Ձեր վստահելի աղբյուրը

Ավելի քան 700 հազար մարդ օնլայն-հերթ է կանգնել վերամիավորված Spice Girls փոփ-խմբի համերգների տոմսեր ձեռք բերելու համար։ ՏԱՍՍ-ը, հղում անելով Press Association-ին, գրում է, որ ամերիկյան Ticketmaster կազմակերպության բրիտանական բաժնի ղեկավար Էնդրյու Փարսոնսն ասել է, որ Միացյալ Թագավորությունում գրանցվել է տոմսերի վաճառքի ծառայության կայքէջի ծանրաբեռնվածության ռեկորդ, քանի որ համերգի տոմս ձեռք բերողները շատ-շատ են։

«Spice Girls-ի պահանջարկը պարզապես  չափից դուրս է եղել»,- ասել է նա՝ հավելելով, որ իրենց կայք  միլիոնավոր մարդիկ են այցելել տոմս փնտրելու համար, ինչ-որ պահի հերթում եղել է 700 հազար մարդ։ Հարյուր հազարավոր տոմսեր վաճառվել են հաշված րոպեների ընթացքում։

«Ըստ էության, այն, ինչ մենք տեսանք, վկայում է, որ նրանք կարող էին տարվա ընթացքում ամեն երեկո համերգ ունենային», -ասել է Փարսոնսը։

Տոմսերը վաճառվում են նոյեմբերի 10-ից։  Վերամիավորված խմբի համերգային շրջագայությունը մեկնարկելու է 2019 թվականի հունիսի 1-ից։ Խումբը ելույթ է ունենալու Լոնդոնում, Մանչեսթրում, Էդինբուրգում և ևս երեք քաղաքում։

Spice Girls  խումբը ստեղծվել է 1994 թվականին, կարիերայի 18 տարիների խմբի երգերը 11 անգամ գլխավորել են հիթ-շքերթները, ավելի քան 40 միլիոն ալբոմ է վաճառվել։