Ձեր վստահելի աղբյուրը

ՀՀ կառավարության արտահերթ նիստում առաջին փոխվարչապետ Արարատ Միրզոյանն անդրադարձավ «տրանսֆերտների հարկման մեխանիզմի» ներդրմանը, որի վերաբերյալ սոցիալական ցացներում բուռն քննարկումներ են տեղի ունենում:

«Առանց լայն հանրային քննարկման, առանց հանրային համաձայնության որևէ հարկային բեռի ավելացում չի լինելու: Բացառվում է այդպիսի բան»,- հայտարարեց փոխվարչապետը:

Նրա խոսքով՝  պետք է հաշվի առնել, որ զանազան գաղափարներ կարող են քննարկվել, ընդ որում, քննարկումները հաճախ կարող են մանիպուլյատիվ տեսք ստանալ, կարող են աղավաղվել և մեկնաբանվել ոչ այնպես, ինչպես կան, բայց կարող են և մեկնաբանվել այնպես, ինչպես կա ու արժանանալ կամ չարժանանալ  մարդկանց հավանությանը: «Բայց միայն հանրային լայն համաձայնության դեպքում կարող են նման նախաձեռնությունները կյանքի կոչվել»,- ասաց նա:

Արարատ Միրզոյանը նշեց, որ կոնկրետ «խոպանչիներին հարկելու» նախաձեռնությունը աղավաղվել է ու սխալ է մեկնաբանվել։ «Գաղափարը հետևյալն է՝ կա միտք ներդնել եկամուտների համընդհանուր հայտարարագրման համակարգ, որտեղ պետք է բոլոր քաղաքացիները հայտարարագրեն իրենց եկամուտները»,- ընդգծեց փոխվարչապետը:

Ըստ նրա՝ եթե այդ գաղափարը նույնիսկ կյանքի կոչվի, նախ պետք է հասկանալ, թե որքանով է Հայաստանը պատրաստ դրան։ «Նույնիսկ եթե կյանքի կոչվի, պիտի բացառվի որևէ եկամուտի կրկնակի հարկումը, այսինքն՝ չի կարող պատահել, որ որևէ մեկը իր եկամուտից, օրինակ՝ ԱՄՆ-ից կամ ՌԴ-ից արդեն հարկ է վճարում ու փոխանցվում է Հայաստան, մի հատ էլ այդ գումարից հարկ է վճարվում Հայաստանում»,- նշեց նա:

Այսպիսով, ըստ Արարատ Միրզոյանի, սա գաղափար է, որը պետք է քննարկվի. «Կտեսնենք՝ ինչքան դրական կողմեր ունի, ինչքան՝ բացասական»,- ասաց նա։