Ձեր վստահելի աղբյուրը

Աշխատանքի և սոցիալական հարցերի և մշակույթի նախարարությունները կենսաթոշակառուներին կտրամադրվեն մշակութային միջոցառումների անվճար տոմսեր։ Կենսաթոշակառուները հնարավորություն կունենան անվճար այցելել մշակույթի նախարարության ենթակայությամբ գործող թատրոններ և համերգասրահներ: Ծրագրի մեկնարկն արդեն տրված է։ Յուրաքանչյուր ամիս ծրագրից կարող է օգտվել ամսական շուրջ 2000 թոշակառու։

Ծրագրի հետ  կապված Panorama.am-ը  հարցերով դիմեց մշակույթի նախարարությանը։

Panorama.am- Կենսաթոշակի անցած քաղաքացիների մշակութային ժամանցն ապահովելու  ծրագրի համաձայն, թոշակառուներին բաժին է հասնում «դատարկ աթոռներ»։ Արդյո՞ք  համերգասրահներում միջոցառումների ժամանակ  կամ թատրոններում դատարկ աթոռներ լինում են։
Մշնախարարարություն-Հայաստանի Հանրապետության մշակույթի նախարարության և Հայաստանի Հանրապետության աշխատանքի և սոցիալական հարցերի նախարարության համատեղ նախաձեռնությամբ մեկնարկել է կենսաթոշակի իրավունք ունեցող անձանց՝ մշակութային միջոցառումների մասնակցության կազմակերպման ծրագիրը: Համաձայն գերատեսչությունների միջև 09.11.2018 թ. ստորագրված Համագործակցության հուշագրի՝ յուրաքանչյուր մշակութային կազմակերպություն ինքնուրույն է որոշում՝ մասնակցել, թե ոչ այս ծրագրին: Կազմակերպությունը նաև ինքնուրույն է որոշում կենսաթոշակառուներին անվճար տրամադրվող տոմսերի քանակը, որը, սակայն, չպետք է պակաս լինի, քան դահլիճի տարողության 2,5%-ը: Վերոգրյալից բխում է, որ կենսաթոշակառուներին տրամադրվող  անվճար տոմսերի բաշխումը «դատարկ աթոռների» սկզբունքով չի իրականացվելու:
Ինչ վերաբերում է հարցի երկրորդ մասին՝ տեղեկացնում ենք, որ մի շարք հանգամանքներով պայմանավորված, այո՛, թատերահամերգային միջոցառումների ընթացքում հնարավոր է լինեն դատարկ աթոռներ:

Panorama.am- Արդյո՞ք այդպես չեք պարտադրում համերգասրահին՝  մասնակցելու ձեր ծրագրին։
Մշնախարարություն-Ծրագիրն ամբողջական ծավալով կմեկնարկի 2019 թվականից և  նախարարության ենթակայության թատերահամերգային կազմակերպությունների սուբսիդիաների պայմանագրերով կամրագրվի ծրագրին մասնակցության դրույթը, իսկ մինչ այդ՝ ս. թ. նոյեմբեր-դեկտեմբեր ամիսների ընթացքում, ՊՈԱԿ-ները կամավորության սկզբունքով են մասնակցում ծրագրին (29 թատերահամերգային կազմակերպություններից ծրագրին մասնակցում է 25-ը): Նշենք, որ ծրագրի իրականացումը պետբյուջեից լրացուցիչ միջոցներ չի պահանջում:

Panorama.am-Չե՞ք գտնում, որ այս միջոցառումը ամենևին մշակույթի նախարարության գործառույթը չէ, ու որ այսպիսով մշակույթի նախարարությունը վազանցում է իր իրավասությունները և օգտագործում դիրքն ու պաշտոնը՝ որոշակի պարտադրանքների անցնելով:
Մշնախարարություն- Ծրագիրը լիովին համահունչ է նախարարության խնդիրներին և գործառույթներին, մասնավորապես՝ ՀՀ վարչապետի 2018 թվականի հունիսի 11-ի N 705-Լ որոշմամբ հաստատված ՀՀ մշակույթի նախարարության կանոնադրության 9-րդ կետի 5-րդ ենթակետի համաձայն՝ նախարարության նպատակներից է՝ մշակութային արժեքներին հաղորդակցվելու, մշակույթի ոլորտում մատչելի ծառայությունների մատուցման պայմանների ապահովումը, իսկ նույն կանոնադրության 10-րդ կետի 5-րդ ենթակետի համաձայն՝ նախարարության խնդիրներից է՝ նպաստել մշակույթին պարբերաբար հաղորդակցվելու միջոցով Հայաստանի Հանրապետության քաղաքացիների ազատ և երջանիկ լինելու ձգտմանը:

Panorama.am-Մինչև համերգի ժամը տոմսերը վաճառվում են, այսինքն համերգից մեկ ժամ առաջ պետք է զանգեք ու տեղյաք պահեք թոշակառուին, որ համերգ ե՞ք գնալու։
Մշնախարարություն-  Մշակութային կազմակերպությունների կողմից իրականացվող  մշակութային միջոցառումներից անվճար օգտվելու պայմաններն ամրագրված են հուշագրով, իսկ տոմսերի տրամադրման գործընթացն իրականացնում է Հայաստանի Հանրապետության աշխատանքի և սոցիալական հարցերի նախարարությունը: Ըստ հուշագրի՝ մշակութային կազմակերպություններ այցելող կենսաթոշակառուները պետք է ներկայանան մշակութային կազմակերպությունների կողմից իրականացվող միջոցառումներից անվճար օգտվելու իրավունքը հաստատող փաստաթղթով՝ կենսաթոշակի վկայագրով: Շահառուները մշակութային միջոցառումների մասին նախապես, առնվազն 3 օր առաջ, տեղեկացվում են հեռախոսազանգի կամ այլ հասանելի միջոցով։  Մասնակցությունը հաստատած շահառուների տոմսերը տրամադրվում են սոցիալական աշխատող-ներկայացուցիչների կողմից, վերջիններիս բնակության վայրի հասցեում։

Ի դեպ, այս ծրագիրն այնքան էլ չի ոգևորել հենց ծրագրի շահառուներին։ Panorama.am-ը հետաքրքրվեց  շահառուներից, թե ի՞նչ են մտածում այս ծրագրի մասին, կայցելե՞ն թատրոններ, համերգասրահները, նրանք, մասնավորապես, ասացին. «Թող թոշակները բարձրացնեն», «Թատրոնով փորս չի կշտանա», «Թոշակառուները նախ ապրելու կարիք ունեն», «Էդ նախարարներն իրենց ռեկլամ են անում»։