Ձեր վստահելի աղբյուրը

«Արմավիր» քրեակատարողական հիմնարկի կառուցումից և շահագործման հանձնելուց հետո ՀՀ քրեակատարողական հիմնարկներում գերբեռնվածության խնդիրն իսպառ վերացել է։ Այդ փաստը ֆիքսվել է ԵԽ խոշտանգումների կանխարգելման կոմիտեի կողմից։ ԱԺ այսօրվա նիստի ժամանակ ասաց Արդարադատության նախարարի տեղակալի պաշտոնակատար Արտակ Ասատրյանը՝ հիշեցնելով, որ կառավարությունը բացասական դիրքորոշում է ներկայացրել Քրեական օրենսգիրքը փոփոխելու և նախնական կալանքի մեկ օրը մեկուկես օր հաշվարկելու առաջարկի առնչությամբ։

«2014 թվականից Հայաստանում ներդրվել է բարոյական վնասի փոխհատուցման ինսստիտուտը, որից կարող են օգտվել նաև նախկինում կալանավորված անձինք»,- ասաց նա՝ հավելելով, որ առանց քրեական և քրեակատարողական օրենսդրության համակարգային բարեփոխումների և առանց տարբերակված  մոտեցման նման կարևոր որոշում կայանցնելը դեռ ժամանակավրեպ է։

«Ծառուկյան» խմբակցության պատգամավոր Գևորգ Պետրոսյանն իր հերթին նկատեց, որ քրեական օրենսդրության կատարելագործումը պետք է տեղի ունենա հիմնական երեք շահառուների՝ պետության, հանցագործության մեջ մեղադրվող անձի և տուժողների, շահերի հավասարակշռման սկզբունքով։

ՀՀԿ-ական պատգամավոր Ռուստամ Մախմուդյանն իր հերթին նկատեց, որ պետք է հավանություն տալ նախնական կալանքի մեկ օրը մեկուկես օր հաշվարկելուն։

«Սա մարդասիրական օրենքի նախագիծ է»,- ասաց նա։

«Ծառուկյան» խմբակցության պատգամավոր Նաիրա Զոհրաբյանն էլ հավելեց. «Օսվենցիմը սանատորիա է «Նուբարաշեն» ՔԿՀ-ում նախնական կալանքի պահման պայմանների համեմատ։ Քնում են հերթով, հնարավոր բոլոր միջատները վխտում են պատերի վրայով»։

Ապա հավելեց, որ իրենց խմբակցությունը միանշանակ պաշտպանում է առաջարկված նախաձեռնությանը՝ նախնական կալանքի մեկ օրը հաշվել մեկուկես օր։