Ձեր վստահելի աղբյուրը

«Առանց հանրային քննարկման որևէ նախաձեռնություն օրենքի ուժ չի կարող ստանալ»,- այս մասին ՀՀ կառավարության արտահերթ նիստից հետո լրագրողների հետ զրույցում ասաց Պետական եկամուտների կոմիտեի նախագահ Դավիթ Անանյանն՝  անդրադառնալով «խոպանչիներին հարկելու» մասին գաղափարին:

Նրա խոսքով՝ այսօր սոցիալական ցանցերում տեղի ունեցող քննարկումները հիմնավոր չեն, կարող է այս կամ այն միտքը սխալ ընկալված լինի:

«Հասկանում եմ, որ  նախընտրական այս շրջանում ինչ-որ միտք կոնտեքստից վերցված կարող է մեկնաբանվել ու դրա  մեկնաբանությունները կարող են շահարկման առիթ հանդիսանալ: Ամենակարևորն այն է, որ կառավարությունում որևէ կոնկրետ նախագիծ դեռևս չկա»,- նշեց ՊԵԿ ղեկավարը:

Նրա խոսքով՝ կա եկամուտների համատարած  հայտարարագրման գաղափար, որի շուրջ կան տեսակետներ, որոնք պետք է նախ քննարկվեն մասնագիտական շրջանակներում, հետո կառավարությունում, հետո նախնական նախագծի տեսք ունենալուց հետո  պետք է դրվի հանրային քննարկման. «Եւ դա լինելու է ամբողջ 2019 թվականի ընթացքում»:

Դավիթ Անանյանը մեկ անգամ ևս շեշտեց, որ իրավական ակտերի փոփոխության փաթեթ չկա ու այս պահին օրակարգում չէ։

Նա միաժամանակ նշեց, որ քաղաքակիրթ բոլոր երկրներում կա եկամուտների հայտարարագրման ինստիտուտ. «Մենք ինքներս, որպես Հայաստանի Հանրապետություն, մեր ստեղծման օրվանից  քննարկում ենք՝ արդյոք հնարավորություն ունե՞նք համատարած  եկամուտների դեկլարացիա ներկայացնելու ինստիտուտ ներդնել»:

Նրա խոսքով՝ առաջին անգամ տեխնիկապես ունեն այդպիսի հնարավորություն:

«Ոչ թե անձինք իրենք պետք է պատրաստեն այդ տարեկան դեկլարացիաները, այլ հարկային համակարգում առկա համակարգերը պետք է գեներացնեն այդ հաշվետվությունները, տանեն ներկայացնեն ֆիզիկական անձանց, որպեսզի իրենք նայեն՝ համաձայն են դրա հետ, թե չէ: Մենք խոսում ենք ստվերի մասին և ատվերում եկամուտներ կան, որոնք պոտենցիալ հարկման ենթակա են, բայց չեն հայտարարագրվում: Եթե որոշել ենք, որ ստվերի դեմ պետք է պայքարենք, մենք պետք է համատարած հայտարարագրման ինստիտուտը կայացնելու մասին մտածենք: 27 տարի է դրա մասին մտածում ենք, անընդհատ հետաձգում ենք, քանի որ ասում ենք՝ երկիրը դեռ պատրաստ չէ դրան: Հիմա պատրաստ է»:

Հարցին՝ Ռուսաստանում եկամտահարկը 13 տոկոս է, Հայաստանում՝ 23 տոկոս, ինչպես է հարկումը հաշվվելու, Դավիթ Անանյանը պատասխանեց. «Եթե անձը, որը 13 տոկոսով հարկվող եկամուտ է ստանում Ռուսաստանում, լինելով եկամտային հարկի մասով ռեզիդենտ, ինքն այսօր էլ տարեկան դեկլարացիա ներկայացնելու պարտավորություն ունի: Հիմա գիտե՞ք մենք ինչի մասին ենք խոսում՝ տարիներ շարունակ հարկերը չենք վճարել, հիմա ինչո՞ւ պիտի վճարենք: Անձը, որը եկամուտ է ստանում դրսում և այդ տրանսֆերտն ուղարկում է իր ընտանիք, որպեսզի սպառի, մենք սպառումը չենք հարկելու, ճիշտ հասկացեք: Անձը, որը դրսում եկամուտ է ստանում և եկամտային հարկի առումով համարվում է ռեզիդենտ, ինքն այսօր էլ տարեկան դեկլարացիա ներկայացնելու պարտավորություն ունի այստեղ: Եթե ինքը չի հանդիսանա այստեղի ռեզիդենտ ու կստանա ոչ հայաստանյան եկամուտներ, էլ չի հարկվի Հայաստանում այդ եկամուտը»,- ասաց նա:

Դիտարկմանը, թե ի՞նչն են այս դեպքում  փոխում, ՊԵԿ նախագահը նշեց. «Անձը, եթե այսօր չի գալիս իմ դուռը, որովհետև ես չգիտեմ՝ ինքը եկամուտ ստացել է, թե չէ, ես արդեն գնալու եմ իր դուռը, հարցնեմ՝ դու եկամուտ ունեցել ես, թե չէ: Ինքն առաջին անգամ պետք է մտածի՝ այս անգամ էլ խաբի, թե չխաբի»:

Լրագրողները նաև հետաքրքրվեցին, եթե տղամարդը Ռուսաստանում աշխատում է, բայց գրանցված չէ, հարկեր չի վճարում, բանկի միջոցով կնոջը գումար է ուղարկում, ապա այդ գումարը հարկվում է, թե՞ ոչ, Դավիթ Անանյանը պատասխանեց. «Կնոջ մոտ այդ գումարը չի հարկվում: Եթե ամուսինը չգրանցված անօրինական աշխատող է, այդ չգրանցված աշխատողը երբ որ վերադառնա Հայաստան, պետք է տարեկան դեկլարացիայի մեջ իր եկամուտն արտացոլի: Եթե այնտեղ հարկ է վճարել, այդ հարկը պետք է վերադարձնենք իրեն, տարբերությունը ինքը պետք է վճարի իր հայրենի երկրի պետական բյուջեին: Մենք մեր ինքնաշխատ համակարգով կգտնենք իրեն արդեն: Բայց, ինչ ասում եմ, դա գաղափար է»: