Հիմա պաշտոնյաններն այն վիճակում են, որ ինչքան շատ «քերեն», այնքան լավ. Տնտեսագետը՝ տրանֆերտների հարկման մասին
Այսօր տարբեր հարթակներում բուռն քննարկվում է Պետական եկամուտների կոմիտեի նախագահ Դավիթ Անանյանի այն հայտարարությունը, թե Հայաստանը փորձում է ներդնել տրանսֆերտների հարկման մեխանիզմ: «Այսինքն՝ եթե քաղաքացին դրսից եկամուտ է ստանում, պարտավոր է այն հայտարարագրել ու դրա 23 տոկոսը որպես եկամտային հարկ վճարել պետությանը»,- «Ռադիոլուր»-ի հետ զրույցում ասել է ՊԵԿ նախագահը:
Այսպիսով, ՊԵԿ-ի շրջանառության մեջ դրած գաղափարի համաձայն՝ 2020 թվականից եկամտային հարկի պոտենցիալ վճարող են դառնալու 18-65 տարեկան ՀՀ բոլոր քաղաքացիները: Դրա առաջին քայլը պետք է լինի քաղաքացու կողմից սեփական եկամուտները պարտադիր հայտարարագրելը, ըստ որի կորոշվի՝ նա ունի՞ հարկման ենթակա եկամուտ, թե՞ ոչ:
Քաղաքացիներն իրենց մտահոգություն են հայտնում դրա շուրջ: Մասնավորապես, ֆեյսբուք սոցիալական ցանցի օգտատերերը տարօրինակ են համարում, որ նախընտրական շրջանում նման առաջարկ է շրջանառվում: Օգտատերերից մեկը գրել է՝ ասում են, որ ներգաղթն են խրախուսելու, «ովքեր 23%-ը շրջանցելու ձևերը չիմացան՝ հարազատներին կկանչեն իրենց մոտ»:
«Ֆրանսիայի, ԱՄՆ-ի և զարգացած մի շարք երկրներում նման տարրեր կիրառվում են, բայց Հայաստանի նման երկրում, որի աշխատաուժի մեկ քառորդը դրսում հազիվ գոյատևում է և երկու կոպեկ փոխանցում իրենց ընտանիքներին, ճիշտ չէ նման բաների մասին խոսել»,- Panorama.am-ի թղթակցի հետ զրույցում ասաց տնտեսագետ Ատոմ Մարգարյանը:
Տնտեսագետի խոսքով՝ նման քայլի գնալուց առաջ նախ պետք է հարկադրույքների ներդաշնակեցում արվի: Այսինքն՝ եթե Հայաստանում եկամտահարկը կազմում է 23 տոկոս, Ռուսաստանում կրկնակի ցածր է և պետք է իջեցնել այնքան, որքան ՌԴ-ում է, քանի որ տրանսֆերտների մեծ մասը գալիս է այնտեղից:
«Հիմա պաշտոնյաններն այն վիճակում են, որ ինչքան շատ «քերեն», այնքան լավ: Բյուջեն լցնելու խնդիր կա»,- ասաց Ատոմ Մարգարյանը:
Տնտեսագետը կարծում է, որ եթե նման մեխանիզմ ներդրվի, ապա բնական է, որ մարդիկ գումար չեն փոխանցի, առձեռն կամ այլ անձանց միջոցով գումարը կհասցնեն ընտանիքներին, արդյունքում, փոխանցման ինստիտուտը կվերանա: «Սա նաև կբերի նրան, մարդիկ իրենց ընտանիքներին կտանեն իրենց հետ, իսկ թե բանակն ինչպես կհամալրվի, ով կկանգնի սահմանին, երևի էդ մարդկանց դա չի հետաքրքրում»,- նշեց Ատոմ Մարգարյանը:
Նա հիշեցրեց, որ պարբերաբար այդպիսի բախտախնդիր առաջարկներ եղել են, սակայն «բնի մեջ» դրանք մարել են. «Հիմա անհասկանալի է, թե ինչու են նախընտրական այս փուլում նորից առաջ քաշել: Կարծում եմ՝ հանրային կարծիքը ստուգելու գաղափար է, որից ՊԵԿ-ը կհրաժարվի»:
Նշենք, որ դրա վերաբերյալ իր տեսակետն է հայտնել նաև ԱԺ փոխնախագահ Արփինե Հովհաննիսյանը: Նրա խոսքով՝ այդ նախաձեռնությունը ուղղակիորեն հարվածելու է ամենաանապահով խավի գրպանին: «Դա նշանակում է, որ օրինակ, գյուղացին, որը վաճառում է իր ապրանքը, պետք է այդ վաճառքից գոյացած եկամուտը հայտարարագրի։ Կամ՝ արտագնա աշխատանքի մեկնած քաղաքացիները, որոնք իրենց ընտանիքը պահելու համար ուղարկում են որոշակի գումար, կինը, երեխան, պետք է հայտարարագրեն իրենց եկամուտը։
Հայտարարագրելուց հետո, ըստ նախագծի, եկամտի 23 տոկոսը պետք է ուղղվի պետական բյուջե։ Սա նշանակում է, որ եթե, օրինակ, 100 դոլար գումար են ձեզ ուղարկել, ապա այդ 100 դոլարի 23 տոկոսը պետք է գնա պետական բյուջե։ Ես համարում եմ, որ սա անթույլատրելի է։ Այն եղանակով, որով ներկայացվել է այդ նախագիծը, ուղղակի թույլ չի կարելի տալ, որ կյանքի կոչվի և իրականություն դառնա», - ֆեյսբուքյան ուղիղ եթերում հայտարարել է Արփինե Հովհաննիսյանը։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
