Ձեր վստահելի աղբյուրը

Ի թիվս այլ նախագծերի՝ այսօր ԱԺ-ում չընդունվեց նաև ՀՀԿ-ական պատգամավորներ Միհրան Հակոբյանի, Գալուստ Սահակյանի և Կարինե Աճեմյանի հեղինակած «Հավաքների ազատության մասին» Հայաստանի Հանրապետության օրենքում լրացում կատարելու մասին» օրենքի նախագիծը:

Նշենք, որ հարցը վերաքվեարկման էր դրվել, քանի որ առաջին քվեարկության ժամանակ «Ծառուկյան» խմբակցությունը, դեմ քվեարկելուց հետո հայտարարել էր, որ թյուրիմացություն է տեղի ունեցել:

Առաջին քվեարկությունից հետո ԱԺ փոխխոսնակ Շարմազանովը նշեց, որ այս նախագիծը շատ կարևոր էր. «Ես նաև զուգահեռ այլ նախաձեռնություն էի ներկայացրել, և անհասկանալի էր կառավարության բացասական վերաբերմունքը  թե´ այս, թե´ իմ նախաձեռնությունների նկատմամբ: Սրա նպատակն այն էր, որ կրոնական կազմակերպությունները, մասնավորապես, Հայ Առաքելական Սուրբ Եկեղեցու տարածքը զերծ պահեինք բռնի բողոքներից»:

Նախագծով առաջարկվում է Հայ առաքելական եկեղեցուն սեփականության կամ վարձակալության իրավունքով պատկանող տարածքներում սահմանափակել հավաքների անցկացումը, եթե եկեղեցու համաձայնությունը չկա:

Խորհրդարանը չընդունեց նաև նույն հեղինակների «Հատուկ պետական պաշտպանության ենթակա անձանց անվտանգության ապահովման մասին» Հայաստանի Հանրապետության օրենքում լրացումներ կատարելու մասին» նախագիծը:

ԱԺ դահլիճում բուռն քննարկում ծավալվեց: ԱԺ փոխխոսնակ Էդուարդ Շարմազանովն ասաց, որ սա վերկուսակցական նախագիծ է, որն ապահովելու է կաթողիկոսի պետական պաշտպանությունը.  «Մենք պատշաճ ուշադրություն չենք դարձնում Հայ առաքելական եկեղեցուն, և աղանդավորական շարժումներն այս ամիսների ընթացքում  գլուխ են բարձրացրել: Սա մտահոգիչ է, ցավում եմ, որ այս կարևոր նախաձեռնությունը տապալվեց»:

ՀՀԿ-ական պատգամավոր Սամվել Նիկոյանն իր հերթին պահանջեց վերականգնել քվեարկության պատկերը ՝ տեսնելու համար, թե որ խմբակցությունը դեմ քվեարկեց. «Ուզում ենք հստակ իմանալ՝ ովքեր են մեր արժեհամակարգին դեմ գործողություններ կատարում»:

Վարման կարգով ձայն խնդրեց Ելք խմբակցության ղեկավար Լենա Նազարյանը՝ նշելով, որ երեկ կառավարության ներկայացուցիչը հավաստիացրեց՝ եթե կաթողիկոսի անվտանգությունը պաշտպանության կարիք ունենա, կառավարությունը հատուկ միջոցներ կձեռնարկի. «Հատուկ օրենքով արձանագրելու կարիք չկա»:

Էդուարդ Շարմազանովը հակադարձեց, որ Վեհափառ Հայրապետին պետք է Սահմանադրության պահանջով պետական պաշտպանության բացառիկության հատուկ իրավունքներ տալ:

ՀՀԿ-ական պատգամավոր Միհրան Հակոբյանն էլ նկատեց, որ  հաշվի առնելով Հայ առաքելական եկեղեցու բացառիկ դերակատարությունը ՝ սա այն հարցը չէ, որ պետք է թողնել հայեցողությանը.
«Հայեցողությամբ վարչապետը կարող է լուծել «Կյանքի խոսքի» առաջնորդի անվտանգության հարցը կամ չլուծել կամ «Եհովայի վկաների», «Ռեմաների» հարցը, բայց Հայ առաքելական եկեղեցին հայեցողությանը թողնելը, կարծում եմ, ճիշտ չէ»:

ՀՅԴ պատգամավոր Արմեն Ռուստամյանն էլ նշեց, որ այս օրինագիծը լավ կյանքից չէ, որ առաջացել է. «Փաստերը վկայում են այն մասին, որ ոչ միայն Վեհափառը, այլ եկեղեցին կարիք ունի պաշտպանության։ Կոչ եմ անում վեր կանգնել  ամենի ինչից և կողմ քվեարկել օրինագծին»:

«Ծառուկյան» խմբակցության քարտուղար Վահե Էնֆիաջյանն էլ ասաց, որ իրենք ձեռնպահ կքվեարկեն. «Հայ առաքելական եկեղեցու դավանանքը հայության համար ապրելակերպ է: Բարձր ենք գնահատում Վեհափառի անվտանգության հարցը և կարծում ենք, որ օրենքով չէ, որ պետք է ապահովել»:

Էդուարդ Շարմազանովը կրկին ձայն խնդրեց՝ ընդգծելով, որ սա ավելին է, քան սովորական քվեարկությունը. «Մենք այս քվեարկությամբ որոշելու ենք՝ ուր ենք գնում, ծառայում ենք Աստծո՞ւն, թե սատանային, ծառայում ենք եկեղեցո՞ւն, թե աղանդավորությանը, խնդրում եմ յուրաքանչյուրիս մի կողմ դնել մեր տարաձայնությունները: Վեհափառ Հայրապետը և եկեղեցին այսօր կարիք ունեն անվտանգության հատուկ միջոցների»:

«Ելք» խմբակցության պատգամավոր Սասուն Միքայելյանը հակադարձեց նրան. «Վեհափառի անվտանգությունը պետք է պահպանի ժողովուրդը, ես դեմ եմ նման մոտեցմանը: Եթե Վեհափառն այսօր չի կարողանում ժողովրդի մեջ շրջի, դա իր խնդիրն է»:

Նույն խմբակցության պատգամավոր Ալեն Սիմոնյանն էլ նկատեց. «Ամենայն հայոց կաթողիկոսին պետք է պաշտպանենք ամենայն հայոց ժողովրդի՞ց։ Մնում էր կաթողիկոսին հայ ժողովրդից պաշտպանեինք»:

ՀՀԿ-ական պատգամավոր Հակոբ Հակոբյանն էլ հայտնեց, որ իրեն վրդովեցրեց այն դիտարկումը, թե Վեհափառին պաշտպանում են ժողովրդից. «Իրենք էլ շատ լավ գիտեն, որ Վեհափառին պաշտպանում ենք սեռական և կրոնական փոքրամասնություններից, որոնք դրսից ֆինանսավորում են և պայքարում են հայկական պետականության և հայ հավատքի դեմ»:

Նրա խոսքը դահլիճում ծափերի արժանացավ:

Նախագծի տապալումից հետո Շարմազանովը հայտարարեց. «Սա անկախ Հայաստանի ամենախայտառակ քվեարկությունն էր: Հայ ժողովրդին պետք է հստակ պատասխան տան այն ուժերը, որոնք աղանդավորության քարոզ են տանում, գոմիկների քարոզ են տանում: Այսօր 28-ով կպաշտպանենք, վաղը լինելու ենք 2800, մյուս օրը՝ 2 մլն 800 000, Հայկը չի կարող պարտվել Բելին, մենք հաղթելու ենք»։

Ասաց նա և հեռացավ դահլիճից: Շարմազանովին հետևեցին խմբակցության մյուս պատգամավորները ևս: