Ձեր վստահելի աղբյուրը

Հայաստանի արտաքին քաղաքականությունը իներցիայով չի շարժվում, Հայաստանի արտաքին քաղաքականությունը շատ հստակ, զգուշավոր, մտածված հաշվարկ է մեր անվտանգության ճարտարապետությունը կառուցելու առումով: Այս մասին «Առավոտ»-ին տված հարցազրույցում ասել է ԱԳ նախարարի պաշտոնակատար Զոհրաբ Մնացականյանը։

«Հիմքում դրված է ՀՀ-ն՝ իր շահերով: Երբ խոսում ենք անվտանգության մասին, նկատի ենք առնում երկու բաղադրիչ՝ պաշտպանական անվտանգությունը և զարգացման անվտանգությունը, թե ինչպես ենք կարողանում ապահովել մեր երկրի բնականոն զարգացումն իր անվտանգության ճարտարապետության կոնտեքստում»,-նշել է նա։

Մնացականյանի խոսքով, Հայաստանի քաղաքականությունը հայամետ է, որի հիմքում ընկած է Հայաստանի ազգային շահը:

«Այդ ճարտարապետությունը կառուցվել է շատ մտածված, զգուշավոր, առավել ևս հիմա, երբ ապրում ենք բավական տուրբուլենտ աշխարհում, անկանխատեսելիության մակարդակը շատ մեծ է: Մենք պետք է ավելի հստակ լինենք, թե որքանով ենք ճիշտ գնահատում և՛ մարտահրավերները, և՛ հնարավորությունները, որոնք ծառայեցվելու են մեր ազգային շահերին և նպատակներին՝ մեր պաշտպանական և զարգացման անվտանգությունը համապարփակ պահելու առումով: Մեր արտաքին քաղաքականությունը կառավարության ծրագրում արտահայտվել է իր շարունակականությամբ, այսինքն՝ կտրուկ քայլեր չեն ներմուծվել, բայց դա չի նշանակում, որ չեն ներմուծվել նոր շեշտադրումներ»,-ասել է նախարարի պաշտոնակատարը։

Հարցազրույցն ամբողջությամբ՝ ԱԳՆ պաշտոնական էջում։