Ձեր վստահելի աղբյուրը

«Եթե այնուամենայնիվ Վանաձորի ինֆեկցիոն հիվանդանոցը տեղափոխեն նորակառույց Բժշկական կենտրոնում նախատեսված բաժանմունք, մենք ուղղակի չենք գնա այնտեղ։ Մենք որևէ մեկի ձեռքին գործիք լինել չենք կարող, մենք ունենք շատ առանձին, ուրույն մոտեցումներ։ Բազմաթիվ ֆորմացիաներ են եկել ու գնացել, որևէ մեկը մեզ չի կարողացել օգտագործի»,-լրագրողների հետ զրույցում հայտարարեց Վանաձորի ինֆեկցիոն հիվանդանոցի տնօրեն Ռոբերտ Չիլինգարյանը, ով իր կոլեկտիվի և մի շարք վանաձորցիների հետ նոյեմբերի 10-ին վանաձորի մարզպետարանի դիմաց հանդիպում էր պահանջում ՀՀ առողջապահության նախարար Արսեն Թորոսյանի հետ։

Նրանք բողոքում էին գործադիրի որոշած նախագծի դեմ, ըստ որի՝ նախատեսվում է փակել Վանաձորի ինֆեկցիոն հիվանդանոցն ու անձնակազմը տեղափոխել նորակառույց բժշկական կենտրոնում գտնվող ինֆեկցիոն բաժանմունք։

«Այսօր բոլորիս հիմնական մտահոգության առարկան առաջարկվող բաժանմունքում հիվանդների մահճակալների թիվն է․ 15-ը շատ քիչ է․ հավանաբար թիվը որոշել են՝ ելնելով այս պահին Ինֆեկցիոն հիվանդանոցում բուժվող հիվանդների թվից, բայց ինչու՞ չեն ուսումնասիրել հուլիս-օգոստոս ամիսներին վիճակագրությունը, երբ հիվանդանոցում կար հարյուր և ավելի հիվանդ։ Աստված մի արասցե, եթե բռնկում լինի, ի՞նչ ենք ասելու հիվանդներին, ասելու ենք՝ գնացեք, էլ տեղ չկա՞»,-ստեղծված իրավիճակի մասին կարծիք հայտնեց հիվանդանոցի բուժքույրերից մեկը։

Մարզպետարանի մոտ հավաքված վանաձորցիները ևս արտահայտվում էին ինֆեկցիոն հիվանդանոցը նորակառույց բժշկական կենտրոնին միացնելու դեմ։ Ըստ նրանց՝ գործող ինֆեկցիոն հիվանդանոցը բավարարում է հիգիենիկ ու մասնագիտական բոլոր պահանջներին, իսկ բուժկենտրոնի հզորությունները չեն բավարարում մեծ թվով հիվանդներ ընդունելու և սպասարկելու համար։

«Ժամանակին մարդիկ ճիշտ են գնահատել իրավիճակն ու հասկացել են, որ Ինֆեկցիոն հիվանդանոցը պետք է առանձին կառուցվի՝ ընդհանուր հիվանդանոցից հեռու։ Մենք տարիներ առաջ ենք ունեցել խոլերայի բռնկում Հայաստանում, բայց ո՞վ ասեց, թե նման դեպքեր էլ չեն լինելու։

Այդպիսի հիվանդությունների դեպքում հայտարարվում է կարանտին, զորքը փակում է ինֆեկցիոն հիվանդանոց տանող ճանապարհները, մեկուսացնում է, իսկ եթե ինֆեկցիոնը լինի մնացած բաժանմունքների հետ նույն շենքում, կստացվի, որ հիվանդանոցը կարանտինի բերումով ուղղակի կփակվի ու դժվար է ասել, թե քանի օրով։ Մարդիկ դա հասկացել են, որ միլիոնավոր դրամներ գումար ներդրեցին հիվանդանոց տանող ճանապարհի վերանորոգման մեջ, ինֆեկցիոն հիվանդանոցը պետք է լինի բնակավայրից կտրված, այն տեղում, որտեղ ժամանակին սարքվել է։

Այսօր մենք տեղյակ ենք, որ Երևանի ինֆեկցիոն հիվանդանոցի տնօրենը գաղափար չունի, թե ինչ է կատարվում այստեղ, մեր հիվանդանոցի 40 տարվա տնօրենը, ով նաև մարզի գլխավոր ինֆեկցիոնիստն է, չի տեղեկացվել, նրա հետ չի քննարկվել այս որոշումը»,-լրագրողների հետ զրույցում նշեց Վանաձորի ինֆեկցիոն հիվանդանոցի լաբորանտ Արմինե Պողոսյանը։

Նախօրեին հիվանդանոցի կոլեկտիվը խնդրի շուրջ հանդիպում էր ունեցել Լոռու մարզպետ Անդրեյ Ղուկասյանի հետ: «Մեզ հետ հանդիպման ժամանակ մարզպետն ասաց, թե ինֆեկցիոն հիվանդանոցը փակելու որոշումը դեռ վերջնական չի, այն ընդամենը նախագիծ է, սակայն մարզպետի հետ խոսակցությունը մեզ հույս չներշնչեց, նա ավելի շուտ հասկացրեց, որ եթե ամեն մի աշխատող դժգոհ է որևէ որոշումից, ապա ի՞նչ է, մենք պետք է հաշվի՞ նստենք բոլորի հետ»,-լրագրողների հետ զրույցում ասաց ինֆեկցիոն հիվանդանոցի գլխավոր բուժքույր Սոնյա Հովհաննիսյանը։