Ձեր վստահելի աղբյուրը

Ազգային  ժողովում այսօր քննարկման ներկայացվեց ՀՀԿ պատգամավորներ Սամվել Ֆարմանյանի և  Միհրան Հակոբյանի հեղինակած «Վիճակախաղերի մասին» ՀՀ օրենքը ուժը կորցրած ճանաչելու մասին» օրենքի նախագիծը:

«Նախագիծը, ժողովրդական խոսքով ասած, վերաբերում է «տոտոներին և վիվառոներին», օրենսդարական լեզվով ասած՝ բուքմեյքերական ընկերությունների կամ տոտալիզատորների գործունեության օրենսդրորեն արգելմանը: Խոսքը վերաբերում է Հայաստանում ինչպես տեղական, այնպես էլ միջազգային բուքմեյքերական ընկերությունների գործուենության օրենքով արգելմանը, ինչպես իրենց գրասենյակների, այնպես էլ վիրտուալ, ինտերնետ հարթակում գործուենության արգելմանը»,-շեշտեց պատգամավոր  Սամվել Ֆարմանյանը։

Նրա ձևակերպմամբ, տարատեսակ բուքմեյքերները Հայաստանում քաղցկեղ են, չարիք, որոնց դրանց գործունեությունը պետք է օրենքով արգելել:

«Սրա շուրջ կա համահայաստանյան համաձայնություն, 99,9 տոկոսն այդ հարցում ունի համաձայնություն: Սա վիճարկելի չի, իսկ ովքեր վիճարկում են, առաջարկում եմ ամենամարդաշատ հանրահավաքում ամենաբարձր վարկանիշ ունեցող քաղաքական ուժի կողմից այս հարցը դարձնել քննարկման առարկա»,-ընդգծեց Ֆարմանյանը:

Սամվել Ֆարմանյանը նկատեց, որ ՀՀ վարչապետի պաշտոնակատար Նիկոլ Փաշինյանը ևս, տարբեր առիթներով անդրադառնալով այս հարցին, միանգամայն ճիշտ նկատել է, որ մի ամբողջ ժողովուրդ ներքաշել համազգային «ղումարբազության» մեջ, ոչ միայն սխալ է տնտեսական զարգացման մոդելի տեսանկյունից, այլև անդառնալի կորուստներ է հասցնում մեր ժողովրդի բարոյահոգեբանական նկարագրին:

«Ես լավատես եմ, որ այս մոտեցումը վաղը, երբ առաջին ընթերցմամբ կդրվի քվեարկության, իր ատացոլումը կստանա կողմ քվեարկելու տեսքով»,- ասաց նա:

Հանրապետական գործիչը նաև խոսեց այն մասին, թե ինչու է օրինագիծը քննարկման առարկա դարձել այսքան ուշացած:

«Ես այս նախագծի շուրջ աշխատել եմ ավելի քան հինգ տարի և բացառապես գործող տարբեր կառավարությունների որոշակի պատճառաբանություններ են ներկայացրել, թե ինչու չի կարելի արգելել վիճակախաղերը։ Ես կարծում եմ, որ յոթերորդ գումարման ԱԺ-ն կարող է իր միասնական դիրքորոշմամբ անել այն կարևոր քայլը, որ բոլորս, առանց քաղաքական պատկանելիության, գիշերը կարողանանք  հանգիստ քնել, քանի որ իր երեխային, ծանոթի երեխային կամ անծանոթին, փրկում է պոտեցիալ ճահճից»,-նշեց պատգամավորը՝ շեշտելով, որ Հայաստանը մոլախաղերի տեսակետից գտնվում է ռիսկային գոտում:

Սամվել Ֆարմանյանը նաև հայտարարեց, որ բոլոր այն երկրնում, որտեղ ապրուստի միջոցները քիչ են, նման խաղերը ծաղկում են ապրում: «Էլեկտրականության հետ կապված ցանկացած սարքավորում, ընդուպ՝ լվացքի մեքանա կամ արդուկ, միացրեք և կտեսնեք իրենց գովազդները, չեմ խոսում հեռուստատեսության, կայքէջերի մասին, լավ, այս գովազդի շուկան, որ այսքան աճում է, ամեն տեղ իրենք են, այս միջոցները որտեղի՞ց են առաջանում: Պետությունը ներգործության անհրաժեշտություն ունի և պարտավոր է»,-ասաց նա:

Ֆարմանյանը նշեց, որ փաստարկները կարող է շարադրել մի քանի օր շարունակ: «Իմ խնդրանքն է «Ծառուկյան» դաշինքին, որն, իմ կարծիքով, իր գործունեությամբ ապացուցել է, որ բոլոր վճռորոշ հարցերում եղել է ժողովրդի կողքին, վաղն ամբողջական ներկայությամբ աջակցեք, որ այս վիվառոները երկրում չլինեն»,-խնդրեց խորհրդարանականը՝ դիմելով նաև ՀՅԴ-ին և «Ելքին»:

«Ես լավատես եմ, որ հասկանալիորեն կիսելով կառավարության պատասխանատվությունը, միաձայն կլինեք և կողմ կքվեարկեք նախագծին»,-ասաց նա: