Ձեր վստահելի աղբյուրը

«Գազի և էլեկտրաէներգիայի հարցով ԱԺ քննիչ հանձնաժողովն իր աշխատանքները շարունակելու է այնքան ժամանակ, որքան ԱԺ կանոնակարգ օրենքը թույլ է տալիս»,- այսօր տեղի ունեցած մամուլի ասուլիսի ժամանակ ասաց ԱԺ քննիչ հանձնաժողովի նախագահ Միքայել Մելքումյանը:

«Մենք ամբողջ շղթան ենք քննարկելու։ Օրինակ, երբ ասում ենք, որ էլեկտրաէներգիայի գինը պետք է իջնի, դա չի վերաբերում միայն Հայաստանի էլեկտրական ցանցեր ընկերության մարժային, ամբողջ շղթային է վերաբերում, այդ թվում՝ արտադրող կայաններին։ Մեր մոտեցումների մեջ եղել ենք այն դրույթի հավատարիմ կողմնակիցը, որ էլեկտրաէներգետիկական համակարգերում հավասարակշռությունը չխախտվի։ Մենք չպետք է անենք քայլեր, որոնք կբերեն անցած սխալների հետևանքով այսօրվա ստատուս քվոյի փլուզման»,- ասաց բանախոսը։

Անդրադառնալով գազամատակարարման խնդիրներին՝ Միքայել Մելքումյանը նկատեց, որ այստեղ արձանագրվել են մի քանի խնդրահարույց պահեր։

«Առաջինն անխուսափելի տեխնոլոգիական կորուստներն են, որոնք 6.69 տոկոս են։ Սա շատ ավելի բարձր է, քան 2002-2016 թվականները գործող 5.37 տոկոսի։ 1 տոկոս կորուստը համարժեք է մոտ 20 միլիոն խորանարդ մետր գազի։ Հաջորդը, ոլորտը բաժանում ենք երկու մասի. գազամատակարարման համակարգը բաժանված է երկու մասի՝ գազ փոխադրող և գազը բաշխող համակարգերի։ Ինչքան էլ զարմանալի է, գազաբաշխման համակարգում, որտեղ ավելի շատ կորուստներ պետք է լինեին, այդ կորուստների ծավալը կազմում է ընդամենը 2 տոկոս, իսկ մայրուղային համակարգում կազմում է սակագնի մեջ 4.6, փաստացի՝ 4.3 տոկոս։ Սա սարսափելի բարձր թիվ է։ 4 տոկոսից ավելի կորուստը լինում է մոտավորապես 90 միլիոն խորանարդ մետր գազ»,- ասաց Միքայել Մելքումյանը։

ԱԺ քննիչ հանձնաժողովի նախագահը որպես հաջորդ խնդիր մատնանշեց Հանրային ծառայությունները կարգավորող հանձնաժողովի համար պետության կողմից սահմանված գործառույթների իրականացման սահմանափակումը։

«Երրորդն այն է, որ այնուամենայնիվ, «Գազպրոմի» գործունեության հիմքում, ըստ համաձայնագրի, դրված է շահութաբերության այնպիսի մակարդակ, որը երաշխավորում է առաջիկա բավականին երկար տարիների համար կայուն շուկա։ Գազի համակարգի մյուս կարևոր հանգամանքն այն է, որ 2015 թվականի հուվարի 1-ից, երբ սահմանին 1000 խորանարդ մետր գազը 189 դոլար էր և իջավ 165 դոլարի, սակագինը սպառողի համար չիջավ։

8.9 միլիարդ դրամ մնաց «Գազպրոմին»։ Հետագայում, երբ 165 դոլարն իջավ 150 դոլարի, սակագինն իջավ, բայց 4 տարիների ընթացքում 8.9 միլիարդ դրամը կուտակվում է  Գազպրոմում։ Սա բավականին մեծ գումար է, և մեզ հետաքրքիր է՝ ինչ ոլորտներում է այն ծախսվել»,- նշեց հանձնաժողովի նախագահը։