նշեց, որ ՀԱՊԿ գլխավոր քարտուղարի նշանակման հարցը քննարկվում է քաղաքական անվտանգության խորհրդի կողմից, արտաքին գործերի նախարարների խորհրդի առաջարկությամբ:
«ՀԱՊԿ գլխավոր քարտուղարի փոփոխման հարցը որևէ կերպ կարգավորված չէ, և հենց դրան են ուղղված այն խորհրդակցությունները, որոնք այս պահին ընթանում են: Դեռևս այսքանը, և ես չէի ցանկանա կանխատեսել ամսի 8-ի որոշումը, նիստը փակ է, սպասենք, տեսնենք՝ ինչ կորոշվի»,- ավելացրեց նա:
ԱԺ «Ծառուկյան» խմբակցության պատգամավոր Միքայել Մելքումյանն էլ հետաքրքրվեց, թե առաջիկա տասը տարում հնարավո՞ր է սկսվի Իրան-Հայաստան երկաթուղու նախագիծը։
Ի պատասխան փոխնախարարի պաշտոնակատարը նշեց, որ իրենք այս պահին ուշադրությամբ հետևում են Իրանի ուղղությամբ տեղի ունեցող բոլոր զարգացումներին։
«Մեզ համար դա կենսական խնդիր է, և մենք մշտապես կապի մեջ ենք մեր իրանցի գործընկերների հետ։ Հստակորեն ներկայացնում ենք մեր մտահոգությունները՝ ստեղծված իրավիճակի առնչությամբ և փորձում ենք բաց տեքստով խոսել բոլոր զգայուն հարցերի մասին։ Ես հույս ունեմ, որ թափանցիկ գնահատումների արդյունքում կունենանք մի իրավիճակ, որը որևէ կերպ չի սպառնա Իրանի հետ փոխգործակցությանը»,- ասաց փոխնախարարի պաշտոնակատարը։
Վերադառնալով Իրան-Հայաստան երկաթուղու թեմային՝ Կարեն Նազարյանը նշեց, որ չի կարող ասել՝ այն երբ կկառուցվի, սակայն շեշտեց, որ հարցն օրակարգային է, և ինքը չի կարծում, որ այն ամբողջովին դուրս է եկել երկկողմ հարաբերությունների օրակարգից։
«Հարցը մասնագետների դաշտում է, որովհետև խոսքը գնում է բարդ և համապարփակ հաշվարկների մասին»,- ասաց նա։
Լրահոս
Տեսանյութեր
Ուղեվարձերի գումարի ավելացման վերաբերյալ քաղաքապետարանի հրապարակած թվերը ծիծաղելի են ու ամոթալի. Բաբկեն Պիպոյան
