Ձեր վստահելի աղբյուրը

«Ըստ իս՝ պետական բյուջեի նախագիծը ունի մի քանի առանձնահատուկ հանգամանքներ։ Առաջինն այն է, որ պետական բյուջեի կոնստրուկցիան, փիլիսոփայությունը մեծ իմաստով պահպանված է և համապատասխանում է մեր առջև ծառացած մարտահրավերներին»,- այսօր ԱԺ տնտեսական հարցերի հանձնաժողովի նիստի ժամանակ ասաց  հանձնաժողովի նախագահ Խոսրով Հարությունյանը։

«Ամենաէականն այն է, որ պահպանված է հետևյալ թեզը. պետական քաղաքականությամբ նպաստել ընդլայնված ներդրումային քաղաքականություն իրականացնելուն՝ այդ կերպ  հիմք ապահովելով բյուջետային եկամուտների ավելացման համար։ Սա այն նույն փիլիսոփայությունն է, որը որդեգրել և իրականացնում էր նաև նախկին իշխանությունը։ Խորհրդանշական է, որ վարչապետը բյուջեն ներկայացրեց իներցիոն, այսինքն՝ մի բյուջե, որը խարսխված է նախկինում ձևավորված և այսօրվա քաղաքական և տնտեսական ռեալների ադեկվատ որոշումների վրա։

Բայց եթե նոր կառավարությունն ընտրություններից հետո եռանդով չներգրավի բարեփոխումերի մեջ, ապա նույնիսկ 4.9 ՀՆԱ-ն, ըստ իս, կդառնա շատ ռիսկային։ Նոր կառավարությանը սպասվում է լուրջ, հետևողական, այդ թվում՝ բարեփոխումների անընդհատությունն  ապահովող գործունեություն»,- ասաց ՀՀԿ-ական պատգամավորը։

Որպես բյուջեի մյուս առանձնահատկություն՝ Խոսրով Հարությունյանը նշեց, որ առաջին անգամ այն ներկայացվում է ծրագրային բյուջետավորման ձևաչափով։ Սա, ըստ խորհրդարանականի, ԱԺ-ի և կառավարությն համատեղ տարիների աշխատանքի արգասիքն է։

«Համոզված եմ, որ այս ծրագրային բյուջետավորման հետ կապված քաղաքականությունը շատ օգտակար հենք է թե ֆինանսական ռեսուրսների, թե բյուջետային կարգապահության տեսանկյունից»,- ասաց նա։

Հանձնաժողովի բոլոր անդամները բյուջեի նախագիծն ԱԺ լիագումար նիստ անցկացնելու օգտին միաձայն կողմ քվեարկեցին։