Ձեր վստահելի աղբյուրը

«Բնապահպանական կառավարման կոնցեպտի փոփոխություն կլինի։ Մինչ այժմ բնապահպանական կառավարումն իրականացվել է փոխհատուցման սկզբունքով»,-ԱԺ նիստում այսօր ասաց Բնապահպանության նախարարի պաշտոնակատար Էրիկ Գրիգորյանը:

«Դա վերաբերում է և՛ բնապահպանական, և՛ բնօգտագործման վճարներին, սակայն այսուհետ սկզբունքը լինելու է կանխարգելման գործառույթը, ինչպես շատ և շատ զարգացած երկրներում։ Այսինքն՝ բնապահպանությունը հիմնվելու է կանխարգելման և ոչ՝ փոխհատուցման օրինակի վրա»,-ասաց նախարարի պաշտոնակատարը՝ օրինակ բերելով հանքարդյունաբերության ոլորտը։

Էրիկ Գրիգորյանի խոսքով,  ամենախոշոր հանքարդյունաբերական կազմակերպություններից մեկը, որը տասնյակ միլիոնավոր խորանարդ մետրերով մաքուր, բարձրորակ ջուր է օգտագործում իր պրոցեսների համար, դրա համար վճարում է շատ փոքր՝ մի քանի տասնյակ հազար դոլարի կարգի վճարներ և սրանով փակում է բնապահպանության հետ կապված իր գործառույթները:

Անդրադառնալով փորձաքննական համակարգին՝ նախարարի պաշտոնակատարը նշեց, որ փորձաքննական գործընթացը որոշակիորեն դագանակի դեր է կատարել և օգտագործվել է բազմաթիվ ՓՄՁ-ների զսպելու համար: 

«Փորձաքննական գործընթացը պետք է ուղղված լինի խոշոր աղտոտողների, խոշոր  ռեսուրս օգտագործողների կառավարմանը։ Հայաստանում բնապահպանական վճար վճարողների ավելի քան 90 տոկոսը վճարում է 100 հազար դրամից քիչ վճարներ, իսկ ավելի քան 70 տոկոսը՝  նույնիսկ  20 000 դրամից պակաս։ Սակայն վարչարարությունը փորձաքննական գործընթացը և լիցենզիան զգալի պետական ռեսուրսներ է խլում: Սա նույնպես էականորեն փոխվելու է, փորձաքննական պրոցեսի  առաջարկ է մշակվել, որպեսզի խոշորածավալ ծրագերի դեպքում պետությունը կարողանա վարձել տեղական և միջազգային կազմակերպություններ, որոնք հնարավորություն կտան որոշում ընդունող գերատեսչություննրին առավել հիմնավորված որոշումներ ընդունել»,-ասաց նա:

Նախարարի պաշտոնակատարի համոզմամբ՝ կլիմայի փոփոխության ենթատեքստում կարևորելու են անտառապատման ծրագրերը:

«Հայաստանը կլիմայի փոփոխության կոնվենցիայի շրջանակներում հսկայական անտառապատման աշխատանքներ իրականացնելու պարտավորություն է ստանձնել: Դա օպտիմալ անտառպատվածության ծրագիրն է, և հաջորդ տարվանից պետբյուջեով նախատեսված է ավելի քան 425մլն դրամ հատկացնել ծրագրին։ Մենք նախատեսում ենք, որ 2019 թվականը լինելու է բեկումնային տարի Հայաստանի անտառպատվածության մասսայական մեկնարկի և հետագա տարիներին մինչև 2050  թվականը, մեր պարտավորությունների իրակացման համար»,-ասաց նա: