Ձեր վստահելի աղբյուրը

Հայաստանը միակ երկիրն է աշխարհում, որտեղ դեղերը դրոշմապիտակավորում են: Այս մասին այսօր լրագրողների հետ հանդիպման ժամանակ ասաց Հայաստանի դեղարտադրողների և ներմուծողների միության նախագահ Սամվել Զաքարյանն՝ անդրադառնալով «Առևտրի և ծառայությունների մասին» օրենքով՝ դեղորայքի պարտադիր դրոշմավորմանը:

Նրա խոսքով՝ այս «տխրահռչակ» օրենքով, որն ընդունվել է 2014 թ-ին, դեղերը հավասարեցվել են օճառին, շամպունին ու լվացքի այլ պարագաներին:

«Այդ կարգն ընդունվել է նախորդ կառավարության կողմից, երկար ժամանակ պայքարել ենք, փաստեր ենք բերել, որ դա անիմաստ է, մեզ ասացին, որ փորձնական թող մնա: Սակայն անցել է 4 տարի և այն դեռ գործում է: ՊԵԿ-ին նամակ ենք ուղարկում, թե դեղերի դրոշմապիտակների մասին որոշումն ընդունելուց հետո ստվերային շրջանառությունը որքանով է կրճատվել, սակայն  լոգիկային մոտ պատասխան չենք ստացել»,- ասաց Միության նախագահը:

Նշենք, որ 2014 թ-ի նոյեմբերի 1-ից Հայաստանում ներդրվել են դեղերի համար պարտադիր վերահսկիչ դրոշմապիտակները, որոնք  պետք է կրճատեին ստվերային շրջանառությունը:

Սամվել Զաքարյանը այս կարգն անիմաստ է համարում,  քանի որ  ի տարբերություն այլ ապրանքների, որոնք Հայաստան ներկրվելով մաքսակետում ստուգվում են ընդամենը մեկ անգամ, դեղերը ստուգվում են երեք անգամ՝ մաքսային ծառայության, առողջապահության նախարարության և առողջապահության նախարարության փորձագիտական կենտրոնի կողմից: Մինչև վերջին հաբը, սրվակը մաքսակետում գրանցվում է: Նույն ձևով փորձաքննություն անցնում են  տեղական արտադրության դեղերը: Բացի այդ, ըստ նրա, այս որոշումով  խախտվել են ԱՀԿ-ի կողմից մշակված բոլոր ստանդարտները. «Արդեն չորս տարի է արտադրողին աշխատատեղեր ստեղծելու հնարավորություն չի տրվում՝ հավելյալ ծախսերի պատճառով»: 

Նրա խոսքով՝ բազմիցս այս հարցը բարձրացրել են, սակայն  Առողջապահության նախարարությունը որևէ  քննարկում դրա վերաբերյալ չի անցկացրել: 

Միության հաշվարկների համաձայն, դրոշմապիտակները հանգեցնում են դեղերի  3-5 տոկոսի  թանկացման:

«Ամեն ինչ անում են, որ մարդիկ թանկ դեղեր գնեն: Նույնիսկ, կառավարության այն պնդումները, թե  դեղերի շրջանառության մեջ 20% ստվերը դրանով կկրճատվի, այդ 20%-ը ստվերից հանելը բյուջեին տարեկան շուրջ 4 մլն դոլար կբերի, այնինչ պետությունը դրոշմապիտակների վրա տարեկան ավելի քան 1 մլն 200 հազար դոլար է ծախսում: Այսինքն՝ պետական բյուջեի տեսանկյունից դա անիմաստ ծախս է», - նշեց Սամվել Զաքարյանը: 

Դեղարտադրողների համար հաջորդ խոչընդոտը վերաբերում է արտասահմանից դեղահումքերի Հայաստան ներմուծելու համար սահմանված 20 տոկոս ավելացված արժեքի հարկին (ԱԱՀ):

«ԱՊՀ երկրներից միակն ենք, որ նման հարկ ունի: Միայն վերջերս է Ռուսաստանն այդ հարկը սահմանել, որը կազմում է 12 տոկոս, իսկ, օրինակ, Վրաստանում, Ադրբեջանում, որտեղ զրո ԱԱՀ է, դեղերը երկու-երեք անգամ ավելի էժան են»,- հայտնեց Միության ղեկավարը:

Ըստ նրա՝ ստեղծված իրավիճակը լուրջ խնդիրներ է ստեղծել դեղարտադրողների համար: Նրա խոսքով՝ նախկին կառավարությունների հետ այս ուղղությամբ քննարկումներ են եղել, պարզաբանել են՝ եթե ԱԱՀ-ն իջեցնեն, ապա մասնավոր հատվածը գները չի նվազեցնի և կշարունակի գերշահույթ ստանալ:  Մինչդեռ, ըստ Սամվել Զաքարյանի, խոշոր արտադրողներն ու ներմուծողները հավաստիացրել են՝ 20 տոկոս ԱԱՀ-ի չեղարկման պարագայում զգալի կնվազեցնեն և ավելի մատչելի կդարձնեն դեղերի գները:

Նա նաև հիշեցրեց, որ նախորդ տարի ԱԺ «Ելք» խմբակցությունը՝ Նիկոլ Փաշինյանի ղեկավարությամբ, շրջանառության մեջ էր դրել ՀՀ-ում վաճառվող դեղերը ավելացված արժեքի հարկից ազատելու վերաբերյալ օրենսդրական նախագիծ: «Հիմա մեր հարգարժան նախարարը ե՞րբ պետք է որոշում ընդունի: Չգիտես ինչու նա զբաղված է նախկին կառավարության օրենքներն իրականացնելով, այսինքն՝ ամեն ինչով, բացի նրանից, ինչը պետք է մեր հասարակությանը: Սոցիալական ամենամեծ քայլ կլինի այն, որ 20 տոկոսով նվազի դեղերի գինը: Եթե սոցիալական երկիր ենք համարվում, առաջինը պետք է լինի այս քայլը: Հորդորում ենք և վարչապետին, և նախարարին հետամուտ լինել ժամանակին իրենց կողմից առաջարկված նախագծին»,- ասաց Սամվել Զաքարյանը: