Ձեր վստահելի աղբյուրը

ԱԺ «Ծառուկյան» խմբակցության քարտուղար Վահե Էնֆիաջյանը բնական է համարում, որ ներկայիս կառավարությունը «ՀՀ 2019 թվականի պետական բյուջեի մասին» ՀՀ օրենքի նախագիծն իներցիոն է որակել

«Բայց մեզ համար կարևոր հանգամանք է այն, որ, ի վերջո, կարողանանք ՀՀ-ում արձանագրել ոչ թե կայունացման կամ իներցիոն բյուջե, այլ հզորացման, հաղթական, խնդիրների կարգավորման բյուջե։ Տարբեր տարիներին տարբեր կառավարության ներկայացուցիչներ տարբեր ծրագրեր են ներկայացրել ու վերլուծություններ արել, բայց մենք պետք է կարողանանք հասնել նրան, որ ոլորտային խնդիրներն առանձնացնենք՝ նշելով առաջնայինն ու երկրորդականը և կարողանանք խոցելի սոցիալական շերտերը հստակեցնել ու ավելի շեշտադրված  քաղաքականություն վարել՝ հատկացնելով ավելի մեծ միջոցներ սոցիալական խմբերին»,- նշեց պատգամավորը։

Նա ընդգծեց, որ մի շարք ոլորտների ներկայացուցիչների աշխատավարձն անհամադրելի է հայաստանյան իրականության հետ, քանի որ չափազանց ցածր է։ Էնֆիաջյանը մատնանշեց հատկապես ուսուցիչների, պետական ծառայողների և զինծառայողների աշխատավարձերը։

«Ի վերջո, մենք ե՞րբ ենք կարողանալու տարվա կտրվածքով, թեկուզ մեկ-երկու տարի տարբերությամբ հայտարարել, որ, օրինակ՝ 2020 թվականը լինելու է Հայաստանի ուսուցիչների համար աշխատավարձերի բարձրացման տարի, զինծառայողների համար 2021-ը լինելու է էական փոփոխությունների տարի»,- ասաց Վահե Էնֆիաջյանը։

Նա  անդրադարձավ նաև քաղաքացիների մասնավոր խնդիրների՝ մասնավորապես Էրեբունի վարչական շրջանի հակասանիտարական վիճակին։

Պատգամավորը հանդես եկավ «Հին Երևան» ծրագրի մասին առաջարկությամբ՝ ընդգծելով,  որ ծրագիրն իրականացվի Կոնդ թաղամասում։