Ձեր վստահելի աղբյուրը

««Հայաստանի Հանրապետական» կուսակցությունն այսօր շատ հետաքրքիր ու շատ կարևոր գործընթացի միջով է անցնում՝ կարգավիճակի տրանսֆորմացիա»,- ՀՀԿ խորհրդի նիստից հետո լրագրողների հետ հանդիպմանն ասաց «Հանրապետական» կուսակցության նախագահի առաջին տեղակալ Վիգեն Սարգսյանը։

Նա նշեց, որ երկար տարիներ իշխանություն լինելուց հետո կուսակցությունը  նոր կարգավիճակով իր ներդրումը բերելու ուղիներն է որոնում՝ ընդդիմադիր ուժ լինելու և որպես ընդդիմադիր ուժ կուսակցությունում կուտակած գիտելիքը, փորձը, թիմը երկրի հետագա առաջընթացի համար օգտագործելու հնարավորություն ուսումնասիրությունը։ Վ. Սարգսյանն ասաց, որ հետխորհրդային և արևելյան Եվրոպայի երկրների  մեջ քիչ է հիշում օրինակներ, երբ այդ տրանսֆորմացին չի տվել իր արդյունքները։ 

«Որևէ կուսակցություն չի կարող և չպետք միշտ լինել իշխանություն։ Բոլոր իմ գործընկերներին, ինձ շատ հաճախ բարին ցանկացողները խորհուրդ են տվել՝ «գիտե՞ք շատ լավ կլինի, եթե դուք ձեր փորձով առանձնանաք, մի նոր բան ստեղծեք, ժողովուրդը ձեզ կվստահի, կհավատա»։ Մեր թիմը քաղաքական թիմ է, բավականին ամուր թիմ է, որը կարող է դիմակայել բարդ զարգացումներին, իրավիճակներին և գոնե այն մարդիկ, ովքեր քաղաքական կորիզն են կազմում կուսակցության ու առաջիկա ընտրություններին լինելու են նաև մեր ցուցակի առանցքում, եղել են կուսակցության ակտիվում ոչ այն պատճառով, որ այն եղել է իշխանություն։ Համարել ենք, որ ՀՀԿ-ն ունի առաքելություն, ունի գաղափարական օրակարգ, որն այսօր էլ ավելի է պահանջված, քան երբևէ», - ասաց Վ. Սարգսյանը։

Առաջիկա ընտրությունների մասին խոսելով՝  նա նշեց, որ դրանք չափազանց արագացված են, որը խաթարում է քաղաքական գործընթացները, որը թույլ չի տվել բազմաթիվ քաղաքական ուժերի վերադասավորվել, պլանավորել իրենց մասնակցությունն ավելի տրամաբանական ու խելամիտ ձևով։

Ինչ վերաբերում է Ընտրական օրենսգրքին, Վ. Սարգսյանն ասաց, որ ունեին շատ լուրջ վերապահում. «Այն ժամանակացույցը, որ առաջարակվեց՝ ընտրություններ, ընտրություններից մեկ ամիս առաջ օրենսգրքի խորքային վերանայում, օրենսգրքի միջազգային փորձաքննության բացակայություն, խորհրդարանական ձևաչափի  բացարձակ արհամարհում նախագիծը պատրաստելու ընթացքում, թույլ չտվեցին  լուրջ վերաբերել ընտրական օրենսգրքի վերանայմանը»։

Նրա խոսքով, գնում են ընտրություններին շատ լավ հասկանալով, որ հապճեպության պատճառներից մեկն այն ոգևորությունն է, որ իշխանություն ձևավորող քաղաքական ուժն ունի մի շարք ՏԻՄ ընտրություններից հետո, ցանկություն ունի չկորցնելու այդ բարձր վարկանիշն  ընտրություններին ընդառաջ։

«Մենք հայտ ենք ներկայացնում այս ընտրություններին լինելու հիմնական ընդդիմադիր ուժ։ Կարծում ենք, որ ունենք դրա հնարավորությունը, մեր ռեսուրսը, մեր գիտելիքն ու փորձը դա թույլ են տալիս, գումարած դրան՝ մենք ունենք սկզբունքային հակասություններ գործող իշխանության հետ, որոնք թույլ են տալու ընդդիմադիր ուժի կարգավիճակը լիարժեք օգտագործել ավելի արդյունավետ կառավարում ունենալու համար», - նշեց Վիգեն Սարգսյանը։

Նա ասաց, որ այն վարչապետը, որին հրապարակում հավաքված համաքաղաքացիները մատնանշեցին որպես ժողովրդի թեկնածու, և որին ԱԺ-ն տվեց այդպիսի հնարավորություն, պետք է շարունակի կատարել այդ պարտականությունը, որն ստանձնել է։

«Ինքն ունի ապացուցելու բան, ինքն ունի աշխատանք կատարելու, և մենք որպես ընդդիմություն պատրաստ ենք ապագա խորհրդարանում հավասարակշռել դա՝ պարտադրելով, որ ժողովրդին տրված խոստումները լիարժեք կատարվեն, պարտադրել, որ արտաքին քաղաքականության, Արցախյան հիմնահարցի, երկրի ներքին զարգացման կարևորագույն ուղղությունների, մեր հասարակությանը շատ անհանգստացնող մի շարք ուղղությունների հետ կապված կառավարությունը լիարժեք կատարի իր խոստումները և ծրագրերը։ Դա է մեր նպատակը, մեր օրակարգը։ Մենք գնում ենք ժողովրդի քվե խնդրելու ոչ թե  իշխանություն լինելու, ոչ թե լծակներ ունենալու, ոչ թե արտոնություններ ունենալու, ոչ թե օգտվելու կառավաություն լինելու որևէ կարգավիճակից, այլ գնում ենք քվե խնդրելու  ծանր պատասախանատու բեռ կրելու, ընդդիմություն լինելու, որը ենթադրում է միմիայն ծանր աշխատանք, քրտինք, ջանք և մենք պատվով ուզում ենք այդ գործը կատարել», - ասաց Վիգեն Սարգսյանը։

Նա ընդգծեց, որ խնդրելու են հասարակության քվեն առաջիկա խորհրդարանում  հավասարակշռող ուժ լինելու համար. «Մենք համարում ենք, որ ամենամեծ վստահություն ունեցող իշխանությունը  պետք է ունենա հակակշիռ»։ 

ՀՀԿ ցուցակն առաջիկա արտահերթ խորհրդարանական ընտրություններին կգլխավորի Վիգեն Սարգսյանը։

«Ցուցակը կազմված է լինելու ինչպես մեր կուսակցության անդամ հանդիսացող մեր ընկերներից, այնպես էլ այլ կուսակցություններ ներկայացնող կամ անկուսակցական թեկնածուներից։ Յուրաքանչյուր ոք, ով ընդգրկված է ցուցակում, լինելու է նաև ռեյտինգային թեկնածու»,- ասաց Վ. Սարգսյանը։

Նա ասաց, որ ՀՀ երրորդ նախագահ, ՀՀԿ նախագահ Սերժ Սարգսյանը չի մասնակցի քարոզարշավին,  նախկին վարչապետ Կարեն Կարապետյանը չի լինելու ցուցակում։