Ձեր վստահելի աղբյուրը

ԱԺ պատգամավոր Միքայել Մելքումյանը չի կարծում, որ որոշ թեկնածուներ  ԲՀԿ նախընտրական ցուցակից ինքնաբացարկ ներկայացրել են գաղափարական կամ ծրագրային տարաձայնությունների պատճառով։ Այս մասին նա այսօր ասաց ԱԺ-ում՝ լրագրողների հետ ճեպազրույցում։

«Միգուցե ինչ-որ պահի, ինչ-որ պլաններ, ծրագրեր փոխվել են։ Ես հետամուտ չեմ եղել, որ հարցնեմ։ Ես չեմ հանդիպել այդ մարդկանց, որ խոսեմ։ Թիմից նեղանալու խնդիր չկա։ Դրա համար էլ մինչև գրանցումն է եղել, ոչ թե գրանցումից հետո։ Չեմ կարծում, որ որևէ հատուկ բան կա»,- ասաց նա։

Անդրադառնալով նախընտրական քարոզարշավին՝ ԲՀԿ անդամը խոստացավ, որ իրենք ունենալու են լավագույն ծրագրերից մեկը։

«Մենք կունենանք լավ, մրցունակ ծրագիր։ Կարծում ենք, որ հեղափոխությանը պետք է հաջորդի հստակ տնտեսական և տեխնոլոգիական հեղափոխությունը»,- ասաց Միքայել Մելքումյանը՝ միաժամանակ հավելելով, որ ԲՀԿ առաջնորդ Գագիկ Ծառուկյանն անձամբ մասնակցելու է նախընտրական քարոզարշավին, մեկնելու է մարզեր։

Պատգամավորը հավաստիացրեց, որ իրենց քարոզարշավը կլինի ինչպես դահլիճներում, այնպես էլ առավելապես բակայի տարածքներում։

«Մենք մեր ռեսուրսներ ունենք, մեր կառույցները տեղում են»,- ասաց նա։

Ինչ վերաբերում է որևէ ուժի հետ միավորվելու հնարավորությանը, Միքայել Մելքումյանը նկատեց՝ իրենք նման խնդիր չունեն, ԲՀԿ-ն իր տեղում է, և ընտրություններից առաջ ընդդիմություն-իշխանություն հարցն անտեղի է։

Պատգամավորն ափսոսանք հայտնեց, որ ռեյտինգային ընտրակարգը պահպանվել է՝ այն որակելով հետամնաց և անտեղի։

«Մենք պետք է քաղաքական կշիռ ունեցող խորհրդարան ունենանք»,- փաստեց ԱԺ փոխնախագահը։