Ձեր վստահելի աղբյուրը

Երևանի Մնջախաղի պետական թատրոնը տեղծվել է 1974 թվականին և պետական թատրոնի կարգավիճակ է ստացել 1983 թվականին։ Սակայն մինչ այժմ թատրոնը չունի սեփական տանիքը, թատրոնի բեմադրությունները ներկայացվում են Երևանի պատանի հանդիսատեսի թատրոնում՝ վարձակալության հիմունքներով։  2017 թվականին Երևանի  Գևորգ Քոչար 21 հասցեում գտնվող Ազգային գրապալատի շենքը տրվել էր Մնջախաղի պետական թատրոնին։ Սակայն շենքը հուշարձանային է, որևէ փոփոխություն այնտեղ հնարավոր չէր իրականացնել։

Մշակույթի նախարարությունը տեղեկացնում է, որ երեկ ՀՀ մշակույթի նախարարի պաշտոնակատար Լիլիթ Մակունցը, նախարարի տեղակալ Նազենի Ղարիբյանի և նախարարության աշխատակիցների ուղեկցությամբ, Երևանի մնջախաղի պետական թատրոնի գեղարվեստական ղեկավար Ժիրայր Դադասյանին ու տնօրեն Արամ Խոջոյանին ներկայացրել են թատրոնի տեղակայման ևս մեկ տարբերակ /տարածք/: Շենքը գտնվում է Երևանի Կենտրոն վարչական շրջանի Մոսկովյան 5 հասցեում /Ղուկաս Ղուկասյանի անվան պիոներների և դպրոցականների պալատի բակային հատվածում/, որտեղ երկար տարիներ տեղակայված էր Հանրապետական զինկոմիսարիատը:

Panorama.am-ը հետաքրքրվեց թատրոնի գեղարվեստական ղեկավար Ժիրայր Դադասյանից, արդյո՞ք տարածքը հարմար է թատրոնի համար, իրենց դուր եկել է, հաշվի առնելով այն, որ մինչ այս այլ տարածքներ ևս առաջարկվել են, սակայն չեն ընդունվել։

«Հրաշալի տարբերակ է։  Երեք հարկանի շենք է, մեր թատրոնին տրամադրվելու է  երկրորդ և երրորդ հարկերը»,- ասաց Ժ. Դադասյանը։

Նա նշեց, որ դեռ պետք է նախարարությունը սահմանված կարգով դիմի ՀՀ պետական գույքի կառավարման կոմիտեին, օրենքով սահմանված կարգով շենքի համապատասխան տարածքը օգտագործման նպատակով՝ մշակույթի նախարարության ենթակայությամբ գործող մնջախաղի պետական թատրոնին տրամադրելու համար, հաստատվի կառավարության որոշմամբ, նախագծի մրցույթ հայտարարվի, սկսվի շինարարություն։

«Պրոցեսը երկար է։ Մինչև դռները չբացենք, ժապավենը չկտրենք... Չգիտեմ էլի՝ ինչպես վերաբերվեմ։ Բայց անընդհատ ուրախանում եմ»,- ասաց թատրոնի գեղարվեստական ղեկավարը։