Բաբկեն Պիպոյանը խայտառակ վատ է գնահատում փոխքաղաքապետի այցը մանկապարտեզներ
«Իրազեկ և պաշտպանված սպառող» ՀԿ նախագահ, Հանրային խորհրդի անդամ Բաբկեն Պիպոյանը խայտառակ վատ է գնահատում երևանյան չորս մանկապարտեզներ փոխքաղաքապետի ստուգայցը, ապա դրա մասին պաշտոնական հաղորդագրության հրապարակումը։
«Նման այցը պետք է ունենա հստակ նպատակ ու հստակ մոտեցում, հստակ մասնագիտական հարթության մեջ։ Գիտե՞ք, եթե ինքնաթիռի որակից խոսելու է մի մարդ, ով կյանքում ինքնաթիռ չի տեսել կամ չգիտի՝ ինչ է ինքնաթիռի անվտանգությունը, ավելի լավ է այդ մարդն ընդհանրապես չխոսի»,-Panorama.am-ի հետ զրույցում ասաց Պիպոյանը։
Հիշեցնենք, երեկ քաղաքապետարանի կայքում հաղորդագրություն էր հրապարակվել, որտեղ մասնավորապես ասվում էր. «Անակնկալ շրջայց՝ համայնքային մանկապարտեզներում: Օրակարգի հիմնական խնդիրը սննդի վերահսկողությունն է: Ավագանու անդամները մանկապարտեզներում սննդի կազմակերպման հետ կապված իրենց մտահոգությունն էին հայտնել: Քաղաքապետ Հայկ Մարությանի հանձնարարականով ոլորտի պատասխանատուներն իրավիճակին ծանոթանում են հենց տեղերում: Մատակարարվող սննդի ստուգում, սանիտարահիգիենիկ պայմաններ, ջեռուցման անհրաժեշտ ջերմաստիճանի ապահովում: Երևանի քաղաքապետի տեղակալ Տիգրան Վիրաբյանը 47, 48, 78 և 87 մանկապարտեզներում էր»։
Այնուհետև խոսվում է, որ թերություններ են եղել, չորս մանկապարտեզից երեքում ոչ նորմալ վիճակ են տեսել։
Թե ինչ խախտումների, թերությունների, վիճակի մասին է խոսքը, քաղաքապետարանը չի մանրամասնել։ Պիպոյանն այս առումով ընդգծում է, որ սննդամթերքի անվտանգությունը շատ նուրբ հարց է։
«Համեստությունը լավ բան է։ Մենք պետք է հասկանանք, որ պարտավոր չենք իմանալ ամեն ինչ ու նման այցերն իրականացնենք համապատասխան մասնագետների հետ։ Ընդհանուր առմամբ այցերին վերաբերում եմ շատ լավ, բայց եթե այն նեղ մասնագիտական ուղղություն ու նպատակ ունեցող է։ Ակնհայտ է, որ այցն իրականացվել է առանց նեղ ոլորտային մասնագետների, առանց քաղաքապետարանի ենթակայության ներքո գործող մարմնինների, ՀԿ-ների ներկայացուցիչների։ Այս առումով հարց է առաջանում, ո՞րն է այցի նպատակը։ Եթե նպատակն այն էր, որ ցույց տան, կաբինետներից դուրս են գալիս, ապա շնորհավորում եմ, մենք դա տեսանք։ Նման դեպքում բացի բենզինի ծախսից, այլ բան չկա»,-ասաց ՀԿ նախագահը։
Պիպոյանը նկատում է, եթե հայտարարվում է, որ այցի նպատակը սննդի անվտագության ստուգումն է, ուրեմն դա պետք է արվի հանուն սպառողի, տվյալ դեպքում մանկապարտեզի սաների։
«Այս այցի նպատակն անհասկանալի է։ Եթե ներքին վերահսկողության համար են գնացել, դա ընդհանրապես հաղորդակցման ենթակա չէ։ Բայց եթե որոշել են հաղորդակցել, ուրեմն պետք է ազդակ լինի, որը չկա։ Բայց եթե ասում են, սննդամթերքի անվտանգություն բառը, ավտոմատ կերպով այն պետք է կապ ունենա անվտանգության հետ, իսկ իրենց արածն ընդհանրապես որևէ եզր չունի։ Մենք մեծագույն պրոբլեմ ունենք՝ սիրողականություն, որը գնալով ավելի ու ավելի մեծանում է։ Այս տեղեկատվությունը միայն պանիկա է առաջացնում, հստակ չէ, ի˚նչը ինչին չի համապատասխանում»,-կարծիք հայտնեց նա։
ՀԿ նախագահի խոսքով, ներքին այցերը լուսաբանման, հաղորդակցման ենթակա չեն։
Ի դեպ, հաղորդագրության մեջ չի հստակեցվում, թե ինչու են ընտրվել այս չորս մանկապարտեզները։ Մեղավորներն ովքե՞ր են, «անհետևանք չմնալու» սպառնալիքներն ո՞ւմ են ուղղված։
Ենթադրվում է, որ քաղաքապետարանը հայտնաբերած խախումների մասին տեղյակ կպահեր սննդամթերքի անվտանգության տեսչական մարմնին, վերջինն էլ նմուշառում կկատարեր, լաբորատոր փորձաքննություն կիրականացներ, արձանագրած խախտումներին մասնագիտական տեսք կտար։
Տեսչական մարմնից Panorama.am-ին հայտնեցին, որ քաղաքապետարանից գրություն չեն ստացել։ Իրենք ավելի վաղ չորս մանկապարտեզներից երկուսում շրջայց են իրականացրել, թիվ 78-ը լավ վիճակում է եղել, թիվ 47-ն էլ սանիտարական լավ վիճակում է եղել, միայն մակնշման խախտում է եղել։
Այսօր տեսչական մարմնից նաև հայտնեցին, որ վերահսկողություն իրականացվել է հանրապետության 429 նախադպրոցական ուսումնական հաստատություններում, որից 26-ը Երևանում։
Պարզվել է, որ որոշ հաստատություններ ունեն վերանորոգման կարիք, խոհանոցներն անբարեկարգ են, գույքը` հնամաշ է։ Մի շարք մանկապարտեզներում սանիտարահիգիենիկ պայմանները չեն համապատասխանել սահմանված նորմերին, բացակայել է անհրաժեշտ գույքը, չեն իրականացվել պայքարի պատշաճ միջոցառումներ միջատների, ճանճերի, կրծողների, ուտիճների դեմ, իսկ բժշկական զննության գրքույկներում պարբերական բժշկական հետազոտությունների մասին տեղեկատվությունը եղել է թերի։
Լուսանկարը վերցված է Երևանի քաղաքապետարանի պաշտոնական էջից, այն կցված է փոխքաղաքապետի այցի մասին պատմող հաղորդագրությանը։
Հարակից հրապարակումներ`
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
