Ձեր վստահելի աղբյուրը

«ԵԱՀԿ Մինսկի խմբի համանախագահների կողմից առաջարկ է եղել մինչև տարվա վերջ կազմակերպել Հայաստանի և Ադրբեջանի արտգործնախարարների հանդիպում։ Երբ հանդիպումը հստակեցվի, հանրությունն ըստ կագի այդ մասին կտեղեկացվի»,- այսօր տեղի ունեցած մամուլի ասուլիսի ժամանակ հայտարարեց ԱԳՆ մամուլի խոսնակ Աննա Նաղդալյանը՝ պատասխանելով այն հարցին՝ հնարավո՞ր է, որ դեկտեմբերի 6-ին Միլանում կայանալիք նախարարական խորհրդի 25-րդ նիստում ՀՀ արտգործնախարարի պաշտոնակատար Զոհրաբ Մնացականյանը հանդիպի Ադրբեջանի արտգործնախարար Էլմար Մամեդյարովի հետ։

Լրագրողները նաև հետաքրքրվեցին ամիսներ առաջ ադրբեջական կողմում հայտնված Կարեն Ղազարյանի  ճակատագրով։

«Ի սկզբանե հստակ էր, որ Ադրբեջանի իշխանությունները փորձելու են անհայտ հանգամանքներում Ադրբեջանում հայտնված ՀՀ քաղաքացու ներգրավմամբ թատերական բեմականացում ներկայացնել, նրան ներկայացնել որպես դիվերսանտի։ Բայց նրանց առաջնային սցենարը կարծես թե տապալվեց, քանի որ Կարեն Ղազարյանը հոգեկան խնդիրներ ուներ և բանակում չէր ծառայել։

Նրա նկատմամբ դատական գործընթաց բեմականացնելով՝ ադրբեջանական կողմը փորձում է ծանր մեղադրանքով գործում ներգրավել ակնհայտ առողջական խնդիրներ ունեցող մարդու, որը մարդասիրական միջազգային իրավունքի կոպտագույն խախտում է։ Այս ֆարսը միայն մեկ նպատակ է հետապնդում. առողջական խնդիրներով մարդուն ներկայացնել որպես հանցագործ և որոշակիորեն հավասարության նշան դնել ծանր հանցագործություն իրականացրած դիվերսանտների միջև։

Հիշեցնեմ, որ 2015 թվականին Արցախի դատարանի կողմից դատապարտվել էին երկու ադրբեջանցիներ, որոնք մեղադրվում են սահմանն անօրինական հատելու, զենք կրելու և ատելության պատճառներից ելնելով՝ անչափահասի սպանելու, նրա նկատմամբ բռնություն կիրառելու, իսկ նրանցից մեկը ևս երկու հոգու նկատմամբ սպանության փորձ կատարելու մեջ»,- հիշեցրեց բանախոսը՝ ընդգծելով, որ ԱԳՆ-ի կողմից համապատասխան քայլեր են իրականացվում, օրակարգում է մնում մեր հայրենակցին հայրենիք վերադարձնելու հարցը։

Հաջորդ հարցին՝ ի՞նչ աշխատանքներ են տարվում, որպեսզի Իրանի նկատմամբ պատժամիջոցները Հայաստանին նվազագույն  վնաս հասցնեն, Աննա Նաղդալյանը պատասխանեց.

«Մենք ուշադրությամբ հետևում ենք Իրանի շուրջ առկա զարգացումներին, տրվում են համապատասխան գնահատականներ, դրանց հիման վրա ձեռնարկվելու են համապատասխան քայլեր։ Մենք բաց երկխոսություն ենք վարում գործընթացում ներգրավված բոլոր կողմերի հետ՝ հստակորեն ներկայացնելու մեզ հուզող բոլոր հարցերը և բացատրելու մեր գործողությունների տրամաբանությունը»։

Որևէ տեղեկություն չկա հետաքննության մասին, որը վերաբերում է Գերմանիայում ՀՀ դեսպանին

Լրագրողներն այսօր ԱԳՆ մամուլի խոսնակ Աննա Նաղդալյանին խնդրեցին անդրադառնալ Գերմանիայում ՀՀ դեսպան Աշոտ Սմբատյանի անձի շուրջ զարգացումներին՝ հաշվի առնելով այն հանգամանքը, որ դատարանը որոշում է կայացրել արգելել լրագրողներին անհիմն տեղեկություններ տարածել վերջինիս հասցեին։

Հիշեցնենք, որ Բեռլինի շրջանային դատարանը նոյեմբերի 6-ին դատական արգելք էր սահմանել գերմանական Spiegel-Verlag թերթի և Mitteldeutschen Rundfunk հեռուստառադիոընկերության նկատմամբ՝ արգելելով տարածել Գերմանիայում ՀՀ արտակարգ ու լիազոր դեսպան Աշոտ Սմբատյանի վերաբերյալ մեղադրական հոդվածներ և նյութեր:

Ավելի վաղ այդ լրատվամիջոցները ներկայացրել էին տեղեկատվություն, ըստ որի՝ Գերմանիայի դաշնային ոստիկանությունը շուրջ երեք տարի հետաքննություն է վարել հայկական մաֆիայի անդամներին ձերբակալելու ուղղությամբ, կասկածներ է ունեցել անգամ երկրում Հայաստանի դեսպան Աշոտ Սմբատյանի վերաբերյալ:

Տարիներ շարունակված քննությունը, ըստ «Շպիգել»-ի, եղել է Գերմանիայում հանցավոր խմբավորումների դեմ իրականացված ամենաընդարձակ գործողություններից մեկը: Արդյունքում իրավապահները արձանագրել են, որ Գերմանիայում հայկական մաֆիոզ խմբավորումները խորը արմատներ են գցել ու հզոր ցանց ստեղծել, սակայն կասկածյալներին հնարավոր չի եղել ձերբակալել ապացույցների ու միջոցների անբավարարության պատճառով:

«Մենք ի սկզբանե հայտարարել ենք, որ ԱԳՆ-ը կապ է հաստատել Գերմանիայի պատգամավորների հետ՝ ճշտելու այդ պնդումների արժանահավատությունը։ Մենք հաստատում ենք, որ որևէ տեղեկություն չկա հետաքննության մասին, որը վերաբերում է Գերմանիայում ՀՀ դեսպանին։ Բեռլինի երկրամասային դատարանը, որը համապատասխան վճիռ էր կայացրել, ինչի  արդյունքում Spiegel-Verlag թերթից և Mitteldeutschen Rundfunk հեռուստառադիոընկերությունից հեռացվել էին բոլոր այն ձևակերպումները, որոնք վերաբերում էին ՀՀ դեսպանին, նույնը վերաբերում  է նյութն արտատպած բոլոր լրատվամիջոցներին։ Այս միջադեպը, որն ուղղված էր Բեռլինում ՀՀ դեսպանության բնականոն աշխատանքները խաթարելուն, որևէ ազդեցություն  չի ունեցել»,- ամփոփեց Աննա Նաղդալյանը։