Ձեր վստահելի աղբյուրը

«Հանցանք կատարած անձը պետք է պատասխան տա օրենքի առջև։ Ես կիսում եմ զոհվածների հարազատների մտահոգությունը»,- այսօր խորհրդարանում լրագրողների հետ ճեպազրույցում ասաց ՀՀ ոստիկանապետի պաշտոնակատար Վալերիյ Օսիպյանը՝ պատասխանելով այն հարցին, թե դե՞մ է համաներմանը, քանի որ դրան դեմ են արտահայտվել, օրինակ «Սասնա ծռերի» կողմից ՊՊԾ գնդի գրավման ժամանակ զոհվածների հարազատները։

«Մենք կորցրել ենք ընկերներ, մենք կորցրել ենք մեր լավագույններին, և այս պահի դրությամբ համաներման տեքստում նշված է, որ  պետք է հաշվի առնվի պատանդների կարծիքը։ Ես կողմ եմ դրան, այո իմ և մյուս պատանդների կարծիքը հաշվի առնվի», - ասաց Վալերիյ Օսիպյանը։

Դիտարկմանը, որ «Սասնա ծռերի» անդամ Պավլիկ Մանուկյանը պնդում է՝ Օսիպյանն այդ օրերին պատանդ չի եղել, պարզապես մնացել է ներսում, իրենց հետ «կերել-խմել», ոստիկանապետի պաշտոնակատարը պատասխանեց. «Էլ բան ու գործ չունե՞ի, 7-8 օր մնացել եմ էնտեղ՝ գործերս թողած»։

Նա նաև հիշեցրեց, որ համաներման վերաբերյալ իր կարծիքն արտահայտել է Կառավարության դռնփակ նիստի ժամանակ։

«Ես բավարարված եմ համաներման տեքստով», - շեշտեց Օսիպյանը։

«Միանշանակ ռիսկեր կան, որ համաներումից հետո մենք կունենանք կրկնահանցագործություններ, բայց ես ողջունում եմ համաներումը, դա մարդասիրական մոտեցում է։ Չեմ բացառում նաև, որ շատերն ուղղվել են», - հույս հայտնեց Վալերիյ Օսիպյանը։

Անդրադառնալով մոտալուտ ընտրությունների թեմային՝ ոստիկանապետի պաշտոնակատարը երաշխավորեց, որ ընտրակաշառք չի բաժանվելու. «Մեզ համար օրենքի առաջ բոլորը հավասար են։ Կանոկրետ երեկ էլ կաշառակերության բացահայտման դեպք ենք ունեցել»։

Լրագրողներն Օսիպյանից հետաքրքրվեցին՝ հնարավո՞ր է, որ հանդես գան զենքի պահման սահմանափակման օրենսդրական նախաձեռնությամբ։ Վերջինս նման հնարավորությունը չբացառեց՝ միաժամանակ հավելելով, որ վարչապետի պաշտոնակատարի հանձնարարականով իրենք ստուգում են անվանական զենքերի օրինականությունը։

Ինչ վերաբերում է ոստիկանության համակարգում  ցածր աշխատավարձերին և արտահոսքերին՝ Վալերիյ Օսիպյանը հերքեց՝ համակարգից զանգվածային արտահոսք չկա։

«Ինչքան դուրս են գալիս, այդքան էլ ցանկություն ունեն վերականգնվելու։ Ինչ վերաբերում է աշխատավարձերին, ապա դրանք իսկապես ցածր են, բայց չբացառենք, որ կարող են բարձրանալ»,- նշեց նա՝ առանձնակի շեշտելով, որ շատ լավ է աշխատում ճանապարհային ոստիկանությունը։

«Միայն սեպտեմբերին Հայաստանում ավելացել է 6 հազար տրանսպորտային միջոց, հունվարից մինչև հիմա 60 հազար մեքենա է ներկրվել, մեքենաների քանակն ավելացել է, իսկ փողոցներում ու խաչմերուկներում վերահսկելի վիճակ է»,- ամփոփեց ոստիկանապետի պաշտոնակատարը։