Ձեր վստահելի աղբյուրը

Պետական եկամուտների կոմիտեի անհիմն հրապարակումը վտանգի տակ է տրել «Գազպրոմ Արմենիայի» բարի համբավը: Այս մասին այսօր լրագրողների հետ հանդիպամն ժամանակ հայտարարեց «Գազպրոմ Արմենիա» ՓԲԸ գլխավոր տնօրեն Հրանտ Թադևոսյանը ներկայացնելով պարզաբանումներ ՊԵԿ տարածած հայտարարության վերաբերյալ:

Հիշեցնենք, ոը ըստ ՊԵԿ-ի՝ բացահայտվել են մի շարք խախտումներ և առանձնապես խոշոր չափերով հարկային պարտավորություններ չվճարելու դեպքեր: Մասնավորապես՝ ՊԵԿ խոշոր ու միջին հարկ վճարողների հարկային տեսչություն-վարչության աշխատակիցների կողմից ընկերությունում իրականացված հարկային համալիր ստուգման ընթացքում պարզվել է, որ  «Գազպրոմ Արմենիա» ՓԲԸ-ն 2016 և 2017 թվականների ընթացքում հարկային մարմին ներկայացված ԱԱՀ-ի և շահութահարկի հաշվարկներում ներառել է ակնհայտ կեղծ տվյալներ, ինչի արդյունքում մի քանի միլիարդ դրամի չափով պակաս է հաշվարկել հարկային պարտավորությունները:

Հրանտ  Թադևոսյանն ասաց, որ «Գազպրոմ Արմենիա»-ն աշխատում է հարկային օրենսդրությանը համապատասխան:

Նրա խոսքով՝ «Գազպրոմ Արմենիա» ընկերությունը հանդիսանում է ՀՀ-ի գազաէներգետիկ համակարգի խոշոր ներդրող, եթե ոչ՝ ամենախոշորը, և 2002 թ-ից մինիև 2018 թվականն իրականացրել է շուրջ 950 մլն դոլարին համարժեք կապիտալ ներդրում:

«Ընկերությունը ոչ միայն չի ստացել ոչ մի լումա դիվիդենտ, այլ նաև 2017 թվականից իր իսկ նախաձեռնությամբ նվազեցրել է ՀՀ գազասպառողներին մատակարվող բնական գազի սակագինը՝ գազասպառման աճի խրախուսման նպատակով: Արդյունքում, 2017-2018 թթ-ին «Գազպրոմ Արմենիան» տարեկան կտվածքով կրել է 13.4 մլրդ դրամի վնաս»,- ասաց Հրանտ Թադևոսյանը՝ հավելելով, որ գազասպառման աճի խրախուսումը չստանալուց  բացի, «Գազպրոմ Արմենիա»-ի 7 հազար աշխատակիցները ռուսական «Գազպրոմ»-ից լրացուցիչ 7.5 մլրդ դրամի աշխատավարձ են ստանում:

«Գազպրոմ Արմենիա»-ի գլխավոր տնօրենը նշեց, որ ընկերությունը տարիներ շարունակ լինելով ՀՀ խոշոր հարկատուն, տարեկան կտրվածքով իրականացրել է նվազագույնը 40 մլրդ դրամի հարկային վճարումներ, մշտապես իր գործունեությունը ծավալել է հարկային օրենսդրությանը համապատասխան, ինչի արդյունքում ՊԵԿ-ից պարբերաբար ստացել է օրինապահ հարկ վճարողի հավաստագիր:

«Եւ այս պարագայում մամուլից տեղեկանում ենք, որ ՊԵԿ-ը բացահայտել է մի շարք խախտումներ և առանձնապես խոշոր չափերով հարկային պարտավորություններ չվճարելու դեպքեր»,- նշեց նա:

Ներկայացնելով  գազի կորուստների վերաբերյալ տվյալներ՝ Հրանտ Թադևոսյանն ասաց, որ ձմռանը կորուստներն ավելի բարձր են, քան՝ ամռանը:

«Դա ոչ միայն 2018թ-ին է այդպես եղել, այլև՝ մյուս տարիներին: Եթե ուսումնասիրել են 2016, 2017, 2018թթ., ապա տեսել են, որ այդ տարիներին ևս ձմռան ամիսներին կորուստներն ավելի շատ են եղել: Այդպես եղել է ու լինելու է: Ուստի կոտեկտ չէ ամռան ու ձմեռվա ամիսները համեմատել»,- ընդգծեց նա՝ միաժամանակ  նշելով, որ Հայաստանում 14 հազար արդյունաբերական ու կոմունալ սպառողների հաշվիչները համալրված են էլեկտրոնային ճշտիչներով, ինչը նշանակում է, որ գազը և ձմռանը, և ամռանը չափում են իրական ջերմաստիճանի պայմաններում: 

Բացի այդ, ըստ նրա, ՀՀ  700 հազար բնակիչների հաշվիչները գազի ծավալը հաշվում է իրական ցուցիչներով՝ համապատասխան ջերմաստիճանով, քանի որ ցուցիչներ չկան:

«Այսինքն՝ ձմռանը լրացուցիչ կորուստներ են առաջանում և կախված նրանից ցրտաշունչ է ձմեռը, թե ոչ, կորուստների չափերը տարբեր են, ինչը նորմալ է։ Սրա վրա միլիարդների հաշվարկներ կատարելը կոռեկտ չէ: Այդ տարիների համար հունվար-սեպտեմբեր ամիսներին աճողական բնական գազի կորուստների չափը համադրելի է»,- ասաց Հրանտ Թադևոսյանը:

Նա նաև նշեց, որ եթե ՊԵԿ-ը կարողանա հիմնավորել իր հրապարակումները գազի կորուստի մասին, ապա իրենք պատրաստ են վերականգնել շեղումները:

«Եթե ՊԵԿ աշխատակիցները ուսումնասիրման արդյունքում հիմնավորեն, որ 714 հազար բաժանորդները, այդ թվում՝ շուրջ 375 ավոտգազալիցքավորման ճնշումային լիցքավորման ժամանակ անցյալ տարիներին  ինչ-որ մեկը թաքցրել է բնական գազի ծավալների սպառման ծավալները,  որի դեմ մենք պայքարել ենք ու պայքարելու ենք, ապա «Գազպրոմ Արմենիան» շնորհակալություն կհայտնի ՊԵԿ-ին և օրենքի սահմաններում կգանձի ամբողջ գազի գումարը և կկատարի հարկային վճարումներ իրացված գազի ծավալների մասով», - ասաց Թադևոսյանը։

Նա նաև նշեց, որ 2016 թվականին Գազպրոմի 254 մլն դոլարի վարկերը 2018 թվականի ավարտին կհասցնեի 128 մլն դոլարի:

«Այս օրերին պետք է պայմանագիր կնքեինք ռուսական բանկի հետ՝ 6,5 տոկոսով մոտ 150 մլն դոլարի վարկ վերցնելու պայմանով։ Ակնկալում էինք տնտեսել տարեկան 2-4 մլն դոլար, սակայն ՊԵԿ հայտարարությունից հետո, որը նաև տարածվել է ռուսական մամուլում, մենք ստացանք լուրջ անհանգստություն, ահազանգ այդ բանկից, որի հետ ավարտում էինք բանակցությունները: Գործարքի իրականացումը դրվում է լուրջ կասկածի տակ: Առաջին հարկատուն, խոշոր ներդրողն այսպիսի վիճակում է հայտնվել, ինչպե՞ս պետք է շարունակենք աշխատանքը ներդրողի հետ: Եզրակացությունները թողնում եմ բոլորիդ»,- ասաց Հրանտ Թադևոսյանը։