Ձեր վստահելի աղբյուրը

ՀՀ երրորդ նախագահի թիկնազորի նախկին պետ Վաչագան Ղազարյանի պաշտպան Արմեն Հարությունյանը դեռ չի ստացել Վճռաբեկ դատարանի որոշումը։ Ստանալուց հետո նոր կհայտնի դիրքորոշում։ Panorama.am-ը փաստաբանից տեղեկացավ, որ դեռ ՄԻԵԴ դիմելու որոշում չեն կայացրել, սակայն  բոլոր հիմքերն առկա են։

«Սպասենք Վճռաբեկ դատարանի որոշմանը, դատարանի իրավական դիրքորոշումը բոլորիս համար հետաքրքիր է»,- ասաց նա։

Հիշեցնենք, որ նախօրեին Վաչագան Ղազարյանը կրկին կալանավորվել է։ Դատախազությունից  վճռաբեկ բողոք էին ներկայացրել նրա նկատմամբ գրավը կիրառելու դեմ։ Վճռաբեկ դատարանի որոշմամբ, Վ.Ղազարյանի նկատմամբ կիրառված գրավը վերացվել է։

«Առաջին ատյանի դատարանը մերժել էր գրավի միջնորդությունը, կալանավորման որոշում էր կայացրել։ Վերաքննիչ դատարանն առաջին ատյանի դատարանի որոշումը գրավի մերժման մասով բեկանել էր, սահմանել 1 միլիարդ դրամ գրավ, որը վճարվել էր, ազատ էր արձակվել։ Վճռաբեկ դատարանը ուժ տվեց առաջին ատյանի դատարանի որոշմանը, որի հիմքով Վաչագան Ղազարյանը նորից կալանավորվեց»,- ասաց Ա. Հարությունյանը։

Նա նշեց, որ վճարված գրավի ամբողջ գումարը՝ 1 միլիարդ դրամ, հետ է վերադարձվելու վճարող անձին։

Փաստաբանն ասաց, որ գրավի վճարումից ու ազատ արձակվելուց հետո՝ այս 4 ամիսներին, Վաչագան Ղազարյանը երբեք ոչ խոչընդոտել է, ոչ խուսափել  նախաքննությունից, մասնակցել է նախաքննությանը, ցուցմունք տվել, ներկայացրել փաստաթղթեր։

«Այդ փաստը հենց Վճռաբեկ դատարանում ընդունեց դատախազության ներկայացուցիչը, ով պաշտպանում էր բողոքը։  Մեզ համար այդ իրավիճակը մի փոքր անհասկանալի էր, երբ դատախազությունն ասում է, որ ընդունում է՝ Վաչագան Ղազարյանը չի խոչընդոտել նախաքննությանը, չի խուսափել նախաքննությունից, բայց պնդում է բողոքը և պահանջում կալանավորեն, մինչդեռ կալանավորման հիմքում հենց նախաքննությանը չխոչընդոտելու և նախաքննությունից չխուսափելու հանգամանք է դրված։ Այս ամենը, իհարկե, մի փոքր տարօրինակ է, բայց առավել տարօրինակ է, երբ որ Վճռաբեկ դատարանն է նման որոշում կայացնում։ Չէինք էլ սպասում, որ նման իրավիճակ կարող է լինել»,- ասաց Արմեն Հարությունյանը։

Պաշտպանը նշեց, որ ցանկացած դեպքում կփորձեն միջնորդել գրավի կիրառմամբ կալանավորումը փոխելու վերաբերյալ, կփորձեն դիմել դատախազություն՝ հասկանալու դատախազության դիրքորոշումը։

Հիշեցնենք, որ ԱԱԾ պաշտոնական հայտարարության համաձայն, Վ. Ղազարյանը մեղադրվում է  ապօրինի հարստացման մեջ: Վաչագան Ղազարյանին մեղադրանք է առաջադրվել ՀՀ քրեական օրենսգրքի 314.3-րդ հոդվածի 2-րդ մասով և 310.1-ին հոդվածի 1-ին մասով նախատեսված հանրորեն վտանգավոր այն արարքների կատարման համար, որ նա ՀՀ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները, ինչպես նաև ապօրինի հարստացել է: Վաչագան Ղազարյանը հունիսի 28-ին կալանավորվել էր, սակայն  Վերաքննիչ դատարանի որոշմամբ սահմանված 1 մլրդ դրամ գրավի դիմաց ազատ էր արձակվել։