Ջանջուղազյանը բաշխման համակարգը հեռու է համարում կատարելությունից

Տնտեսություն 12:06 13/11/2018 Հայաստան

Ջանջուղազյանը բաշխման համակարգը հեռու է համարում կատարելությունից

2018 թվականին հաստատված կառավարության ծրագիրն ուներ ավելի հավակնոտ նպատակադրումներ: Այս մասին ԱԺ-ում 2019թ. պետական բյուջեի մասին օրենքի նախագծի քննարկման ժամանակ նշեց ՀՀ ֆինանսների նախարարի պաշտոնակատար Ատոմ Ջանջուղազյանը։

Նրա խոսքով՝ հիմա էլ կառավարությունը շարունակում է պահպանել մտադրությունները, բայց ներկայացված նախագիծը չէր կարող չարտացոլել երկրում տեղի ունեցած զարգացումները։

Ինչ վերաբերում է բաշխման համակարգին, Ջանջուղազյանն ասաց, որ ցավով պետք է արձանագրել, որ այն հեռու է կատարելությունից. «Կա եկամուտների այնպիսի բաշխում, որը դժվար է գնահատել հավասար կամ հավասարին մոտ։ Որպես փաստ պետք է սրան վերաբերենք և ջանք գործադրենք, որ այն բարելավվի»։

Նախարարի պաշտոնակատարը նշեց, որ ներկայում Հայաստանը գտնվում է տնտեսական քաղաքականության քննարկման փուլում:

«Ճյուղային կառուցվածքի փոփոխություն է ենթադրվում՝ խաղային բնագավառից անցում բարձր տեխնոլոգիաների, առաջադեմ տնտեսական քաղաքականության մոդելի, որը միտված կլինի արտահանման զարգացմանը։

Իրավիճակի փոփոխության նպատակադրմամբ նախատեսվում է հարկերի գծով հարկային բեռի ավելացման սկզբունք, հարկային համակարգի պարզեցում, հարկային համակարգի արդարության սկզբունքի ներդրում, բյուջեի վրա ազդեցության չեզոքության ապահովում»,- հավելեց նա։

Ատոմ Ջանջուղազյանը հայտնեց, որ հաջորդ տարի բյուջեի դեֆիցիտը կկազմի 151,6 միլիարդ դրամ։ Ակնկալվում է նաև 241 միլիարդ դրամի վարկի ստացում, 85 միլիարդ դրամի վարկի մարում: Իսկ պետական պարտքի սպասարկման գնահատականը, Ջանջուղազյանի փոխանցմամբ, 357 միլիարդ դրամ է:

Նրա տեղեկացմամբ՝ պետական պարտք-ՀՆԱ հարաբերակցությունը կմնա նույն մակարդակին՝ 2,3 տոկոս:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: