Ձեր վստահելի աղբյուրը

12։07
«Ես համոզված եմ, որ Մարտունին միշտ էլ նշելու, տոնելու, հպարտանալու առիթ ունի, քանի որ մարտունեցիները, ինչպես ՀՀ բոլոր քաղաքների, գյուղերի քաղաքացիներն, աչքի են ընկնում իրենց ուժեղ կամքով, աշխատասիրությամբ»,- այս մասին նշեց ՀՀ վարչապետի պաշտոնակատար Նիկոլ Փաշինյանը՝  Գեղարքունիքի մարզի Մարտունի քաղաքում աշխատանքային այցով գտնվելու ժամանակ: Նշենք, որ քաղաքը տոնում է հիմնադրման 190-ամյակը:

Նրա խոսքով՝ Մարտունին հայտնի է նաև նրանով, որ բազմաթիվ մարտունեցիներ դժվարություններին հանդիման ստիպված են մեկնել արտագնա աշխատանքի, բայց նրանք արտագնա աշխատանքի գնում են ոչ թե հեռանալու, այլ Հայաստանում մնալու համար, իրենց երկիրը, թաղամասը շենացնելու համար:

«Ես ուզում եմ այդ մարդկանց և բոլորիդ շնորհակալություն հայտնել առաջին հերթին ձեր աշխատասիրության, հայրենասիրության, ուժի ու կամքի համար, որ երբեք ոչ մի դժվարության առաջ չեք ընկրկել և չեք ընկրկելու»,- նշեց վարչապետի պաշտոնակատարը:

Խոսելով Հայաստանում տեղի ունեցած փոփոխությունների մասին՝ Նիկոլ Փաշինյանն ասաց՝  Հայաստանում առանցքային փոփոխությունն այն է, որ յուրաքանչյուրն այսօր իշխանություն է ՀՀ-ում:

Փաշինյանի ելույթի ժամանակ հարթակում նրան մոտեցավ վերջերս աշխարհի չեմպիոն դարձած  ծանրամարտիկ Սիմոն Մարտիրոսյանը: Չեմպիոնն ու Փաշինյանը  գրկախառնվեցին,  վարչապետի պաշտոնակատարը  շնորհակալություն հայտնեց Սիմոն Մարտիրոսյանին։

«Գիտեի՞ք, որ Մարտունու թոռ է մեր չեմպիոնն ու ռեկորդակիրը։ Շնորհավորում եմ եղբայր, հպարտանում ենք  քեզանով», -նշեց Նիկոլ  Փաշինյանը։

12։15
Վարչապետի ժամանակավոր պաշտոնակատար Նիկոլ Փաշինյանն այսօր Մարտունի քաղաքում բնակիչների հետ հանդիպմանը նշեց, որ իշխանության փոփոխությունը բավարար չէ, թեև երկրում շատ բան է փոխվել, բայց դեռ շատ բան կա փոխելու:

Մասնավորապես, Փաշինյանն անդրադարձավ աղբահանությանը, ճանապարհներին կուտակված աղբակույտերին:

«Այսօր երբ գալիս էի Մարտունի, հասա Նորատուսի խաչմերուկ, պատուհանից նայեցի, որը մի ակնթարթ տևեց, բայց ես սարսափեցի. այնտեղ երկու հատ հսկայական խանութ կա և դրանից 10 մետր այն կողմ էդ խանութների չափ աղբակույտ կա: Այնպիսի տպավորություն է, որ այդտեղ գյուղապետ չկա, որ սեփականատեր չկա, ո՞ւր է նայում մարզպետարանը։ Այնպիսի տպավորություն է, որ այս երկրում ոչ մի բան չի փոխվել, քանի որ  այդ թափված աղբը անարգանք է մեզնից յուրաքանչյուրի նկատմամբ», - վրդովված նշեց վարչապետի պաշտոնակատարը:

Նա հայտարարեց, որ  շատ լուրջ զբաղվելու է այն մարդկանցով, ում պարտականությունն է այդ աղբը հավաքել: «Նրանք ուզում են մեզ սովորեցնել աղբի մեջ ապրել, նրանք ուզում էին մեզ սովորեցնել քաղաքական աղբի մեջ ապրել, մենք մաքրեցինք այդ քաղաքական աղբը, հիմա մենք պիտի մաքրենք ֆիզիկական աղբը, մտավոր, բարոյական, հուսահատության աղբը: Մենք չենք հանդուրժելու մեր մեջ որևէ աղբի գոյությունը: Մենք մի ժողովուրդ ենք, որ Սիմոն Մարտիրոսյանի պես տղերք ունի, Յուրի Վարդանյանի նման մարդիկ ենք ունեցել, որ հերոսներ ենք ունեցել ու ունենք:  Մեզ բոլոր կողմերից ուզում են համոզել, որ խեղճ ժողովուրդ ենք, փոքր ժողովուրդ ենք, յոլա գնացող ժողովուրդ ենք, բայց մենք բոլորին ասում ենք՝ ոչ, մենք փոքր ժողովուրդ չենք, մենք, միգուցե, փոքրաթիվ ժողովուրդ ենք, բայց մեծ ժողովուրդ ենք»,- ասաց Նիկոլ Փաշինյանը: