Ձեր վստահելի աղբյուրը

«Մեր երկու ուժերն էլ միանշանակ  երկրում տեղի ունեցած փոփոխությունների ու հեղափոխության կողմնակից են եղել, սակայն քաղաքական դաշտում տեղի են ունենում փոփոխություններ և այդ փոփոխություններին զուգահեռ պետք է արվեն քայլեր»,- այսօր «Մենք» դաշինքի ձևավորման մասին հուշագրի ստորագրումից հետո իր ելույթում հայտնեց «Հանրապետություն» կուսակցության ղեկավար Արամ Սարգսյանը։

Նա նշեց, որ անցած վեց ամիսների ընթացքը վերլուծելով՝ իրենք հասկանում են, որ ոլորտում կան թերացումներ և «Մենք»-ը հակված է լրացնելու այդ բացը:

«Առաջին հանգամանքը, ինչի համար միավորվել ենք, արտաքին քաղաքական հարթակում եվրոպական արժեքներ կրելն է, երկրորդը՝ քաղաքական դաշտում տեղի ունեցող գործընթացներին մասնակցության դիվերսիֆիկացիային է վերաբերում:  Այո, հեղափոխությունն արեց  Նիկոլ Փաշինյանը, փառք ու պատիվ իրեն, բայց Նիկոլ Փաշինյանն ինքն էլ պնդում է, որ հեղափոխությունը արել է ողջ հայ ժողովուրդը՝ Նիկոլ Փաշինյանի գլխավորությամբ, բայց դա չի նշանակում, որ քաղաքական դաշտում պետք է լինեն միայն Նիկոլ Փաշինյանի  կողմնակիցներն ու «Քաղաքացիական պայմանագիր» կուսակցության կողմնակիցները, բնականաբար, հասկանալի է, որ մեծամասնությունը իրենք են լինելու»,-ասաց Արամ Սարգսյանը:

Նրա խոսքով՝ իրենք չեն լինելու այն ուժը, որը սպասելու է, որ իշխանությունը սխալներ գործի, իրենք ուրախանան և քննադատեն իշխանությանը, իրենք գործելու են այնպես, որ կանխեն իշխանության սխալները:

«Ազատ դեմոկրատներ» կուսակցության նախագահ Խաչատուր Քոքոբելյանն էլ նշեց, որ ստեղծված «Մենք» դաշինքը զուտ տեխնիկական չէ,  իրենք համախմբել են՝ ունենալով ընդհանուր գաղափարներ:

«Մի կարևոր փաստ կնշեմ. նախ՝ միասին ավելին կարող ենք անել: Բացի այն, որ Արամ Սարգսյանը թիմակիցների հետ երբևիցե չի դավաճանել իր սկզբունքը, նույնը «Ազատ դեմոկրատների» դեպքում է, ես  20 տարվա ընդդիմադիր դաշտում փորձ ունեցող մարդ եմ։ Չունենք մարդ, ով միշտ իր սկզբունքների հետևից չի գնացել և չի առաջնորդվել հանուն ՀՀ քաղաքացու և Հայաստանի Հանրապետության»,-ասաց նա:

Քոքոբելյանի խոսքով՝ իրենք հավակնում են լինելու  գլխավոր ընդդիմախոսն այսօրվա իշխանության, այլ ոչ թե գրպանային ընդդիմություն, որպիսիք հայտնվում են ընտրություններից հետո։

Լրագրողների հարցին, թե ո՞րն է գրպանային ընդիմությունը և ո՞ր ուժերն են այդպիսիք, նա պատասխանեց. «Գրպանային ընդդիմությունն այն է, որ ժողովրդին այլ բան են ասել, արել՝ մեկ այլ բան, օրինակ՝ առանցքային ճակատագրական հարցերի քվեարկություններում նրանք դրսևորվել են ճիշտ այնպես, ինչպես ՀՀԿ-ն ցանկացել է»։

Անդրադառնալով այն հարցին, թե արդյոք Արամ Սարգսյանին և նրա «Հանրապետություն» կուսակցությանը վերբերո՞ւմ է ՀՀԿ-ի կողմից արված ակնարակիները, թե կլինեն գրպանային ընդդիմություն,  Քոքոբելյանը նշեց. «ՀՀԿ-ի կողմից չեմ լսել որևիցե մեղադրանք Արամ Սարգսյանի և նրա կուսակցության նկատմամբ, որ գրպանային են: Որոշ ուժերի մասին լսել եմ, երբեմն համաձայն եմ, որովհետև իրենք հո գիտեն, թե ով է իրենց ղեկավարը և լավ գիտեն, թե հարցն ինչու է ուղղել ՀՀԿ-ն, որովհետև հստակ կրիտիկական վիճակում են գտնվում»։