Ձեր վստահելի աղբյուրը

«Բելաջիո» ռեստորանում սննդամթերքի անվտանգության պետական տեսչական մարմնի կողմից ստուգում անցկացնելը նախատեսված է տարեկան ծրագրով։ Տեսչական մարմնից Panorama.am-ին հայտնեցին, որ դեպքը բացառիկ է, քանի որ ռեստորանի բոլոր աշխատակիցները բուժզննության ենթարկված չեն եղել։

Եթե հանրային սննդի այլ օբյեկտներում աշխատակիցներից մեկ-երկուսը ենթարկված չեն եղել պարբերական բուժզննության, ապա այստեղ ոչ նախնական, ոչ էլ պարբերական բուժզննության չեն ենթարկվել 17 աշխատակիցներ, որոնիցից 7-ը խոհարարներ են, մյուսները՝ մատուցողներ ու բարմեն։

Ռեստորանի տնօրենը պնդում է՝ աշխատակիցները բուժզննության ենթարկվել են, սակայն դրա արդյունքում տրված փաստաթղթի ժամկետը մի քանի օր առաջ էր լրացել։

Մինչ պետական մարմինն ու տնտեսվարողը կմեղադրեն միմյանց, Panorama.am-ը փորձեց պարզել, բժշկական ի՞նչ զննության մասին է խոսքը, ի՞նչ պարտադիր պահանջներ կան, որոնք պետք է կատարեն սննդի հետ գործ ունեցող մարդիկ։ Թե պահանջները որքանով են կատարվում, մենք տեսնում ենք առօրյայում, բայց վերահսկող մարմնին դրա մասին ոչ միշտ ենք տեղյակ պահում։

Իրավական տարբեր ակտերով սահմանված են, թե ինչ բուժզննության պետք է ենթարկվեն աշխատակիցները։ Դրանց պարբերականությունն ու բնույթը տարբեր են՝ կախված ոլորտներից։

Ընդհանրապես վաճառողին ներկայացված պահանջները սահմանված են «Առևտրի և ծառայությունների մասին» ՀՀ օրենքի  6-րդ կետով։ Պահանջներից են՝ 

ապրանքը վաճառքի հանելուց առաջ առաջարկվող ապրանքի որակի ստուգումն ըստ արտաքին հատկանիշների
սննդամթերքի վաճառքով զբաղվող առևտրի օբյեկտի աշխատողների աշխատանքային արտահագուստի կրումը
մատակարարման պայմանագրով ապրանքների առուվաճառք (մեծածախ առևտուր) իրականացնելիս վաճառողը (մատակարարը) պարտավոր է իր կողմից բաց թողնված ապրանքի հետ գնորդին (պատվիրատուին) տրամադրել`
ա) օրենքով սահմանված կարգով լրացված հաշվարկային փաստաթուղթ.
բ) օրենքով սահմանված դեպքերում վաճառվող ապրանքների համապատասխանության հավաստագրեր:

Սննդամթերքին հիգիենային ներկայացվող պահանջների տեխնիկական կանոնակարգը հաստատելու մասին կառավարության որոշում կա։ Այստեղ մանրամասնվում են են նաև անձնակազմի հիգիենային ներկայացվող պահանջները։ Ըստ այդմ, սննդամթերքի տեղակայման տարածքում աշխատող յուրաքանչյուր անձ պարտավոր է պահպանել անձնական հիգիենայի կանոնները և կրել համապատասխան մաքուր, անհրաժեշտության դեպքում` պաշտպանիչ հագուստ: Շատ դեպքերում այս պահանջը չի կատարվում։

Իրավական ակտով սննդի շղթայի բոլոր փուլերում արգելվում է սննդամթերքի հետ շփվել, իսկ եթե առկա է սննդամթերքի վրա ուղղակի կամ անուղղակի ազդեցության հավանականություն, սննդամթերքի տեղակայման գոտի մտնել այն անձանց, ովքեր համարվում են սննդամթերքի միջոցով փոխանցվող հիվանդության վիրուսակիր կամ ունեն վարակիչ վերք, մաշկային հիվանդություն, խոց, փորլուծություն կամ այլն:

Բացի այդ, սննդի շղթայի փուլերում ներգրավված սննդամթերքի հետ շփման հավանականություն ունեցող յուրաքանչյուր անձ, նշված հիվանդություններից որևէ մեկով հիվանդ լինելու կամ վարակվածության ախտանիշներ ունենալու դեպքում, պարտավոր է դրա մասին, եթե հնարավոր է նաև դրա առաջացման պատճառների մասին, անհապաղ տեղեկացնել իր վերադաս օպերատորին:

Որոշման համաձայն, սննդի շղթայում ներգրավված անձնակազմը պետք է ենթարկվի նախնական (աշխատանքի ընդունվելիս) և պարբերական բժշկական զննությունների և ունենա սանիտարական գրքույկ` համաձայն Հայաստանի Հանրապետության կառավարության 2003 թվականի մարտի 27-ի «Առողջական վիճակի պարտադիր նախնական (աշխատանքի ընդունվելիս) և պարբերական բժշկական զննության կարգը, գործունեության ոլորտների, որոնցում զբաղված անձինք ենթակա են առողջական վիճակի պարտադիր զննության, և բժշկական զննության ծավալի ու հաճախականության ցանկը, անձնական սանիտարական (բժշկական) գրքույկի, բժշկական զննության ենթակա անձանց անվանացանկը, անձին ժամանակավորապես աշխատանքի չթույլատրելու մասին որոշման ձևերը հաստատելու մասին» N 347-Ն որոշման:

Հիշյալ որոշմամբ հստակեցվում են այն հիվանդությունները, որոնք ունենալու դեպքում չի թույլատրվում քաղաքացուն աշխատել։

Օրինակ, ավստրալիական հակածնակիրներին չի թույլատրվում աշխատել ատամնաբուժական, գինեկոլոգիական բաժանմունքներում, պոլիկլինիկայի գինեկոլոգիական կաբինետներում, վիրաբուժական բնույթի բուժկանխարգելիչ կազմակերպություններում և  բաժանմունքներում (այդ թվում` պոլիկլինիկաների վիրաբուժական կաբինետներում), պոլիկլինիկայի ատամնաբուժական կաբինետներում, վերակենդանացման, հեմոդիալիզի, լաբորատորիաների, կենտրոնական մանրէազերծման բաժանմունքներում, արյան փոխներարկման կայաններում և բաժանմունքներում, միջամտությունների կաբինետներում: Ավստրալիական հակածնակիրները ենթակա են բուժման:

Սննդի և դրանց հավասարեցված կազմակերպություններում աշխատող անձինք, ովքեր աշխատանքի ու բնակության վայրում շփվել են վարակիչ հիվանդների հետ, ենթարկվում են բժշկական հետազոտությունների, և նրանց նկատմամբ իրականացվում է հսկողություն:

Թե ինչ հետազոտությունների ու բուժզննության պետք  է ենթարկվեն սննդի կազմակերպություններում ու ինչ պարբերականությամբ՝ ներկայացված է աղյուսակում։