Ձեր վստահելի աղբյուրը

Արարատի մարզպետ Գարիկ Սարգսյանը կմասնակցի ԱԺ արտահերթ ընտրություններին ։ Այս մասին այսօր խորհրդարանում լրագրողների հետ ճեպազրույցում հաստատեց Սարգսյանը՝ նշելով. «Իհարկե մասնակցելու եմ, ներկայացնելու եմ «Իմ քայլը» դաշինքը, առաջադրվելու եմ ռեյտինգային ընտրակարգով Արարատի մարզում»։

Խոսելով մրցակցությունից, նա ասաց, որ դեռ չգիտի ովքեր են լինելու իր մրցակիցները. «Միանշանակ մրցակցություն է լինելու, քարոզարշավ է լինելու, ընտրությունն ինքնին մրցակցություն է, ոչ թե անձերի դեմ պայքար է, այլ գաղափարների պայքար է։ Այս ընտրությունները ցույց կտա՝ ով ինչ ռեյտինգ ունի»։

Լրագրողների մեկ այլ հարցին, թե իրենց մարզում ձայները գալու են Նիկոլ Փաշինյանի ռեյտինգի հաշվի՞ն, թե՞ իրենց, ինչին ի պատասխան նա ասաց. «Ռեյտինգի մասով գնահատականը կտա ժողովուրդը, թող լինեն ընտրություններ, բոլորին պարզ կլինի թե դաշինքն ինչ ռեյտինգ ունի, առանձին առաջադրված թեկանծուները՝ ինչ։ Միանշանակ Նիկոլ Փաշինյանի ռեյտինգին ոչ մի ռեյտինգային թեկանծու չի կարող հասնել»։

Լրագրողի ճշտող հարցին, թե բոլորի հույսը Փաշինյա՞նն է, նա ասաց. «Ոչ, բոլորիս հույսը մեր աշխատանքն է, քարոզարշավը»։