Ձեր վստահելի աղբյուրը

«Սամցխե-Ջավախքի Մեդիա Վերլուծական Կենտրոն» հասարակական կազմակերպությունը նախօրեին դիմել է Ախալցխայի շրջանային ժողովին քաղաքի փողոցներից մեկը անվանակոչել աշխարհահռչակ շանսոնյե Շառլ Ազնավուրի անունով: akhaltskha.net -ի հաղորդմամբ, դիմումում գրված է. 

«Պարոն Գելա,

Ինչպես հայտնի է 2005 թվականին ք. Ախալցխայի սակրեբուլոն Շառլ Ազնավուրին շնորհեց պատվավոր քաղաքացու կոչում, իսկ 2012-ին նա մասնակցեց Ախալցխայի Ռաբաթ բերդի բացման արարողությանը, որի ընթացքում բացվեց նրա անվան աստղը:

2018 թվի հոկտեմբերի 1-ին ծագումով հայ ֆրանսիացի երգիչը հեռացավ կյանքից: Նա արմատներով Սամցխե-Ջավախքի Ախալցխա քաղաքից էր:

2018 թվականի հոկտեմբերի 31-ին Ախալքալաքի սակրեբուլոն ի պատիվ  Շառլ Ազնավուրի փողոցներից մեկը անվանակոչեց նրա անունով:

Ողջունել կլիներ, որ ք. Ախալցխայի շրջանի սակրեբուլոն քննարկեր վերոնշյալ  հարցը և ի պատիվ  Շառլ Ազնավուրի ք. Ախալցխայի փողոցներից մեկը կանվանակոչի նրա անունով:

Կարծում ենք, որ դա կնպաստեր զբոսաշրջության զարգացմանը, ինչպես նաեւ Շառլ Ազնավուրի անվան հավերժացմանը»:

Հիշեցնենք, որ ավելի վաղ Վրաստանի խորհրդարանի պատգամավոր Գիորգի Կոպաձեն խոստացել էր, որ քաղաքապետարանում պատգամավորների հետ միասին առաջ է քաշելու այն հարցը, որ Ախալցխայում Շառլ Ազնավուրի անունով փողոց անվանվի։

Շառլ Ազնավուրը ծնվել է 1924 թվականի մայիսի 22-ին Փարիզի Սեն Ժերմեն դե Պրե թաղամասում, հայ գաղթականներ Միշա և Քնար Ազնավուրյանների ընտանիքում։ Ծննդյան անունը՝ Շահնուր Վաղինակ Ազնավուրյան: Ազնավուրի հայրը ծնվել էր Ախալցխայում, արմատներով Էրզրումից էր, իսկ մայրը՝ Քնար Բաղդասարյանը, Իզմիրից էր, Հայոց ցեղասպանության ականատես փրկվածներից: Շառլի հայրը երիտասարդ տարիներին ապրել էր Թբիլիսիում, ուր աշխատանքի համար տեղափոխվել էր նրա ընտանիքը (Շառլի պապը Թբիլիսիի գլխավոր կառավարչի անձնական խոհարարն էր)։

Ազնավուրը իր կյանքի ընթացքում երկու անգամ այցելել է Ախալցխա։ Առաջի այցը տեղի է ունեցել 2005թ, որի ժամանակ Ազնավուրը այցելել է հայկական դպրոց և տեսել  նրա անվան տեղադրված աղբյուրը (հեղինակ Ալեքսանդր Իգիթխանյան), որի վրա թողել է իր ստորագրությունը։ Իսկ երկրորդ այցելությունը Ախալցխա 2012 թվականին էր, երբ նա մասնակցել է Ռաբաթի բերդի բացման արարողությանը և համերգ տվել բերդի համալիրում։ Նրա պատվին այն ժամանակ Ռաբաթի բերդի տարածքում բացվել է աստղ։

Լեգենդար շանսոնյե Շառլ Ազնավուրը կյաքից հեռացել է 94 տարեկանում, 2018թ.-ի հոկտեմբերի 1-ին:  Նա հուղարկավորվել է ընտանեկան գերեզմանատանը` Փարիզից ոչ հեռու գտնվող Մոնֆոր-լ’Ամորիում։