Ձեր վստահելի աղբյուրը

Իրանի հանդեպ պատժամիջոցները Հայաստանում ռիսկային միջավայր են ձևավորում։ Իրանի դեմ պատժամիջոցների և Հայաստանի համար հետևանքների թեմայով այսօր տեղի ունեցած քննարկման ժամանակ տեսակետ հայտնեց ԵՊՀ իրանագիտության ամբիոնի վարիչ իրանագետ Վարդան Ոսկանյանը։

«Ես չեմ ցանկանա օգտագործել վախի մթնոլորտ բառակապակցությունը, բայց այդուհանդերձ, մեր գործարար շրջանակներում անհանգստությունը կարող է որոշակիորեն վնասել տնտեսական տիրույթին։ Ինչ վերաբերում է քաղաքական հատվածին, ապա ես չեմ կարծում, որ Հայաստանը պետք է հետքայլ կատարի Իրանի հետ հարաբերություններում՝ հաշվի առնելով մեր ազգային և պետական շահերը։ Դա կոպտագույն սխալ կլինի։ Մեր քաղաքական վերնախավում և հասարակության ներսում այս ընկալումը կա»,- նշեց բանախոսը։

Նրա խոսքով,  ներկա գործընթացներում Հայաստանը կարող է ներկայանալ մի երկիր, որը չի պատրաստվում ԱՄՆ-ի պատժամիջոցների հետևանքով խաթարել Իրանի հետ հարաբերությունները։

Քննարկմանը ներկա, Միջազգային իրավունքի և միջազգային հարաբերությունների մասնագետ Սուրեն Սարգսյանն իր հերթին նկատեց, որ ԱՄՆ նախագահ Դոնալդ Թրամփի վարչակազմն ամենաիսրայելամետն է, ինչով էլ կարելի է  բացատրել Իրանի հետ ԱՄՆ-ի հարաբերությունները։

«ԱՄՆ-ում, բնականաբար, կա ընկալում, որ մենք բարդ աշխարհագրական դիրքում ենք, բայց միաժամանակ նրանք պնդում են, որ որքան հնարավոր է՝ ճզմելու են Իրանին։ Դեմոկրատները փորձում էին ատամներով պահել Իրանի հետ համաձայնագիրը։ Այն Օբամայի կարևորագույն արտաքին քաղաքական ձեռքբերումն էր համարվում։ Սրան հակառակ՝ Սենատում լուրջ շանսեր ունեն հանրապետականները, այնպես  որ, Թրամփի թիմը մեծ հնարավորություններ ունի»,- ասաց բանախոսը։

Ինչ վերաբերում է արտաքին գործերի նախկին փոխնախարար, արտակարգ և լիազոր դեսպան Արման Նավասարդյանին, ապա վերջինիս կարծիքով, այնքան էլ հեշտ չէ ստիպել Հայաստանի՝ վերանայելու Իրանի հետ հարաբերությունները։

«Եթե տնտեսական հարցերում մենք կարիք ունենանք մանևրելու, ապա քաղաքական մասով բացարձակապես չպետք է փոխենք Իրանի հետ մեր հարաբերությունները։ Իրանը մնում է  Իրան՝ մանավանդ հաշվի առնելով այսօրվա քաղաքական իրողությունները։ Թե ինչի կհասնի ԱՄՆ-ը Իրանի հարցով, դժվար է ասել։ Ինձ համար դրված է քաղաքական համագործակցության և հարաբերությունների հարցը։ Այստեղ մեր դիվանագիտությունը պետք է լինի ճկուն, շրջահայաց և շատ նախաձեռնող»,- համոզմունք հայտնեց Արման Նավասարդյանը։

Տնտեսագետ Ատոմ Մարգարյանն էլ ուշադրություն հրավիրեց այն հանգամանքի վրա, որ Հայաստանի տնտեսության ապամոնոպոլացումը, մրցակցային պայմանների ստեղծումն իրանական ուղղությամբ կաշխուժացնի տնտեսական կապերը և ներդրումային նոր հնարավորություններ կստեղծեն՝ հատկաապես Մեղրու ազատ տնտեսական գոտու շահագործման դինամիկայի առումով։

«Ընդհանուր առմամբ տպավորությունն այս պահին պոզիտիվ չէ, և իրանական տնտեսության վերաբերյալ կանխատեսուները բացասական են»,- եզրափակեց նա։