Ձեր վստահելի աղբյուրը

«ՀԱՊԿ-ի հետ կապված ի սկզբանե բացթողումներ եղել են, նաև մեր իշխանությունների կողմից»,- ԱԺ-ում լրագրողների հետ ճեպազրույցում այսօր ասաց ՀՀԿ խմբակցության ղեկավար Վահրամ Բաղդասարյանը։

Նա մանրամասնեց, որ Յուրի Խաչատուրովը ՀԱՊԿ երկրների համաձայնությամբ նշանակված անձ էր, և երբ որ նրա նկատմամբ պետք էր քրեական հետապնդում լիներ և գործ հարուցվեր, այդ ժամանակ նախապես, էթիկայի նորմերից ելնելով  պետք է տեղյակ պահվեր կազմակերպության անդամ երկրների նախագահներին։

«Այդ գործը չի կատարվել, լարումն ու սրումն այդտեղից առաջացավ։ Եվ կանխատեսելի էր, որ մենք կորցնելու էինք այդ տեղը, քանի որ դրա հետևություններն արդեն կային նրանց ելույթների մեջ։ Ինձ թվում է Նիկոլ Փաշինյանը կորոշի, թե ինչպես պետք է դրսևորի իրեն Պետերբուրգում՝ դեկտեմբերի 6-ին, համենայն դեպս այս լարումը ձեռնտու չէ մեր հետագա քաղաքական քայլերի համար»,- ասաց Բաղդասարյանը։

Լրագրողների հարցին, թե արդյոք համաձայն է Փաշինյանի հայտարարության հետ, որ պետք է Բելառուսը և Ղազախստանը բացատրություններ տան, նա պատասխանեց. «Բնականաբար, մեզ համար ցանկալի չէ, երբ նման փակ հանդիպումից հետո հանկարծ հայտնվում է Ադրբեջանի դեսպանը և նման քննարկում է կատարվում, բայց դա կապված է նրանից, թե ինչ պայմանավորվածություն է ձեռք բերվել փակ հանդիպման ժամանակ։ Բայց մենք չգիտենք՝ ինչպիսի պայմանավորվածություն է ձեռք բերվել այդ հանդիպմանը և ով է խախտել այդ պայմանավորվածությունը։ Համենայն դեպս, պետք է ֆիքսենք, որ Ադրբեջանի ՀԱՊԿ-ի հետ որևէ առնչություն չունի, չգիտեմ ում բարեկամ երկիրն է, կամ ում ընկերն է Ալիևը, բայց ոչ մի առնչություն չունի»։

Անդրադառնալով ներքին քաղաքականությանն ու ՀՅԴ-ի հետ նախկինում կազմած կոալիցիային՝  Վահրամ Բաղդասարյանն ասաց. «Մեծ հարգանք ունենալով ՀՅԴ նկատմամբ` կոալիցիոն մեր գործընկները հենց առաջին օրը՝ իշխանափոխության ժամանակ, առանց լուրջ հետևություն անելու, դրա ջատագովն էին: Իշխանության մաս կազմեցին կառավարության հետ, ճանապարհի կեսին ինչ-ինչ պատճառներով որոշեցին ընդդիմություն դառնալ, հետո ճանապարհի կեսցից չգիտեն՝ ինչպես կողմնորոշվել: Նման ձևով ընդդիմություններ չեն ձևավորվում»։

Նա հիշեցրեց, ինչպես էին իշխանափոխության օրերին մի շարք քաղաքական ուժեր Նալբանդյան, Ամիրյան և Աբովյան փողոցներում կանգնած սպասում՝  հասկանալու,  իջնեն, թե բարձրանան, միանան, թե ոչ. «Հենց ակտիվանում էր իշխանությունը, զգում էին, որ ինչ-որ բան պետք է փոխվի, կամաց իջնում էին, հենց նախորդ իշխանության կողմից կոշտ հայտարարություն էր լինում, հետ էին գնում, իսկ ամսի 23-ին` Սերժ Սարգսյանի հրաժարականից հետո, պարզապես տեղ չէին տալիս, թե ով պետք է առաջին շարքը լինի: Նիկոլի իշխանության ներկայացուցիչները հրում էին մի մասին` «դու մեզ պետք չես», մյուսի վզից քաշում էին՝ «արի, դու մեզ կարող է պետք լինես»: Այդպե՞ս են իշխանություն և ընդդիմություն կազմում»։

Ինչ վերաբերում է ՊԵԿ-ի կողմից  շրջանառության մեջ դրվող մի մեխանիզմի մասին լուրերին, նա ասաց. «Ես դրան համամիտ չեմ եղել ոչ նախորդ իշխանության ժամանակ, ոչ էլ հիմա»։