Ջոն Գրինի վերջին բեսթսելերը թարգմանվել է հայերեն

Մշակույթ 11:07 19/11/2018 Հայաստան

Ջոն Գրինի վերջին բեսթսելերը թարգմանվել է հայերեն

Բեսթսելերների հեղինակ, հանրահայտ ամերիկացի գրող Ջոն Գրինի վերջին ստեղծագործությունը՝ «Անվերջ կրիաներ» վեպը թարգմանվել է հայերեն: Նոյեմբերի 24-ին «Բուկինիստ» գրախանութի Մաշտոցի պողոտայի մասնաճյուղում տեղի կունենա գրքի շնորհանդեսը: Գիրքը լույս է ընծայել «Էդիթ Պրինտ» հրատարակչությունը, թարգմանիչն է Լիա Ասատրյանը:

Հրատարակչությունից հայտնում են, որ «Ալյասկայի որոնումներում» և «Աստղերն են մեղավոր» գրքերի հեղինակ, մրցանակակիր գրող Ջոն Գրինը այժմ կիսվում է Ազայի պատմությամբ, որը սիրո, դիմացկունության և հարատև ընկերության ուժի մասին մի հիասքանչ նովել է:

«Անվերջ կրիաներ»-ի գլխավոր հերոսուհին՝ 16-ամյա Ազան երբևէ չէր հետամտել քննելու անհայտ կորած միլիարդատեր Ռասել Փիքեթի առեղծվածը, սակայն հարյուր հազար դոլարը գայթակղիչ է, իսկ նրա լավագույն և ամենաանվախ ընկերուհին՝ Դեյզին, ցանկանում է անպայման այդ հետաքննությունն անել: Այսպիսով, երկուսով դուրս են գալիս Ռասել Փիքեթի որդու՝ Դեյվիսի հետքի վրա: Ազան փորձում է լինել լավ դուստր, լավ ընկեր, լավ ուսանող և գուցե անգամ լավ դետեկտիվ՝ այդ ընթացքում պարփակված լինելով իր սեփական մտքերի, հոգեբանական խնդիրների սեղմող հորձանուտում:

«Մինչև գիրքը թարգմանելը կար մտավախություն, որ կարող է հոգեբանորեն «ծանր» լինել՝ շոշափվող թեման հաշվի առնելով, սակայն թարգմանությունը սկսելուն պես մտավախությունս փարատվեց: Այն թարգմանելն իսկապես հաճելի էր: Ընթերցողը յուրաքանչյուր գրքում անկեղծություն է փնտրում, ինչն անկասկած կգտնի «Անվերջ կրիաներ» վեպում»,- աղբյուրի փոխանցմամբ՝ նշել է գրքի թարգմանիչը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: