Ձեր վստահելի աղբյուրը

«Իսկապես արտասովոր պայմաններում ենք քննարկում 2019 թվականի պետական բյուջեի նախագիծը։ Արձակված ԱԺ-ն իր սահմանադրական պատասխանատվության շրջանակում ուղղակի պարտավոր է քննարկել երկրի համար կարևորագույն այս փաստաթուղթը, և, կարծես, կա բավարար կամք ու պատրաստակամություն, ոչ միայն քննարկելու, այլև ընդունելու հաջորդ տարվա համար կարևորագույն ոչ միայն ֆինանսական, այլև քաղաքական այս փաստաթուղթը»,- այս մասին խորհրդարանում իր ելույթում հայտարարեց ԱԺ պաշտպանության և անվտանգության հանձնաժողովի նախագահ, ՀՀԿ պատգամավոր Կորյուն Նահապետյանը։

Նա նշեց, որ հանձնաժողովում փակ կարգով քննարկման ժամանակ հնչել են կոնկրետ մտահոգություններ, որոնց հիմնական նպատակը եղել է առավելապես նպաստել երկրի պաշտպանության համակարգին։

«2019-ի բյուջեի նախագծով պաշտպանության ոլորտի և պաշտպանության նախարարության բյուջետային հատկացումներն ավելացել են՝ պաշտպանության ոլորտի համար ավելացումը կազմում է 65 մլրդ դրամով, իսկ ՊՆ համար՝ 38 մլրդ դրամով: Պաշտպանության ոլորտի առումով հատկացումներն ընդհանուր պետական բյուջեի 20 տոկոսն են, ՀՆԱ-ի՝ 4 տոկոսը։ Որքան էլ միջոցներն ավելացել են, այդուհանդերձ բազմաթիվ ծրագրեր իրականացնելու համար պահանջվում են ավելի շատ միջոցներ»,- ասաց Նահապետյանը։

Նա ներկայացրեց, որ ավելացումներն ուղղված են հրթիռահրետանային սպառազինության, հակաօդային պաշտպանության ռազմական կարիքներին և այլ միջոցներին։

«ՌԴ-ի հետ կնքած պետական արտահանման վարկային համաձայնագրի շրջանակներում ավելանում են հրթիռային կարողությունները, հայրենական ռազմարդյունաբերության ոլորտում նախատեսվել է զարգացնել հավակնորդ ծրագրեր, որոնց իրագործումն ընդլայնելու  է ՀՀ ԶՈւ որակային պատրաստվածությունը:  Ձեռք են բերում սպառազինության այնպիսի տեսակներ, որոնք հնարավոր կլինեն ոչ միայն ռազմական ագրեսիային դիմակայելու, այլև պաշտպանությունը լիարժեք իրականացնելու: Նահապետյանը նաև ասաց, որ սպաների բնակարանային ապահովության խնդիրը դեռևս անորոշ է մնում։ 2019թ. բյուջեի նախագծի պետական գաղտնիք պարունակող ծախսերը օրինական են և հիմնավորված»,-ասաց նա:

«Ծառուկյան» խմբակցության պատգամավոր Սերգեյ Բագրատյանը հետաքրքրվեց, թե առաջիկայում պայմանագրային զինծառայողների աշխատավարձերի վերանայման հնարավորություններ բյուջեում կա՞ն, թե՞ ոչ:

«2019թ-ի բյուջեի նախագծով կա հավելավճարների ավելացում, որը կազմում է 370 մլն դրամ, ՊՆ արտաբյուջետային միջոցներից  500 մլն դրամ հատկացվելու է առաջնագծում զինվորական ծառայության անցնող զինծառայողների պարգևատրմանը»,- պատասխանեց պատգամավորը։