Ձեր վստահելի աղբյուրը

Նախօրեին համացանցում տեղեկատվության հայտնվեց, որ Ալեքսանդր Սպենդիարյանի անվան օպերայի և բալետի ազգային ակադեմիական թատրոնի բալետի արտիստ, 23-ամյա Վահագն Մարգարյանին արյուն է անհրաժեշտ, սեռը և արյան կարգը էական չէ։ Panorama.am-ը Ալ. Սպենդիարյանի անվան օպերայի և բալետի թատրոնի բալետմայստեր, բալետային խմբի ղեկավար, ՀՀ արվեստի վաստակավոր գործիչ Արմեն Գրիգորյանից տեղեկացել էր, որ ցանկացողները կարող են  այսօր առավոտյան 09։30-ից գնալ «Հերացի» թիվ 1 հիվանդանոցային համալիրում։

Այսօր Ա. Գրիգորյանից տեղեկացանք, որ հանձնողները շատ են եղել, բալետի խմբի 70 տոկոսից ավելին, նաև անծանոթ մարդիկ են գնացել արյուն հանձնելու։ Նա կրկնեց, որ արյուն անհրաժեշտ է Վահագն Մարգարյանին, սակայն տեղյակ չէ, թե ում նախաձեռնությամբ էր կազմակերպվել այդ ակցիան։

«Հերացի» թիվ 1 հիվանդանոցային համալիրից Panorama.am-ը տեղեկացավ, որ այս պահին համալիրն  արյան պաշարների խնդիր չունի, իրենք չեն կազմակերպել, իսկ Վահագն Մարգարյանին օգնելու հետ կապված՝ «երևի մարդիկ ինքնակամ ուզում են օգնել»։

Վ. Մարգարյանը նոյեմբերի 13-ին «Արմենիա» հանրապետական բժշկական կենտրոնից տեղափոխվել է «Հերացի» թիվ 1 հիվանդանոցային համալիր։

Ինչ վերաբերում է արյան ցանկացած կարգ ներարկելուն, Panorama.am-ը ուռուցքաբան, արյունաբան Գևորգ Թամամյանից տեղեկացավ, որ այսօր անհրաժեշտության դեպքում մարդուն պետք է ներարկել  այն խմբի արյուն, որ խմբի տվյալ մարդու արյունն է։

«Ընդհանրապես, նույն խմբին նույն խմբի արյուն են ներարկում։ Բացի խմբերից, այլ գործոններ էլ կան, որոնք ազդում են»,- նշեց բժիշկը։

Գ. Թամամյանի խոսքով, այսօր արյունը հասանելի է, նաև գիտությունը ժամանակի ընթացքում զարգանում է։ 

Այնպես որ՝ դոնոր-բարեգործները ոչ միայն պարողին են օգնել:

Հիշեցնենք, որ վթարը տեղի է ունեցել նոյեմբերի 6-ին ժամը Երևան-Աշտարակ ճանապարհին։

Վահագն Մարգարյանը Լատվիայի մայրաքաղաք Ռիգայում տեղի է ունեցած Բալթյան 4-րդ միջազգային բալետային մրցույթում գլխավոր մրցանակի է արժանացել։ Նա նաև Հայաստանը ներկայացրել է «Պատանի պարողների Եվրատեսիլ» մրցույթում։