Ձեր վստահելի աղբյուրը

Կալիֆորնիայում խոշոր հրդեհներին կարող են փոխարինել անձրևները, որոնք մի քանի վայրերում  կարող են ջրհեղեղների պատճառ դառնալ: Այս մասին «ՌԻԱ Նովոստի»-ին հայտնել է նահանգի  հրդեհային դեպարտամենտի պաշտոնական ներկայացուցիչ Ջոնաթան Կոքսը:

«Մենք մեկ շաբաթից սպասում ենք անձրևների: Դա շատ կարևոր է մեզ համար, անձրևները վաղուց պետք է լինեին: Մենք անհանգստանում ենք, որ այդ շրջաններում սողանքներ և ջրհեղեղներ կարող են առաջանալ,  քանի որ հրդեհից հետո շատ բաց տարածքներ կան: Ուստի, մենք կփորձենք հնարավորինս արագ  զբաղվել դրանով»,- ասել է Կոքսը:

Նա հիշեցրել է, որ ներկայում Կալիֆորնիայի նահանգում երկու խոշոր հրդեհ շարունակվում է՝   Բյութ շրջանի Փերըդայզ քաղաքի շրջակայքում, ինչպես նաև՝ Մալիբու շրջանում:

Չորեքշաբթի հրապարակված տվյալների համաձայն՝ Կալիֆորնիայում հրդեհների հետևանքով  50 մարդ մահացել է, սակայն այս թիվը վերջնական չէ,  քանի որ, ըստ իշխանությունների, մի քանի մարդ համարվում է անհետ կորած:

Բյութ շրջանում բարդ իրավիճակը պահպանվում է հատկապես արևելյան մասում: Ներկայումս Բյութ շրջանում հրդեհի ընդհանուր մակերեսը կազմում է 54 հազար հեկտար կամ 540 ք.կմ տարածք:  Այս հրդեհը դարձել է Կալիֆորնիայի նահանգի պատմության մեջ ամենախոշոր հրդեհը: