Ձեր վստահելի աղբյուրը

ՀՀ կառավարության այսօրվա արտահերթ նիստում հավանություն տրվեց ՀՀ կառավարության 2018 թ. հոկտեմբերի 2-ին ՀՀ Ազգային ժողով ներկայացրած ՀՀ 2019 թ. պետբյուջեի նախագծի ցուցանիշներում կատարվելիք փոփոխություններին, ՀՀ ԱԺ մշտական հանձնաժողովներում և լիագումար նիստում պետբյուջեի նախագծի քննարկման արդյունքներով ՀՀ ԱԺ պատգամավորների ՀՀ կառավարություն ներկայացրած առաջարկությունների և եզրակացությունների ամփոփաթերթիկին:

Հավանության արժանացած փոփոխություններին համապատասխան լրամշակված տարբերակը և ամփոփաթերթիկը սահմանված կարգով կներկայացվի ՀՀ Ազգային ժողովի աշխատակազմ:
ՀՀ ֆինանսների նախարարի պաշտոնակատար Ատոմ Ջանջուղազյանը նշեց, որ ԱԺ պատգամավորները ներկայացրել են 146 առաջարկ: Ըստ նախարարի պաշտոնակատարի՝ տեղի են ունեցել նաև բյուջեի թվային փոփոխություններ, որոնք չեն ազդել դեֆիցիտի վրա: Լրամշակված նախագծով որոշակի փոփոխություններ են արվել, մասնավորապես, ծախսերի կառուցվածքում:

Նշենք, որ մինչ նախագծի ընդունումը ՀՀ ֆինանսների նախարարի պաշտոնակատար Ատոմ Ջանջուղազյանն առաջարկեց օրակարգում ներառել նաև արտաբյուջեներից հրաժարվելու հարցը:

Փոխվարչապետի պաշտոնակատար Տիգրան Ավինյանը նշեց, որ հարցը քննարկվել է կոմիտեի նիստին: «Կարծում եմ, որ այնտեղ քննարկելու դեռ շատ բան կա և հարցը կոմիտի նիստին հավանության չի արժանացել: Ես կարծում եմ՝  կարելի է կազմակերպել հետագա քննարկումներ, միայն դրանից հետո վերադարձնել կոմիտեի նիստ և նոր բերել կառավարության նիստ»,- նշեց նա:

Արարատ Միրզոյանի հարցին՝ ի՞նչ կլինի եթե մեկ ամիս հետո անդրադառնան հարցին, Ատոմ Ջանջուղազյանն ասաց, որ ծայրահեղ երկու պատասխան կարող է տալ:

«Բացարձակապես ոչինչ, քանի որ 27 տարի չենք անդրադարձել, կամ էպիզոտիկ դրվագային ենք անդրադարձել և ոչ մի անգամ չի հաջողվել այս հարցը վերջին հասցնել»,- ընդգծեց նա՝ հավելելով, որ օրինակ, ֆինանսների նախարարությանը հաջողվել է ազատվել այդ կարծրատիպից՝ թե առանց արտաբյուջեների հնարավոր չէ ապրել:

Առաջին փոխվարչապետը առաջարկեց հարցը ընդգրկել օրակարգ, իսկ Տիգրան Ավինյանը նշեց, որ դա երկար ընթացք կունենա, ուստի կարելի է հարցը տեղափոխել այլ հարթակներ, բոլոր նախարարությունների հետ մանրամասն քննարկել, նախապատրաստել կոնկրետ նախագիծ, որը բոլոր ռիսկերին կտա պատասխաններ և նոր դնել քննարկման:

Ատոմ Ջանջուղազյանի առաջարկած՝ արտաբյուջեների վերացման հարցը օրակարգ բերելուն կառավարության անդամներներից հինգը կողմ քվեարկեց, յոթը՝ դեմ:

Արարատ Միրզոյանն ասաց, որ իրականում ռեֆորմների ճանապարհը իսկապես փշոտ է, սա մի լուրջ հարց է, որը մշտապես տարբեր գերատեսչությունների շահերի և հետարքրքրություննեի կենտրոնում է եղել:

«Վստահաբար մենք պիտի գնանք արտաբյուջեների վերացման ճանապարհով: Ափսոս, մինչ այս պահը չափազանց մանրամասն, անհրաժեշտ խորությամբ հարցը չի քննարկվել, և գերատեսչությունները դեռևս գնում են գերատեսչական շահը պաշտպանելու ճանապարհով: Վստահ եմ, որ քննարկումների մի շրջափուլ անցնելուց հետո նորից կանդրադառնանք հարցին և այս անգամ՝ դրական լուծմամբ»,- ընդգծեց նա:

Փոխվարչապետ Մհեր Գրիգորյանն էլ առաջարկեց քննարկումներ իրականացնել, որպեսզի մոտ ժամանակներում հարցը նորից բերել օրակարգ. «Կարծում եմ, որ դա շատ կարևոր է»:

Արարատ Միրզոյանն էլ նշեց, որ դա բարեփոխումների ճանապարհի կարևորագույն քայլերից մեկն է, և անպայման գնալու են այս ճանապարհով: «Հասկանալի է, կան գերատեսչություններ, որոնք ունեն արտաբյուջեներ, և այդտեղ ֆինանսական հոսքերը չկառավարելն ավելի հեշտ է, և որոշ ընթացակարգերից և սահմանափակումներից զերծ: Մեր Կառավարությունը և նախարարությունները, ՊԵԿ-ն ու մնացյալ մարմինները պիտի հստակ հասկանան, որ արտաբյուջեներով ոչ թափանցիկ, զանազան հոսքերի կառավարում չի լինելու: Արտաբյուջեներից պետք է հրաժարվել»,- ընդգծեց նա: