Ձեր վստահելի աղբյուրը

«Առաջիկա օրերին կիմանաք»,-  այսօր Կառավարության արտահերթ նիստից հետո լրագրողների հետ ճեպազրույցում ասաց Ազգային անվտանգության ծառայության տնօրեն Արթուր Վանեցյանը՝  պատասխանելով հարցին, թե ով է վարչապետի պաշտոնակատար Նիկոլ Փաշինյանի կողմից հիշատակված այն պատգամավորը, որի նկատմամբ կա քրեական գործ:

Նա անդրադարձավ իր և ՀՔԾ պետի գաղտնալսման փաստի առթիվ հարուցված քրգործին՝ նշելով, որ գաղտնալսումների հետ կապված այս պահին չի կարող որևէ բան ասել, քանի որ Քննչական կոմիտեում հարուցված քրգործն ընթանում է. «Փորձաքննություն է նշանակված, Քննչական կոմիտեն պարզաբանումներ կտա»:

ՀՀ երկրորդ նախագահ Ռոբերտ Քոչարյանի դեմ գործի ընթացքի մասին հարցին էլ ի պատասխան Արթուն Վանեցյանն ասաց, որ օպերատիվ աշխատանքներ են իրականացվում: «Երևի թե հիմա ասեմ, շահարկումներ են լինելու, բայց եկեք օպերատիվ աշխատանքը մենք ավարտենք, հիմնավորենք, որպեսզի երբ որ կլինեն արդեն կոնկրետ հրապարակումներ, կարողանանք բոլոր հրապարակումներին պատասխաններ տալ: Դրա համար այս պահին զերծ կմնամ որևէ մեկնաբանությունից»,- նշեց նա: