Ձեր վստահելի աղբյուրը

«Ցավում եմ, որ այսպիսի իրավիճակ է առաջանում արտաքին քաղաքականության կարևոր հարթակի` ՀԱՊԿ-ի վրա»,- խորհրդարանում լրագրողների հետ ԱԺ ճեպազրույցում հայտարարեց ՀՅԴ խմբակցության ղեկավար Արմեն Ռուստամյանը:

«Միանշանակ է, որ թե Բելառուսի, թե Ղազախստանի ղեկավարների հայտարարությունները չեն բխում կառուցողականության ոգուց և այն համագործակցության տրամաբանությունից, որը ՀԱՊԿ գործընկերության մեջ առկա է»,- ասաց նա:

Ռուստամյանի խոսքով՝  խնդիրները պետք է այնպես ձևակերպել, որ դրանք լրացուցիչ պրոբլեմներ չառաջացնեն։

«Ինչ վերաբերում է տեղը պահելու հարցին, մենք հասկանում էինք, որ բացը կար ՀԱՊԿ կանոնադրության մեջ։ Պետք է հասկանայինք, եթե այդ տեղը կոնկրետ անձի հետ կապված չենք պահպանում, անձին հետ ենք կանչում, ինչ է լինում։ Հիմա այդ խնդիրը, փաստորեն, կատարված փաստից հետո նոր փորձ է արվում լուծել, ինչ որ կանոնագրային ձևակերպումներ տալ։ Կարծում եմ, որ մինչև մեր տեղը ՀԱՊԿ-ում հարվածի տակ դնելը, այդ խնդրին պետք էր անդրադառնալ նախապես, պետք էր նախապատրաստվել դրան, մինչև Յուրի Խաչատուրովին հետ կանչելը, պետք էր նախապատրաստել այս ամեն ինչը, որպեսզի կատարված փաստից հետո չփորձենք հարցերը լուծել։ Պարզ էր, որ խնդիր գոյություն ուներ, Խաչատուրովի նշանակումն այդտեղ հարթ ու հանգիստ չի եղել, մենք տեսել ենք թե ինչ դժվարությունների արդյունքում է այդ  նշանակումը եղել, դեռ այն ժամանակ հակադրվող կողմեր կային, բայց այնուհանդերձ այդ հարցը լուծվեց։ Եվ եթե այդպիսի խնդիր ունենալով, մենք նաև գիտեինք, որ կանոնադրությունը հստակ չի ասում ինչ պետք է տեղի ունենա տվյալ պարագայում, ուրեմն պետք էր դրան նախապատրաստվել,  որը մենք չենք արել»,- մանրամասնեց Ռուստամյանը։

ՀՅԴ խմբակցության ղեկավարի խոսքով՝  լարվածությունը մեծանում է և ՀԱՊԿ-ում եթե առաջանալու են պրոբլեմներ, դրանից առաջին օգտնողը լինելու է Ադրբեջանը։

«Տեսնում եմ, թե ինչպիսի հրճվանք է Ադրբեջանի նախագահը այդ թեմայով արտահայտում` մեղադրանքի սլաքը Հայաստանի վրա ուղղելով: Նա նշում է, որ եթե այդ կազմակերպության մեջ խնդիր կա, ապա դա Հայաստանն է ստեղծում։ Մենք պետք  նրբանկատ լինենք, հմուտ քայրել կատարենք», - հավելեց նա:

Լրագրողները Ռուստամյանից հետաքրքրվեցին ՀԱՊԿ-ում Ադրբեջանին և Պակիստանին ներառելու մասին լուրերից, ինչի համար պետք է կանոնադրություն փոխվի. «Կանոնադրությունը հեշտորեն չի կարող փոխվել, այդտեղ կոնսենսուսով են որոշումները կայացվում։ Մենք պետք է բոլորին մղենք, որպեսզի համախոհության հասնելու ոգին չտուժի։ Այդ առումով չեմ կարծում, եր կարող է ինչ-որ խնդիր առաջանալ, Հայաստանին չեն կարող շրջանցել, Հայաստանն իր տեղն  ու ձայնի իրավունքը ունի՝ հավասար պայմաններում»։

Ինչ վերաբերում է ՌԴ նախագահ Վլադիմիր Պուտինի լռությանը՝ ասաց. «Կարծում եմ՝ ճիշտ է վարվում և այս վեճի մեջ չի փորձում դառնալ կողմ։ Պուտինը չի մտնում այդ բանավեճերի մեջ՝ մտածելով, որ ամեն ինչ ավելի բաց տեքստով ասելու առիթն  ու հնարավորությունը առջևում են»։

Արմեն Ռուստամյանը՝ առաջիկա ընտրությունների մասին

«Շատ ակնհայտ է, որ ընտրությունները պետք է տեղի ունենան պաթոսի մթնոլորտում, ինչը շատ ավելի մեծ հնարավորություններ տալիս է կոնկրետ մեկ քաղաքական ուժի։ Մեզ համար այդ ընտրությունները հիմք չեն՝ գնահատելու, թե արդյոք Հայաստանում հաստատվեց ժողովրդավարական ընտրությունների ավանդույթ, թե ոչ: Տեսել ենք, որ մեկ անգամ Հայաստանում` 1990-1991 թթ. եղել են ժողովրդավարական ընտրություններ, բայց դա չի բերել ժողովրդավրության: Հաջորդ ընտրությունները նոր արդեն ցույց կտան այն պայմաններում, երբ իշխող ուժը վտանգ ունի իշխանությունը կորցնելու, ընտրությունները ժողովրդավարական են անցկացվելու, թե ոչ»,-հավելեց Ռուստամյանը։

Անդրադառնալով տարիների ընթացքում Դաշնակցության քաղած դասերին` պատգամավորը հիշեցրեց, որ մի առիթով ասել է, հիմա էլ պնդում է` իրենց ամենամեծ սխալը կոալիցիայի մեջ լինելն էր, որտեղ առանց իրենց հնարավոր էր լինում որոշումներ կայացնել: